खोज

• बुटवल उपमहानगरपालिका–१५ मा मोबाइल र साइकल चोरी भएका घटनाहरू सिसी क्यामेराबाट पत्ता लगाई समाधान गरिएको छ ।

• क्यामेराबाट विकास निर्माणको अनुगमन पनि भइरहेको छ, सार्वजनिक सम्पत्ति क्षति पत्ता लाग्ने ।

  

• चालु आर्थिक वर्षमा ५२ लाख रुपैयाँ लागतमा सिसी क्यामेरा जडान  गरिएको छ ।

बुटवल, १३ साउन ।

बुटवल उपमहानगरपालिका वडा नम्बर १५ मा रहेको एक घरमा केही समय मोबाइल चोरी भयो । मोबाइल चोरेर भाग्दै गरेका ती चोरलाई गाउँका चोक चोकमा सिसी क्यामेरा थियो भन्ने जानकारी नै थिएन ।

उनी मोबाइल चोर्दै गरेर भाग्दै गरेको दृश्य सिसी क्यामेरामा कैद भयो । व्यक्तिको समेत पहिचान देखिने गरी सिसी क्यामेरामा कैद भएपछि उक्त चोर पत्ता लाग्यो । सम्बन्धित व्यक्तिले मोबाइल फिर्ता भए चोरलाई कारबाही भयो ।

केही समय पहिला बुटवल उपमहानगरपालिका वडा नम्बर १६ का एक विद्यार्थीको साइकल चोरी भयो । साइकल चोरेर लैजाँदै गरेको दृश्य पनि सिसी क्यामेरामा कैद भयो । पछि पत्ता लगाएपछि साइकल फिर्ता भयो । चोरलाई कारबाही भयो ।

यी केही प्रतिनिधि उदाहरण मात्रै हुन । बुटवल उपमहानगरपालिका वडा नम्बर १५ ले आफ्नै लागतमा वडाका विभिन्न स्थानमा सिसी क्यामेरा जडान गरेपछि पछिल्लो समयमा सार्वजनिक स्थानमा चोरीको घटनामा समेत कमी आएका छन् ।

बुटवल उपमहानगरपालिकाका वडाध्यक्ष तथा नगर प्रवक्ता समेत रहेका शिव रानाको पहलको वडाको एकल लागत सहभागितामा अहिले वडाका विभिन्न ८ स्थानमा २० वटा सिसी क्यामेरा जडान गरिएको छ ।

अध्यक्ष रानाका अनुसार चोरी नियन्त्रण सहित साँझको समयमा अन्य अनैतिक गतिविधि समेत क्यामेरामा कैद हुने भएको कारण ती गतिविधिमा कमी आएको बताउँछन् ।

यसको साथै विकास निर्माणका विभिन्न गतिविधिहरू समेत वडाको मोनिटरीङ्ग कक्षबाट हेर्न सकिने भएको कारण कुनै सार्वजनिक स्थानमा कसैले क्षति पु¥याएको विषयमा पनि जानकारी हुने गरेको बताउँछन् ।

उनी भन्छन्–‘पछिल्लो समयमा धेरै घटनामा कमी आएका छन् ।’ वडा कार्यालयबाट नै सिसी क्यामेराको मोनीटरिङ्ग हुँदै आएको छ । बुटवल उपमहानगरपालिका वडा नम्बर १५ को उजेलापुर पोखरी क्षेत्र, भेराईटीचोक क्षेत्र, मुख्य बजार क्षेत्र, सहित नवरत्न मावि क्षेत्रका सार्वजनिक स्थानमा सिसी क्यामेरा जडान गरिएको हो ।

सडक दुर्घटनाको समेत रेकर्ड विवरण समेत वडा कार्यालयमा रहेको सिसी क्यामेरामा कैद हुने भएको कारण दुर्घटनाको विश्लेषण र कारण बारेमा मूल्याङ्कन गर्नको लागि समेत प्रहरी प्रशासनलाई सहज भएको छ ।

बुटवल उपमहानगरपालिकाले पनि बुटवलको वडा नं. ४, ५, ६ र वडा नं. ९ को बसपार्क क्षेत्रमा १२५ सिसिटिभी क्यामेरा जडान गरेको छ । सिसिटिभी क्यामेरा जडानपछि बुटवल बजार थप सुरक्षित हुनुका साथै दुर्घटना न्यूनीकरणमा समेत महत्त्वपूर्ण भूमिका रहने भन्दै उनले यसले चोरी, डकैती, लुटपाट तथा अन्य अपराध अनुसन्धानमा समेत सघाउ पुग्ने विश्वास बुटवल उपमहानगरपालिकाले लिएको नगर प्रमुख खेलराज पाण्डेयको भनाइ छ ।

उपमहानगरपालिकाले आफ्नो लगानीमा हाललाई बुटवलका बढी भिडभाड हुने कालिकानगर स्थित कालिका चोक, मिलन चोक र ट्राफिक चोकमा ट्राफिक लाइट जडान गर्न लागिएको भन्दै नगर प्रमुख पाण्डेयले आगामी दिनमा आवश्यकता अनुसार अन्य ठाउँमा पनि ट्राफिक लाइट जडान गर्न सकिने बताए ।

उनले यसको समुचित उपयोगका लागि प्रहरी र ट्राफिक प्रहरीको सहकार्य जरुरी रहेकोमा जोड दिए । चालु आर्थिक वर्षको वार्षिक बजेटबाट करिब ५२ लाखको लागतमा सिसिटिभी क्यामेरा जडान गरिएको उपमहानगरपालिकाका पूर्वाधार महाशाखाले जनाएको छ ।

बुटवल उपमहानगरपालिकाले जडान गरेको क्यामेराको बुटवल उपमहानगरपालिकाले नै मोनिटरिङ्ग र व्यवस्थापन गर्दै आएको छ ।