खोज

नेपालगन्ज, १९ साउन ।

नेपाल सरकारले बहुविवाहलाई वैधता दिने र परोक्ष रूपमा प्रोत्साहन गर्ने गरी कानुनी संशोधन गर्न लागेको भन्ने खबरप्रति बाँकेमा पनि चर्को विरोध सुरु भएको छ ।

नारी विकास केन्द्र, बाँकेले सोमबार नेपालगन्जस्थित प्रमुख जिल्ला अधिकारीमार्फत सरकारलाई ध्यानाकर्षण पत्र बुझाउँदै यसप्रति गम्भीर आपत्ति जनाएको हो । ध्यानाकर्षण पत्रमार्फत केन्द्रले बहुविवाहलाई कानुनी मान्यता दिने सम्भावित प्रयासलाई ‘पितृसत्तात्मक सोचको खतरनाक प्रवृत्ति’ भन्दै त्यसले महिलाको आत्मसम्मानमाथि गम्भीर चोट पु¥याउने चेतावनी दिएको छ ।

केन्द्रले नेपाल संविधानले महिलालाई पुरुषसँग समान अधिकार सुनिश्चित गरेको स्मरण गराउँदै महिला हिंसा र लैङ्गिक विभेदको अन्त्यका लागि प्रगतिशील कानुन निर्माण आवश्यक भएको तर्क गरेको छ ।

बहुविवाहलाई प्रोत्साहन गर्ने जुनसुकै कानुनी प्रावधान महिलामाथिको अन्याय र हिंसालाई संस्थागत गर्ने प्रयास भएको भन्दै केन्द्रले त्यसलाई तत्काल फिर्ता लिन सरकारसँग माग गरेको छ ।

ध्यानाकर्षण पत्रमा केन्द्रले बहुविवाह प्रोत्साहन गर्ने कानुनी मस्यौदा तत्काल खारेज गर्न, महिला अधिकार, समानता र न्याय सुनिश्चित गर्ने प्रगतिशील कानुन निर्माण गर्न, यस्ता प्रस्तावहरूमा सरोकारवालाहरू तथा पीडित समुदायको राय संलग्न गर्नलगायत चार वटा मुख्य मागहरू राखेको छ ।

ध्यानाकर्षण पत्र बुझाउने कार्यक्रममा नारी विकास केन्द्रमा आबद्ध महिलाहरू, महिला अधिकारकर्मीहरू तथा लुम्बिनी प्रदेशसभा सदस्य मिना श्रेष्ठको पनि उपस्थिति थियो । सो अवसरमा सञ्चारकर्मीहरूसँग कुरा गर्दै सांसद श्रेष्ठले केन्द्र सरकारले बहुविवाहलाई कानुनी स्वीकृति दिने प्रयास गरिरहेको भन्ने समाचारप्रति आफू गहिरो आपत्ति रहेको बताइन् ।

उनले भनिन्, “महिलाहरूको दसकौँ लामो सङ्घर्ष, संविधानको मर्म र सामाजिक न्यायको भावना माथि कुल्चेर यस्ता कानुनी प्रस्ताव ल्याउनु आफैमा दुर्भाग्यपूर्ण र अस्वीकार्य हो ।”

नारी विकास केन्द्रकी महासचिव मेनुका वैद्य जोशीले हस्ताक्षर गरेको ध्यानाकर्षण पत्रको बोधार्थ प्रधानमन्त्री, महिला, बालबालिका तथा ज्येष्ठ नागरिक मन्त्रालय, राष्ट्रिय मानव अधिकार आयोग र महिला आयोगलाई समेत पठाइएको छ ।

नारी विकास केन्द्रले दिएको चेतावनी केवल ध्यानाकर्षण मात्र नभएर लैङ्गिक समानता, महिला सशक्तीकरण र संवैधानिक अधिकारको संरक्षणका लागि उठाइएको सशक्त आवाज रहेको महिला अधिकारकर्मीहरूले बताएका छन् ।