काठमाडौं ।
उज्बेकिस्तानमा जारी एएफसी महिला एसियन कप छनोट अन्तर्गत समूह एफको दोस्रो खेलमा नेपालले श्रीलंकासँग खेल्दैछ। नेपाली टोलीले पहिलो खेलमा लाओसलाई ९-० ले हराएको थियो।
नेपालले लाओसविरुद्धको खेलबाट एक परिवर्तन गर्दै सरु लिम्बुको ठाउँमा प्रीति राईलाई टिममा समावेश गरेको छ।
टिमको सुरुवाती ११ मा गोलकिपर अन्जना रानामगर छन्। डिफेन्समा समीक्षा घिमिरे, गिता राना र निशा थोकर छन्। मिडफिल्डरमा प्रीति रेनुका नगरकोटे, सरस्वती हमाल, सबिता रानामगर, अनिता बस्नेत रहेका छन् भने फरवार्डमा सावित्रा भण्डारी र रश्मी घिसिङ छन्।
नेपालले पहिलो खेलमा नयाँ कप्तान सावित्रा भण्डारीको नेतृत्वमा उत्कृष्ट प्रदर्शन गरेको थियो। उनी ४ गोल गर्दै टिमको जितमा मुख्य भूमिका निर्वाह गरेकी थिइन्।
नेपाल र श्रीलंका बीचको खेल उज्बेकिस्तानको तासकेन्तस्थित बुनयोदकोर स्टेडियममा नेपाली समय अनुसार साँझ ६ बजे सुरु हुनेछ। समूहको शीर्षस्थान हासिल गर्ने टिम सन् २०२६ मा हुने एएफसी महिला एसियन कप फुटबलका लागि छनोट हुनेछ। त्यसका साथै अन्य अन्तर्राष्ट्रिय प्रतियोगिताहरूमा सहभागिताका लागि ढोका खुल्नेछ।
