खोज

गुल्मी , २५ साउन ।

गुल्मीमा दीर्घकालीन रूपमा योजना नबनाई सस्तो लोकप्रियताका लागि बनाइएका संरचनाहरु अहिले प्रयोगविहीन बनेका छन् ।  लामो समयदेखि सरकारी लगानीमा बनेका संरचनाहरू प्रयोगविहीन अवस्थामा रहँदासमेत सरोकारवाला निकायहरू मौन रहेका छन् भने सरकारी लगानी बालुवामा पानी भने सरह नै भएको छ ।

सरोकारवाला निकायले सरकारी संरचनाहरूलाई प्रयोगमा ल्याउने बताउँदै आए पनि बोलीमा मात्रै सीमित भएको हो  । रेसुङ्गा नगरपालिकाका नगर प्रमुख खिल ध्वज पन्थीले आफू निर्वाचित भए पछि नगरभित्रका सरकारी संरचनाहरूलाई संरक्षण र सञ्चालन गर्नु आफूहरूको दायित्व भएको बताएका थिए  । पन्थीले नगरभित्रका संरचनाहरूलाई आफूले सञ्चालन गरेरै छाड्ने उद्घोष गरेको तीन वर्ष हुँदासमेत त्यी संरचनाहरूले गुहारसमेत पाउन सकेका छैनन् ।

सदरमुकाम तम्घासमै रहेको थ्रिडी पार्कमा रेसुङ्गा नगरपालिका र लुम्बिनी प्रदेशको ५०/५० प्रतिशत साझेदारीमा ५५ लाखको लागतमा निर्माण भएको पार्क यसै प्रयोगविहीन अवस्थामा छ । त्यस पश्चात् रेसुङ्गा नगरपालिकाले पटक पटक गरी १० लाख रुपैयाँ भन्दा बढी रकम मर्मतमा खर्च गरिसकेको भए पनि उक्त पार्क बेवारिसे जस्तै भएको छ ।

सरकारलाई खबरदारी गर्ने जिल्ला प्रशासन अगाडि रहेको पहिलेको लाँकुरी मञ्चको नाम निसानै सकेर बनाइएको पार्क प्रयोगविहीन हुँदा पहिलेकै लाँकुरी मञ्चकै रूपमा अगाडि बढाउनुपर्नेमा कतिपयले जोड दिँदै आएका छन् । धार्मिक तथा पर्यटकीय क्षेत्र अर्जुनमा लुम्बिनी प्रदेश सरकार उद्योग वन  तथा वातावरण मन्त्रालयको १४ लाख ४० हजार र उपभोक्ता समितिको तर्फबाट एक लाख ४४ हजार गरि १५ लाख ८४ हजारको लागतमा सेल्फी टावर निर्माण गरिए पनि अहिले प्रयोगविहीन नै बनेको छ  ।

यस्तै सदरमुकाम तम्घासकै उनायचौरमा १३ लाख ३८ हजार ९११ रुपियाँमा निर्माण भएको  ट्रीहाउस पनि अहिले प्रयोग विहीन अवस्थामा रहेको छ । उक्त हाउसको २०७६ सालमा तत्कालीन उद्योग वन तथा पर्यटन मन्त्री लीला गिरीले तामझामका साथ उद्घाटन गरेका थिए  ।अहिले उक्त संरचना प्रयोगविहीन अवस्थामै रहेको छ ।

नागरिक समाज गुल्मीका अध्यक्ष पदम पाण्डेले राज्यको रकम खर्चेर बनेका संरचनाहरूलाई संरक्षण र सञ्चालनमा ल्याउनुपर्नेमा जोड दिए । जे उद्देश्यका साथ निर्माण भएको हो सोही अनुसार नै सञ्चालनमा ल्याउनुपर्ने उनको भनाइ छ । दीर्घकालीन रूपमा योजना नबनाई सस्तो लोकप्रियताका लागि बनाएका संरचनाहरू  अहिले गलपासो जस्तै भएको उनको तर्क छ ।

रेसुङ्गा नगरपालिका वडा नम्बर ७ का वडा अध्यक्ष तथा नगरका प्रवक्ता रामजी पन्थीले प्रयोगविहीन संरचनाहरू सञ्चालनका लागि पहल भइरहेको बताए । लामो समयदेखि प्रयोगविहीन थ्रिडी पार्कलाई सञ्चालन गर्न निजी क्षेत्रलाई दिनका लागि सूचना प्रकाशन गर्दा पनि कोही तयार नभएको उनको भनाइ छ । उनायचौरको ट्री हाउस र अर्जुनको सेल्फी टावरलाई थप मर्मत गरी जतिसक्दो छिटो सञ्चालनमा ल्याउने पन्थीले बताए ।