खोज

गुल्मी, २६ जेठ ।

जेठ १५ गते सङ्घीय सरकारले बजेट ल्याइसकेपछि यति बेला गाउँगाउँमा योजना र बजेटका बारेमा चर्चा हुन थालेको छ । केन्द्रीयदेखि स्थानीय नेताहरुले आफूहरुको पहलमा बजेट ल्याएको भन्दै सामाजिक सञ्जाल भरेका छन् भने उनीहरुबिच नै आरोप प्रत्यारोपसमेत हुँदै आएको छ ।

गुल्मी क्षेत्र नम्वर १ का सांसद डा. चन्द्रकान्त भण्डारी र पूर्व मन्त्रीसमेत रहेका प्रदीप ज्ञवाली दुवैले एउटै बजेटमा आफूहरुको पहलमा योजना समावेश भएको भन्दै जस लिने होड चलेपछि सामाजिक सञ्जाल यति बेला तातेको छ । दुबै जना नेताहरु यस क्षेत्रमा पालैपालो विजयी हुँदै आएका छन् भने हाल दुवै जना आवद्ध रहेको दल पनि सरकारमै छ ।

डा. चन्द्रकान्त भण्डारीको सचिवालयले रुद्रवेनी वामीटक्सार सडक खण्डका लागि १० करोड ६० लाख, कालीगण्डकी करिडोरका लागि एक अर्व एक लाखलगायत वामी टक्सार सडक खण्डमा पर्ने चार वटा पुलका लागि बजेट व्यवस्थापन गरेको सामाजिक सञ्जालमा पोष्ट गरे । सोही योजनाहरु आफूको पहलमा भएको भन्दै पूर्व मन्त्रीसमेत रहेका ज्ञवालीले पनि दाबी गरे ।

यस्तै इश्मा गाउँपालिकामा रहेको जीवराज आश्रित बहुप्राविधिक शिक्षालयका लागि गाउँपालिकाका अध्यक्ष भगतसिंह खडकाले आफूहरुको पहलमा बजेट ल्याउन सफल भएको भन्दै सामाजिक सञ्जालमा राखे । त्यस लगत्तै एमालेका नेता तथा कार्यकर्ताहरुले खड्काले नभइ यसक्षेत्रका सांसद गोकर्ण विष्टको पहलमा भएको बताउँदै आएका छन् ।

यता चन्द्रकान्त भण्डारीले आफूले जितेपछि नै यस क्षेत्रको विकासमा फड्को मारेको दावी गरेका छन् । त्यस क्षेत्रमा पुललगायत सडकमा बजेट आफ्नो पहलमै भएकाले अरुले जस लिनु हास्यास्पद भएको प्रतिक्रिया दिए । आफू एक वर्ष बिरामी हुँदा विकास गरेको भए हुने थियो नि, किन नगरेको भन्दै प्रति प्रश्नसमेत गर्न पछि परेनन् । आफूले यो गरे उ गरे भन्दा पनि कर्तव्य निर्वाह गरेको उनको भनाई छ ।

पूर्व मन्त्रीसमेत रहेका प्रदीप ज्ञवालीले पुराना योजनाहरुमा बजेट राखे भनेर सामाजिक सञ्चालमा पोष्ट गर्नु एकैछिनका लागि आत्म सन्तुष्ट हुनुवाहेक अरु केही नरहेको प्रतिक्रिया दिए । पाँच वर्ष पहिले कालीगण्डकी करिडोरका लागि सात अर्व बजेटको ठेक्का आफ्नो पहलमा लगाएको स्मरण गराउँदै अहिले त्यसैको निरन्तरता भएको उनको दाबी छ । पहिले ठेक्का लागेका योजनाहरुको बजेट विनियोजन नियमित भएको बताउँदै अहिले जस लिन खोज्नु उपयुक्त नहुने उनको तर्क छ । यसरी नै जस लिन खोज्ने हो भने शिक्षकहरुको तलव र सामाजिक सुरक्षा भत्ता पनि मेरो पहलमा भनेर भने भैगोनी भन्दै ज्ञवालीले प्रश्न गरे ।