खोज

बुटवल, ४ भदौ ।

नेपाल नागरिक उड्डयन प्राधिकरण (क्यान) ले भैरहवा र  पोखरा अन्तर्राष्ट्रिय विमानस्थल निर्माणका लागि लिएको ऋण आगामी एक दशकभित्र तिर्ने योजना बनाएको छ ।

क्यानका महानिर्देशक इञ्जिनियर प्रदीप अधिकारीका अनुसार पोखरा विमानस्थलको निर्माणका लागि लिइएको १३ अर्ब रुपैयाँ ऋणमध्ये दुई किस्ता तिरिसकेको र बाँकी रकम पनि समयमै तिर्ने योजना रहेको छ । उनकाअनुसार पोखरा अन्तर्राष्ट्रिय विमानस्थलको कमाइबाट ऋण तिर्न कठिन हुनेछ ।

तर देशभरका विमानस्थल अहिले पनि राम्रो अवस्थामा चलिरहेका छन् । जसकारण क्यानको आम्दानी राम्रो छ, सोही पुँजीबाटै ऋण तिरिनेछ । कुनै विमानस्थले कमाउने र उसैले खाने भन्ने हुँदैन, सबै एयपोर्टको अड्डा क्यान भएकाले ती एयरपोर्टहरूको कमाइबाट क्यानले ऋण तिर्ने योजना बनाएको छ ।
भैरहवा विमानस्थलको लागत करिब ६ अर्ब रुपैयाँ रहेको छ । पोखरा र भैरहवाको गरी एक दशकमा सम्पूर्ण ऋण चुक्ता गर्ने लक्ष्य क्यानको रहेको छ ।

सार्वजनिक लेखा समितिको उपसमितिले पोखरा विमानस्थल निर्माणमा लागत बढाउने, मापदण्ड विपरीत माटो हटाउने, कर छुट दिने लगायतका विषयमा अनियमितता भएको भन्दै प्रतिवेदन बुझाएको थियो । तर महानिर्देशक अधिकारीले ती आरोपहरूलाई अस्वीकार गर्दै भ्रष्टाचारको कुनै प्रमाण नरहेको दाबी गरे ।

उनले पोखरा विमानस्थललाई बीआरआई परियोजनाको संज्ञा दिइनु पनि तथ्यविहीन भएको बताएका छन् । उनका अनुसार विमानस्थल निर्माण योजना सन् २०१२ मा सुरु भएको हो भने चीनको बेल्ट एन्ड रोड इनिसिएटिभ ९बीआरआई० सन् २०१७ मा लागू भएको थियो ।

पोखरा विमानस्थलमा नेपाल आयल निगमले सेवा शुल्कसम्बन्धी नियमावलीअनुसार भाडामा लिएको जग्गामा ट्यांकी र टावर जस्ता संरचना निर्माण गरेको छ। यस्तै संरचना भैरहवामा पनि निगमले बनाएको अधिकारीले बताए ।

उनका अनुसार विमानस्थलको रनवे मर्मत गर्दा माटोले ढाकिएको भएपनि कटिङ वा फिलिङको प्राविधिक यथार्थ नबुझी संसदीय समितिले प्रतिवेदन तयार पारेको आरोप उनले लगाए ।