खोज

भैरहवा, ०७ भदौ । 

रुपन्देही प्रहरीले नक्कली शैक्षिक प्रमाण पत्र बनाउने घटनामा संलग्न रहेको थप एक आरोपीलाई चितवनबाट पक्राउ गरेको छ ।

जिल्ला प्रहरी कार्यालय चितवनको सहकार्यमा बिहीबार चितवन कालिका नगरपालिका वडा नम्बर ५ बस्ने ५० वर्षीय हरि प्रसाद कँडेललाई पक्राउ गरिएको रुपन्देही प्रवक्ता प्रहरी नायब उपरीक्षक सुरज कार्कीले जानकारी दिए ।

कँडेल चितवनमा कलेज कोच नेपाल प्रालीको सञ्चालक रहेको प्रहरीको भनाई छ । यस अघि नक्कली शैक्षिक प्रमाणपत्र सहित पक्राउ परेको भारत कानपुरका अभिषेक यादवको भनाइको आधारमा कँडेललाई पक्राउ गरिएको कार्कीले जानकारी दिए ।

रुपन्देही प्रहरीले गत भदौ १ गते नक्कली शैक्षिक प्रमाणपत्रसहित एक भारतीय नागरिक यादवलाई पक्राउ गरेको थियो । यादवको साथबाट विभिन्न नेपाली तथा भारतीय विश्वविद्यालयका नक्कली कागजात र ती बनाउन प्रयोग हुने सामग्रीहरू बरामद गरिएको थियो ।

सिद्धार्थनगर नगरपालिका वडा नम्बर–१ स्थित बेलहिया बसपार्कमा रहेको होटल मुक्तिनाथमा पक्राउ परेका यादवले बोकेको सुटकेस खानतलासी गर्दा त्रिभुवन विश्वविद्यालयका १०० वटा ट्रान्सक्रिप्ट र ३६ वटा खाली प्रमाणपत्रहरू फेला पारेको छ ।

विभिन्न शैक्षिक संस्थाका ३ वटा नक्कली र ५ वटा स्ट्याम्प प्याडहरू, त्रिभुवन विश्वविद्यालयको ४ हजार ४० थान रहेको २१ बन्डल होलोग्राम, उच्च माध्यमिक शिक्षा परिषद्को २ हजार थान रहेको १९ प्याकेट, राष्ट्रिय परीक्षा बोर्डको १ हजार ७ सय थान रहेको १७ प्याकेट नक्कली होलोग्राम र स्टिकरहरू प्रहरीले बरामद गरेको थियो ।

यसै गरी भारतको एमीटी विश्वविद्यालय (उत्तर प्रदेश) को ८० वटा नक्कली मार्कसिट, ४० वटा प्रोभिजनल सर्टिफिकेट, ६० वटा क्यारेक्टर सर्टिफिकेट र ४९ वटा अन्य खाली प्रमाणपत्रहरू र ४० वटा खाली लोगो फेला परेको थियो ।

यस्तै जवाहरलाल नेहरू टेक्निकल युनिवर्सटि हैदराबाद, छत्रपति साहूजी महाराज युनिभर्सटी, कानपूर, असम उच्च माध्यमिक शिक्षा परिषद्, कुरुक्षेत्र विश्वविद्यालय, आन्ध्र विश्वविद्यालय सहित अवैध कारोबारका लागि प्रयोग भइरहेका विभिन्न विश्वविद्यालय तथा कार्यालयहरूको नाम लेखिएका दर्जनौँ नक्कली स्ट्याम्प र छापहरू, चार वटा पेनड्राइभ, एक थान एचपी कम्पनीको ल्यापटप, एक थान आई फोन, एक थान रियलमी मोबाइल, तीन वटा एटीएम कार्ड, भारु १८ हजार ५ सय रुपैयाँ र नेपाली ३ हजार २५ रुपैयाँ नगद बरामद गरिएको थियो ।

सोही घटनाको थप अनुसन्धानको क्रममा चितवनमा रही नक्कली शैक्षिक प्रमाण पत्र बनाउन संलग्न रहेकोमा हरि प्रसाद पक्राउ परेका हुन् । कँडेललाई बिहीबार नै भैरहवा ल्याई यस विषयमा थप अनुसन्धान गरिरहेको प्रहरी नायब उपरीक्षक कार्कीले बताए ।