खोज

गुल्मी, १५ साउन ।

पहिले कुनै विद्यालयहरूमा शिक्षकको विज्ञापन खुल्दा आवेदन दिनेको लर्को लाग्ने गर्दथ्यो । विद्यालयलाई शिक्षक छनोट गर्न पनि हम्मे हम्मे हुने गर्दथ्यो ।

शिक्षक  राखिदिनका लागि ठुलै नेतासम्मको पहुँच समेत लाग्ने गर्दथ्यो । तर अहिले भने विद्यालयले चार पटक विज्ञापन गर्दा पनि माध्यमिक तहको गणित शिक्षक पाउन सकेको छैन ।

जिल्लाको कालीगण्डकी गाउँपालिका वडा नम्बर ६ मा खडगकोटमा रहेको शुक्र माध्यमिक विद्यालयले माध्यमिक तहको सङ्घीय अनुदान गणित शिक्षकका लागि चार पटक विज्ञापन गर्दासमेत शिक्षक पाउन नसकेको विद्यालयका प्रधानाध्यापक प्रेम पुन मगरले बताए ।

पहिले कार्यरत शिक्षक घर पायक मिलाएर गएपछि नयाँ शैक्षिक सत्र सुरु भएसँगै विद्यालयमा गणित शिक्षक नभएकाले विद्यार्थीको पठन पाठनमा मर्का परेको उनले बताए ।

शिक्षकको व्यवस्था गरिदिनका लागि आफूले स्थानीय सरकार समक्ष बिन्ती   बिसाएको उनको भनाइ छ । कक्षा १० की छात्रा दीपा थापा र वर्षा थापाले नयाँ शैक्षिक सत्रबाटै गणित शिक्षक नहुँदा गणित विषय अध्ययन गर्नबाट वञ्चित भएको बताए ।

लामो समयसम्म विषय शिक्षक नहुँदा जटिल विषय नै पढ्नबाट वञ्चित भएको बताउँदै सरोकारवाला मौन रहँदा विद्यार्थीको भविष्य माथि खेलबाड भएको आफूहरुले अनुभुति  गरेको उनीहरुको भनाइ छ ।

भौगोलिक रुपले विकट भएको विद्यालयमा झन शिक्षक नहुँदा आफुहरुले थप समस्या झेल्नु परेको विद्यार्थीहरुले गुनासो गर्दै आएका छन् ।
कालीगण्डकी गाउँपालिका गुल्मीका अध्यक्ष वेदबहादुर थापाले पटक पटक विज्ञापन गर्दा पनि शिक्षक पाउन  नसकेकाले बताए ।

नेपालको शिक्षा नीति अनुसार अध्यापन अनुमतिपत्र प्राप्त ब्यक्तिले मात्रै शिक्षण गर्न सक्ने भएकाले माध्यमिक तहका लागि अध्यापन अनुमति पत्र भएका ब्यक्तिहरु कम हुने र गाउँमा भन्दा शहरमा बढी केन्द्रित हुने भएकाले समस्या भएको उनको भनाइ छ ।

भौगोलिक रुपमा विकट भएको विद्यालयका नानीबाबुहरुको पठन पाठनलाई नियमित गर्नका लागि पालिकाले योजना बनाएको बताउँदै शिक्षकको ब्यबस्था नभएसम्मका लागि भएपनि वैकल्पिक ब्यबस्था गरेरै छाड्ने उनले दाबी गरे ।

केही महिना पहिले मुसिकोट नगरपालिकामा छैटौँ पटक विज्ञापन गर्दा अन्तिम पटक शिक्षकको ब्यबस्था भएको नगरपालिकाले जनाएको छ ।