समाचार सारांश
-
आर्थिक वर्ष २०८१/८२ मा मात्रै रूपन्देहीमा ५ अर्ब ४७ करोड २६ लाख ३३ हजार २४ रुपैयाँको नयाँ लगानी थपिएको छ ।
-
गत आर्थिक वर्षमा १,१६३ वटा नयाँ साना तथा मझौला उद्योगहरू दर्ता भएका छन् ।
-
उद्योगहरूबाट ३,९२१ जनालाई रोजगारी उपलब्ध भएको छ ।
भैरहवा, २८ साउन ।
पछिल्ला केही वर्षयता रूपन्देही जिल्लामा साaना तथा मझौला उद्योगहरू खुल्ने क्रम ह्वात्तै बढेको छ । घरेलु तथा साना उद्योग कार्यालय रुपन्देहीको तथ्यांकअनुसार, आर्थिक वर्ष २०८१/८२ मा मात्रै रुपन्देहीमा ५ अर्ब ४७ करोड २६ लाख ३३ हजार २४ रूपैयाको नयाँ लगानी थपिएको छ । यसले जिल्लाको आर्थिक गतिविधिमा सकारात्मक प्रभाव पारेको देखिन्छ ।
गत आर्थिक वर्षमा विभिन्न प्रकारका साना तथा मझौला उद्योगहरू गरी कुल १ हजार १६३ वटा नयाँ उद्योग दर्ता भएका छन् । यी उद्योगहरूबाट कुल ३ हजार ९२१ जनालाई रोजगारी मिलेको तथ्याङ्कमा उल्लेख छ । यसरी नयाँ लगानी थपिनु र रोजगारीको अवसर सिर्जना हुनुले जिल्लाको समग्र विकासमा टेवा पुगेको छ ।
दर्ता भएका उद्योगहरू मध्ये सबैभन्दा धेरै सेवामूलक उद्योगहरू रहेको घरेलु तथा साना उद्योग कार्यालय रुपन्देहीका निमित्त कार्यालय प्रमुख लोक बहादुर कार्कीले जानकारी दिए । यस बाहेक उत्पादनमूलक उद्योग, कृषि र वनजन्य उद्योगहरूको सङ्ख्या पनि उल्लेख्य रहेको उनले बताए ।
कोरोना महामारीपछि उद्योग व्यवसायमा देखिएको मन्दी र शिथिलतालाई चिर्दै पछिल्लो समयमा रुपन्देहीमा उद्योग दर्ता र लगानीमा उल्लेख्य वृद्धि भएको हो । घरेलु तथा साना उद्योग कार्यालयका प्रमुख कार्कीका अनुसार, कोरोनाका कारण केही वर्ष सुस्त देखिएको उद्योग क्षेत्रले अहिले गति लिएको छ ।
“पछिल्लो समय युवाहरूमा आफ्नै व्यवसाय गर्ने मोह बढेको छ,” उनले भने, “सरकारले पनि साना तथा घरेलु उद्योगहरूलाई प्रोत्साहित गर्ने नीति लिएकाले नयाँ उद्यमीहरू थप आकर्षित भएका छन् ।” जिल्लामा गत आर्थिक वर्षमा ८८२ वटा उद्योग र १ हजार १६३ वटा वाणिज्य फर्म गरी २०४५ वटा नयाँ व्यवसाय दर्ता भएका छन् ।
सोही अवधिमा ४२६ उद्योग र २४८ वटा व्यापार गरी ६७४ वटा फर्म बन्द भएको कार्यालय प्रमुख कार्कीले जानकारी दिए । यस अवधिमा ३२० जना महिला र ६८२ जना पुरुषले गरी १ हजार २ जना नयाँ उद्यमी बनेका छन् । गत आर्थिक वर्षमा कार्यालयले २ करोड १० लाख बढी राजस्व असुली गरेको छ ।
लगानीमा भएको यो वृद्धिले रुपन्देहीलाई आर्थिक केन्द्रका रूपमा विकास गर्न थप सहयोग पु¥याउने विश्वास गरिएको छ । यद्यपि, उद्योग दर्ता र लगानी मात्रै पर्याप्त हुँदैन । यी उद्योगहरूको दिगोपन सुनिश्चित गर्न र उनीहरूलाई आवश्यक पर्ने सीप, बजार र वित्तीय पहुँचमा सहयोग पु¥याउनु पनि उत्तिकै महत्त्वपूर्ण रहेको सिद्धार्थ उद्योग वाणिज्य सङ्घका अध्यक्ष नेत्र प्रसाद आचार्यको भनाई छ ।
लगानीको वातावरणलाई थप सहज बनाउन सरकारले नीतिगत सुधार गर्नुपर्ने आवश्यकता समेत उनले औँल्याए । साना तथा मझौला उद्योगहरूले रोजगारी सिर्जना गर्नुका साथै स्थानीय स्रोतसाधनको उपयोग गरेर उत्पादन बढाउन मद्दत गर्दछन् ।
यसले ग्रामीण अर्थतन्त्रलाई पनि बलियो बनाउँछ । रुपन्देहीमा भएको यो उत्साहजनक लगानीले आगामी दिनमा थप उद्योगहरू खुल्ने र यसले जिल्लाको आर्थिक वृद्धिदरलाई अझै तीव्र बनाउने आचार्यले अपेक्षा गरे ।
६ माघ २०८२, मंगलवार
