खोज

बुटवल, ६ असार । साहित्य क्षेत्रलाई रक्तदान कार्यक्रममा जोड्ने गरि बुटवलमा कविता प्रतियोगिता तथा स्रष्टा सम्मान कार्यक्रम गरिने भएको छ । स्टडी वल्र्ड एजुकेशन कन्सल्टेन्सीको सहयोगमा नेपाल स्वयंसेवी रक्तदाता समाज रुपन्देही शाखाको आयोजनामा रक्तदान अभियानलाई मद्यत मिल्ने गरि रक्तदाता अभिवृद्धि गर्ने, रक्तदान अभियानमा युवाहरुलाई प्रोत्साहन गर्ने विषयबस्तुलाई समेटेर तयार गरिएको कविताहरुको प्रतिस्प्रर्धात्मक प्रतियोगिता गरिने भएको हो ।

नेपाल स्वयंसेवी रक्तदाता समाज रुपन्देही शाखाका अध्यक्ष कृष्ण चौहान क्षेत्रीले स्वास्थ्य क्षेत्रलाई साहित्यमा जोडेर पहिलोपटक असार १४ गते शनिबार कार्यक्रम गर्न लागेको बताए । नयाँ पुस्तामा रक्तदानबारे सकारात्मक सोच विकास भइरहेको भन्दै युवाहरुलाई कार्यक्रमबाट थप हौसला मिल्ने उनले बताए । मौलिक कवितालाई प्राथमिकता दिने, साभार नभएको, ब्यक्ति, भाषा, जाती, गद्य र पद्यमा प्रस्तुत गर्न सकिने उनले बताए । साहित्य क्षेत्रमा योगदान दिएका ३ जना स्रष्टालाई समेत सम्मान गरिने भएको छ ।

कार्यक्रमको संयोजक तथा संस्थाका महासचिव प्रशन्न श्रेष्ठले नया रक्तदाता निमार्णमा युवाहरुहरुको भुमिका र योगदान विषयका कवितालाई विशेष महत्व दिने बताए । प्रतियोगिताको प्रथम पुरस्कार राशी ५ हजार, दोस्रो ३ हजार र तेस्रो स्थान हासिल गर्ने प्रतियोगीलाई नगद २ हजार रुपैया, प्रमाणपत्रबाट पुरस्कृत गरिने उनले बताए । मिलनचोक स्थित सिद्धार्थ कटेजमा हुने प्रतियोगितामा निर्णायकहरु गिरि श्रीस मगर, ईन्दिरा अर्याल, डा सन्तोष पोखरेल रहने छन ।