खोज

गुल्मी ,२३ वैशाख  ।

राष्ट्रिय गौरवको आयोजना कालीगण्डकी करिडोरमा कालोपत्रे गर्ने काम धमाधम भएको छ । करिडोरको गुल्मी सडक खण्ड हर्मिचौरदेखि वलेवा सडक खण्डको ४५ किलोमिटर सडकमा स्तरउन्नतीसँगै कालोपत्रे गर्ने कामले गति लिएको छ । अहिले हर्मिचौर वलेवा सडक खण्डमा ३० किलोमिटर सडक कालोपत्रे गर्ने काम सकिएको कालीगण्डकी करिडोर गौडाकोट,राम्दी मालढुङगा सडक योजना कार्यालयका सूचना अधिकारी इन्जिनियर अरुण खत्रीले जानकारी दिए । बाँकी १५ किलोमिटर सडकमा कालोपत्रे गर्ने काम भइरहेको उनको भनाइ छ । यहि गतिमा काम भएमा जेठ मसान्तसम्ममा सम्झौता अनुसारको काम सम्पन्न हुने उनले दाबी गरे ।

५५ करोड भुक्तानी बाँकी
निर्माण ब्यवसायी कालिका कन्ट्रक्सनका परियोजना ब्यवस्थापक महेस सुवेदीका अनुसार करिव ५५ करोड भुक्तानी लिन बाँकी रहेको छ । तीव्र गतिमा काम गर्दा पनि राज्यबाट भुक्तानी पाउँन नसक्नु दुःखद पक्ष भएको उनले गुनासो गरे । बिटुमिन (अलकत्र) भारतबाट ल्याउनुपर्ने हुँदा सबै नगदमा गर्नुपर्ने भएकाले पनि समस्या भएको उनको भनाइ छ । उक्त सडक खण्डमा अलकत्रकै काम भएकाले रकम भुक्तान नभएमा काम अगाडि बढाउन नसकिने उनले बताए ।

केन्द्रबाट बजेट नआएका कारण निर्माण ब्यवासायीलाई भुक्तान गर्न नसकिएको कालीगण्डकी करिडोर गौडाकोट,राम्दी मालढुङगा सडक योजना कार्यालयका सूचना अधिकारी इन्जिनियर अरुण खत्रीले जानकारी दिए । केन्द्रमा बजेट माग गरिएकाले काम नरोक्नका लागि कार्यालयले निर्माण ब्यवसायीलाई आग्रह गर्दै आएको उनको भनाइ छ ।

हर्मिचौर वलेवा खण्डको ४५ किलोमिटर सडक स्तरउन्नतीसँगै कालोपत्रे गर्ने कार्य कालिका कन्ट्रक्सनले गरेको छ । कुल तीन अर्व ३३ करोडको लागतमा सम्पन्न हुने उक्त सडकको करिव ९५ प्रतिशत भन्दा बढी भौतिक प्रगति भइसकेको खत्रीले बताए । कार्यालय र निर्माण ब्यवसायीबीच २०७९मङसिर २६ गते सम्झौता भई २०८२ मङसिर २५ गते सम्पन्न गर्नुपर्ने उल्लेख छ ।

चट्टानसहितको भीर चार वर्ष पहिले नेपाली सेनाले बम विष्फोट गरी खोलेका ट्याक अहिले कालोपत्रेको काम भइरहेको छ । रिडी हर्मिचौर सडक खण्डको २१ किलोमिटर सडक कालोपत्रे गर्ने कार्य सम्पन्न भएको र हस्तान्तरणको कार्य बाँकी रहेको सूचना अधिकारी इन्जिनियर अरुण खत्रीले जानकारी दिए । ६२ करोड ३६ लाखको लागतमा २०७७ साल भदौ १४ गते सम्झौता भई २०८१ साउनमा सम्पन्न गर्ने गरी शर्मा सगुन जेभीले उक्त कार्य गरेको खत्रीले बताए ।