खोज

गुल्मी, ९ साउन ।

गुल्मीमा गत वर्ष १९ जनाले नेपाली नागरिकता त्याग गरेका छन् । आर्थिक वर्ष २०८१\०८२ को एक वर्षको अवधीमा १९ जनाले नेपाली नागरिकता परित्याग गरेको जिल्ला प्रशासन कार्यालय गुल्मीले जनाएको छ ।

निमित्त प्रमुख जिल्ला अधिकारी हरिप्रसाद गैरेका अनुसार अघिल्लो आर्थिक वर्ष २०८०\०८१ मा ६८ जनाले नेपाली नागरिकता प्रमाणपत्र त्याग गरेका थिए । नागरिकता त्याग गर्ने व्यक्तिहरूको मुख्य कारण वैदेशिक बसाइ, स्थायी आवास वैवाहिक सम्बन्ध र अन्य व्यक्तिगत कारणहरू रहेका छन् ।

नेपाली नागरिकता त्याग गर्ने अधिकांश व्यक्ति विदेशमा स्थायी रूपमा बसोबास गर्दै आएका छन् । उनीहरूले त्यहाँको नागरिकता प्राप्त गरेपछि नेपाल सरकारलाई जानकारी दिँदै औपचारिक रूपमा नेपाली नागरिकता परित्याग गरेको गैरेले बताए ।

नेपालको संविधान र नागरिकता ऐनअनुसार दोहोरो नागरिकता मान्य नहुने कानूनी प्रावधान रहेको छ । जसका कारण नेपाली नागरिकता लिएपछि अन्य देशको नागरिकता लिन चाहनेले पहिले नेपाल सरकारसमक्ष नागरिकता त्याग गर्नुपर्ने कानुनी व्यवस्था छ ।

यसैअनुसार जिल्ला प्रशासन कार्यालयमा निवेदन दिएर आवश्यक प्रक्रिया पूरा गरेपछि मात्र नागरिकता त्याग स्वीकार गरिन्छ । गुल्मी जिल्लाबाट नागरिकता परित्याग गर्नेहरूमा विदेश गएका, रोजगारीका लागि गएका तथा वैवाहिक सम्बन्धबाट विदेशी नागरिक भएका व्यक्तिहरूको संख्या उल्लेख्य मात्रामा रहेको देखिनछ ।

त्याग गर्नेहरूमध्ये धेरैले अमेरिका, अष्ट्रेलिया, क्यानडा, युके, जर्मनीजस्ता विकसित मुलुकहरूको नागरिकता लिएका छन् । जनशक्ति पलायनका कारण ग्रामीण जिल्लाहरू झनै श्रमशक्ति र युवा वर्गबाट खाली हुँदै गएका छन् ।

गैरआवासीय नेपाली नागरिकता लिनेको संख्या घट्यो

गुल्मी जिल्लाबाट गैरआवासीय नेपाली नागरिकता लिनेको संख्यामा यस वर्ष कमी आएको छ ।

जिल्ला प्रशासन कार्यालय गुल्मीका अनुसार आर्थिक वर्ष २०८१\०८२ को एक वर्षे अवधिमा १८ जनाले गैरआवासीय नेपाली नागरिकता प्राप्त गरेको जिल्ला प्रशासक कार्यालय गुल्मीका प्रशासकीय अधिकृत तारानाथ फुल्लेलले बताए ।

यसअघि आर्थिक वर्ष २०८०\०८१ मा यो संख्या ४८ रहेको थियो । त्यस्तै आर्थिक वर्ष २०७९\ ०८० मा १२ जनाले गैरआवासीय नेपाली नागरिकता लिएका थिए ।