खोज

भैरहवा, २२ साउन ।

संघीय लोकतान्त्रिक मोर्चाले थारु र मधेसी समुदायलाई एकताबद्ध गरी रुपन्देहीमा हुने आगामी उप निर्वाचनमा संयुक्त रूपमा अगाडि बढ्ने उद्घोष गरेको छ । रुपन्देहीको सियारीमा आयोजित मोर्चाले आयोजना गरेको जनजागरण कार्यक्रममा बोल्दै मोर्चाका नेताहरूले थारु र मधेसी समुदायका हक, अधिकार र पहिचानका लागि अब एक भएर लड्नुको विकल्प नरहेको बताएका छन् ।

कार्यक्रममा मोर्चाका संयोजक तथा नेताहरूले वर्तमान राजनीतिक प्रणालीले थारु र मधेसी समुदायलाई निरन्तर उपेक्षा गरेको आरोप लगाए । उनीहरूले राज्यको संरचनामा यी समुदायको समानुपातिक प्रतिनिधित्व सुनिश्चित नभएसम्म राजनीतिक सङ्घर्ष जारी रहने बताए ।

जनता समाजवादी पार्टीका महासचिव रामकुमार शर्माले मोर्चा गठनको औचित्यबारे बताउँदै मोर्चा गठन भएपछि मात्र सरकारमा प्रतिपक्ष रहेको जनताले आभास गरेको बताए । उनले मोर्चाले मात्र सरकारलाई चुनौती दिन सकेको र यो भय सिंहदरबार सम्म पसेको दाबी गरे ।

उनले सरकारले बजेट बनाउँदा नै पार्टीले बजेट देशको लागि नभई प्रधानमन्त्री र मन्त्रीहरूको क्षेत्रलाई मात्र निर्माण भएको भन्दै चेतावनी दिएको बताए । यसले पनि सरकार व्यक्तिवाद र निरङ्कुश तरिकाले अगाडी बढेको पुष्टि भएको उनको भनाई थियो ।

उनले मधेस तराईमा रहेको जग्गाहरू पुनर्वास, राप्ती परियोजना, सुकुम्वासी लगायतको नाममा जग्गा वितरण गर्दै आएकोले भूमि विधेयक देश र मधेसको हितमा नभएको बताउँदै शर्माले भूमि सम्बन्धी भूमि सम्बन्धी विधेयकको जसपाले सधैँ विरोध गरेको बताए ।

उनले अबको लडाइँ राजनैतिक लडाइँ मात्र नभई अस्तित्वको लागि भएकोले अब आदिवासी, थारु, मुस्लिम तथा मधेसीहरू मधेसमै बस्ने या यहाँबाट विस्थापित हुने बारे समयमै साेंच्नुपर्ने समय आएको जनाए ।  कार्यक्रममा बोल्ने वक्ताहरूले थारुहट र मधेस आन्दोलनका उपलब्धिहरूलाई संस्थागत गर्नका लागि पनि एकजुट हुनुपर्नेमा जोड दिएका थिए ।

जनता प्रगतिशील पार्टीका केन्द्रीय अध्यक्ष हृदयेश कुमार त्रिपाठीले देश हाम्रो भए पनि राज्य हाम्रो भएको थारु, मधेसी जनताले महसुस गर्न नसकेको जिकिर गरे । उनले देश हाम्रो हो राज्य पनि हाम्रो हुनुपर्छ भन्ने मात्र लडाई रहेको बताए । “संविधान जारी गर्दा हामीले भौगोलिक पुनर्संरचनामा धेरै ध्यान दियौ, राज्यको पुनर्संरचना तर्फ हाम्रो ध्यान जान सकेन ।”

उनले आफूहरूले विगतमा गरेको गल्ती भन्दै सम्झिए “यसको नतिजा राज्यको चरित्र ज्यूको त्युँ रह्यो, भौगोलिक संरचना बदलिदा राज्यको पुनर्संरचना भएन ।” उनले सङ्घीय लोकतान्त्रिक मोर्चाले संयुक्त रूपमा नागरिक उन्मुक्ति पार्टीका उम्मेदवारलाई समर्थन गरेकोले यो आउँदो निर्वाचनको लागि थर्मामिटरको काम गर्ने बताए ।

यस कारण यो उप निर्वाचन गम्भीर मोडमा रहेकोले यसलाई थारु, मधेसी मुस्लिम लगायतका वर्ग एक भएर अगाडि बढ्नुपर्ने उनले धारणा राखे ।  यसै गरी राष्ट्रिय मुक्ति पार्टीका अध्यक्ष राजेन्द्र महतोले पनि पहिचानवादी मुद्दा बोकेका पार्टीहरूलाई अहिलेको ठुला ३ पार्टीले आउँदो निर्वाचनमा निर्मूल पार्ने गरी लागेको बताउँदै यसलाई जोगाउन मधेसी थारु लगायत अल्पसङ्ख्यक र सीमान्तकृत समुदाय लाग्नुपर्ने बताए ।

उनले अहिलेको सरकार आफ्नो भ्रष्ट नेता तथा मन्त्री र आफूहरूलाई जोगाउन मात्र लागेको आरोप लगाए ।  कार्यक्रमका अध्यक्ष एवं राष्ट्रिय उन्मुक्ति पार्टीका संरक्षक रेसमलाल चौधरीले पार्टीले यस क्षेत्रमा लोकप्रिय तथा स्थानीय नेतालाई टिकट दिने बताउँदै मोर्चामा आबद्ध पार्टीबाट धोका नहुने विश्वास रहेको बताए ।

“यो समर्थन स्वार्थको लागि जोडिएको समर्थन हैन, आर्सीवाद दिएर पनि भएको हैन, यो समर्थन खल्तीमा राखेको समर्थन पनि हैन ।” चौधरीले भने “यसको लागि धेरै सङ्घर्ष गरेर हातेमालो गर्न तयार भएको हौँ ।” उनले मधेसी र थारुको मिलन हुनै सक्दैन भन्नेहरूको लागि अबको रुपन्देही ३ को निर्वाचनले देखाइदिने दाबी गरे । कार्यक्रममा तमलोपाका अध्यक्ष बृशेष चन्द्र लाल कर्ण, लोसपाका लुम्बिनी  प्रदेश अध्यक्ष सन्तोष कुमार पाण्डे लगायतले बोलेका थिए ।