खोज

गुल्मी,१८ वैशाख ।

पछिल्लो समय गुल्मीमा आगलागीका घटनाहरु वृद्धि हुँदै गएका छन् । पछिल्लो चार आर्थिक वर्षको तथ्याङक अनुसार जिल्लामा ५७० वटा आगलागीका घटनामा १६ जनाको मृत्यु भएको छ भने १० करोड बढीको क्षती भएको पाइएको छ ।
जिल्ला प्रहरी कार्यालय गुल्मीका प्रहरी नायव उपरीक्षक गंगाबहादुर सुारुका अनुसार आथिक वर्ष २०७८/०७९ मा ६९ वटा घटनामा तीन जना पूरुषको मृत्यु भएको छ भने दुई जना घाइते भएका छन् । आर्थिक वर्ष २०७९/०८० मा १२६ वटा आगलागीका घटनामा दुई जना पूरुष,एक बालक र तीन जना ज्येष्ठ नागरिक गरी छ जनाको मृत्यु भएको छ भने छ जना घाइते भएका छन् । आर्थिक वर्ष २०८०/०८१ मा २८४ वटा आगलागीका घटनामा परी दुई जना महिला, एक जना पूरुष,एक जना बालक र एक जना ज्येष्ठ नागरिक गरी पाँच जनाको मृत्यु भएको छ भने २३ जना घाइते भएका छन् । चालु आर्थिक वर्षको हालसम्म जिल्लामा ९१ वटा आगलागीका घटनामा एक जना महिला र एक जना बालक गरी दुई जनाको मृत्यु भएको छ भने छ जना घाइते भएका छन् ।

१३२ घर र १८७ गोठ जले
सोही समय अवधिमा १३२ वटा घर र १८७ गोठ जलेर नष्ट भएका छन् । सोही समय अवधिमा तीन वटा सरकारी कार्यालयमा पनि आगलागीका घटना भएको जिल्ला प्रहरी कार्यालय गुल्मीले जनाएको छ । उक्त समयमा आठ वटा सवारी साधनमा पनि आगलागीका कारण क्षती भएको छ । चार वर्षको अवधिमा आगलागीका कारण २६० पशुचौपाय मरेका छन् भने ९३ घाइते भएको जिल्ला प्रहरी कार्यालय गुल्मीको तथ्याङकमा उल्लेख छ ।

१० करोड बढीको क्षती
गुल्मीमा आगलागीका कारण दश करोडभन्दा बढीको क्षति भएको छ । आव २०७८/०७९ देखी २०८१/०८२ को हालसम्म यस जिल्लामा आगलागीका ५७० घटना हुँदा दश करोड ३० लाख ४७ हजार ७०० रुपियाँ बराबरको क्षति भएको पाइएको जिल्ला प्रहरी कार्यालय गुल्मीले जनाएको छ ।

दमकल खरिद गर्ने निर्णय मात्रै सीमित
२०७७ साल वैशाखमा जिल्ला प्रशासन कार्यालय गुल्मीमा तत्कालिन प्रमुख जिल्ला अधिकारी भरत शर्माको अध्यक्षतामा जिल्ला विपद् ब्यबस्थापन समितिको बैठकले जिल्लामा स्थानीय तहहरुको समन्वयमा दमकल खरिद गर्ने निर्णय भयो । सकेसम्म एक्लै र नभए पायक पर्ने दुई स्थानीय तहले एक दमकल खरिद गर्ने निर्णय भएपनि उक्त निर्णय निर्णयमा मात्र सीमित भएको छ । जिल्लामा रेसुङगा नगरपालिकामा मात्र एउटा दमकल छ रहेको छ ।

प्रमुख जिल्ला अधिकारी जनार्दन गौतमले दमकल खरिद गर्ने निर्णय ए पनि कार्यान्वयन भने गर्न नसकेको स्वीकार गरे । आफूहरुसँग बजेट नहुने र स्थानीय तहसँग समन्वय गर्नुवाहेकको विकल्प नरहेको उनको भनाइ छ । आगलागीका घटनाहरुलाई न्यूनीकरण गर्नका लागि सुरक्षा निकायले विभिन्न समयमा डेमो प्रस्तुती गर्दै आएका छन् भने डिभिजन वन कार्यालयले सचेतनामूलक कार्यक्रमहरु गर्दै आएको जनाएका छन् ।

डिभिजन वन कार्यालय गुल्मीका नायव सुब्बा मेघलाल पाण्डेका अनुसार आगोलागीलाई नियन्त्रणमा लिनमा लागि जिल्लाका सुरक्षा निकायलाई अग्नी नियन्त्रक उपकरणहरु प्रदान गर्ने र सञ्चार माध्यमहरुमा सूचनामूलक सन्देशहरु प्रशारण गर्दै आएको छ । यता जिल्ला समन्वय प्रमुख दोर्णबहादुर खत्रीले दमकल खरिदमा आफूले समन्वय गर्ने बताएका छन् । आफू तत्कालिन समयमा चन्द्रकोट गाउँपालिकाको अध्यक्ष हुँदा भएको निर्णय कार्यान्वयन गर्न नसकिए पनि अहिले समन्वय गर्ने उनको भनाइ छ ।