खोज

गुल्मी, २७ साउन । 

गुल्मीमा बसाइसराइले गाउँ नै रित्तिँदै जान थालेका छन् । गुल्मी जिल्लाबाट गत आर्थिक वर्षमा करिब एक हजार १७४ घरपरिवारका चार हजार २५  जना बसाइसराइ गरी गएका छन् ।  गाउँपालिका भन्दा नगरपालिकामा पर्याप्त सुविधाहरु हुने भएता पनि मुसिकोट नगरपालिकाबाटै पनि बसाइँ सराइको दर धेरै रहेको छ ।

जिल्लाको मुसिकोट नगरपालिकाबाट गत आर्थिक वर्षमा सबैभन्दा बढी १५९ घरपरिवारका ६९६ जनाले बसाइँसराइँको प्रमाणपत्र लगेको पञ्जिकरण शाखाका प्रमुख विष्णुप्रसाद फुल्लेलले जानकारी दिए ।  गुल्मीको सदरमुकाम तम्घासमा रहेको रेसुङ्गा नगरपालिकाबाट ८२ घर परिवारका २७१ जना, मुसिकोट नगरपालिकाबाट १५९ घरपरिवारका ६९६ जना, कालीगण्डकी गाउँपालिकाबाट १११ घरपरिवारका ४१६ जना, चन्द्रकोटबाट १३७ घरपरिवारका ५६५ जना, सत्यवतीबाट १२३ घरपरिवारका ४६४ जना, रुरुक्षेत्रबाट १०३ घरपरिवारका ३५६ जना,छत्रकोटबाट ११४ घरपरिवारका ३८६ जना,गुल्मी दरबारबाट ७५ घरपरिवारका २८५ जना, धुर्कोटबाट ९० घरपरिवारका ३१९ जना, इस्माबाट ५६ घरपरिवारका १७५ जना, मालिकाबाट ५७ घरपरिवारका २१८ जना, मदानेबाट ६७ घरपरिवारका २६० जनाले बसाइँसराइँको प्रमाणपत्र लगेको स्थानीय तहका पञ्जीकरण शाखाका प्रमुखहरूले जानकारी दिएका छन् ।

यी बाहेका बसाइँ सराइको प्रमाणपत्र नलिई जानेहरूको सङ्ख्या पनि धेरै हुने गरेको छ । तर स्थानीय सरकारले भने बसाइँसराइँको प्रमाणपत्र लिएर जानेलाई मात्र आधिकारिक मान्ने गरेको छ ।
यसबिचमा जिल्लाका १२ स्थानीय तहमा २०३ घरपरिवारका  ६५१ जना बसाइँसराइ गरि आएको तथ्याङ्कमा उल्लेख गरिएको छ ।