खोज

गुल्मी, २८ वैशाख ।

गुल्मीमा करोडौँ मूल्य पर्ने सरकारी नम्बर प्लेटका गाडी प्रयोगविहीन अवस्थामा यसै थन्किएर बसेका छन् । लामो समयदेखि गाडी प्रयोगविहीन भएर रहँदासमेत त्यसको ब्यवस्थापनका लागि सरोकारवाला निकाय मौन रहेको पाइएको छ ।

जिल्ला समन्वय समिति गुल्मीको परिसरमा रहेका करोडौँ मूल्य पर्ने चार वटा ल्यान्डरोभर कम्पनीका गाडी यसै थन्किएर बसेका छन् । दैनिक ती गाडीले कार्यालय प्रमुख र कर्मचारी देख्छ भने कार्यालय प्रमुख र कर्मचारीले ती गाडी नदेखेजस्तो गर्ने गरेको पाइएको हो ।

जिल्ला समन्वय समिति गुल्मीको परिसरमा चार वटा गाडी यसै कुनामा थन्किएर बसेका छन् । लामो समयदेखि ती गाडी प्रयोगविहीन अवस्थामा छन् । चार वटा गाडी मध्ये दुई वटा गाडीको कार्यालयमा अभिलेख पाइन्छ भने दुई गाडी यसै बेवारिसे छन् । बेवारिसे दुई गाडी कुन कार्यालय र कसको भन्ने नै पत्तो छैन ।

चार वटा ल्यान्डरोभर कम्पनीका गाडी मध्ये बा १ झ ६६८० र ६६८१ नम्वरका गाडी मात्रै कार्यालयको अभिलेखमा रहेको सूचना अधिकारी सृजना मिश्राले जानकारी दिइन । अन्य दुई गाडी कार्यालयको परिसरमा भए पनि अभिलेख नभएको उनको भनाइ छ । उनका अनुसार अभिलेखमा रहेका दुई गाडीको पनि लामो समयदेखी नविकरण भएको पाइदैन् । बेवारिसे दुई गाडी मध्ये एउटा गाडीको नम्वर प्लेटनै छैन भने अर्कोको राम्रोसङग बुझन सकिदैन् । प्रयोगविहीन गाडीहरुको ब्यबस्थापन गर्नका लागि कार्यालयले हालसम्म कुनै चासो नै देखाएको पाइदैन् ।

बिरामी बोक्ने एम्बुलेन्स वर्षौदेखि आफैँ बिरामी

बिरामी बोक्ने गुल्मी अस्पतालका दुई वटा एम्बुलेन्स बर्षौदेखी आफैँ बिरामी भएर थलिएका छन् । लु १ झ २७९ नम्बर र लु १ झ २३५ नम्बरको एम्बुलेन्स एउटा कुनामा रहेको गुल्मी अस्पतालका सूचना अधिकारी रमेशप्रसाद पन्थीले जानकारी दिए । लिलाम बिक्री गर्नका लागि राजस्व छुट र अनुदानमा आएका एम्बुलेन्सका लागि धेरै झन्झटिलो हुने गरेकाले समस्या भएको उनको भनाइ छ । यस्तै जिल्लामा रहेका ५६ वटा एम्वुलेन्स मध्ये १८ वटा एम्वुलेन्स बिग्रिएर बसेका छन् ।

दुरसञ्चारमा डोजरको भग्नावशेष

जिल्ला दुरसञ्चार कार्यालयको भवनअगाडि एउटा डोजरको भग्नावशेष छ । गुल्मीमा दुरसञ्चार कार्यालय स्थापना कालदेखि नै उक्त डोजर उही अवस्थामा छ । हालसम्म पनि कुनै कम्पनी वा व्यक्तिले डोजरको दाबी गर्न आएका छैनन् । उक्त डोजर आफूहरुलाई निल्नु न उकेल्नु भएको कार्यालयले जनाएको छ ।

गुल्मी जिल्लाका प्रमुख जिल्ला अधिकारी जनार्दन गौतमले प्रयोगविहीन अवस्थामा रहेका गाडीको ब्यबस्थापनका लागि पहल भइरहेको बताए । लामो समयदेखी उक्त गाडीहरु नविकरण नभएकाले लिलाम बिक्रीमा समस्या रहेको उनको भनाइ छ ।

गौतमका अनुसार पहिले सवारी नविकरण नगरी लिलाम बिक्री पनि गर्न नसकिने भएकाले सम्बन्धित कार्यालयमा बजेट पनि नभएकाले समस्या रहेको छ । यसका साथै विभिन्न प्राविधिक समस्याहरु पनि रहेकाले समस्या समाधान गर्नका लागि आफूले पहल गर्दै आएको उनको दाबी छ ।