खोज

गुल्मी,१६ वैशाख ।

गुल्मीमा २९ जना शिक्षकहरुले राजीनामा दिएका छन । शिक्षा विकास तथा समन्वय इकाई गुल्मीका प्रमुख थानेश्वर घिमिरेका अनुसार गत साउन १ गतेदेखी हालसम्म २९ जना शिक्षकले राजीनामा दिएका छन् । प्राथामिक तहमा २५ जना, निम्न माध्यमिक तहमा दुई जना र माध्यमिक तहमा दुई जना गरी कुल २९ जना शिक्षकको राजीनामा स्वीकृत भएको छ ।उदय माध्यमिक विद्यालय चन्द्रकोटका माध्यमिक तहमा अध्यापन गराउने भिमबहादुर थापा र जनबोध माध्यमिक विद्यालयमा गणित विषय अध्यापन गराउने गीता भण्डारीले राजीनामा दिएका हुन् ।

थापाले बिरामी भएर र भण्डारीले तथ्याङक अधिकृतमा नाम निकालेर राजीनामा दिएको घिमिरे बताए । यस्तै २८ जना शिक्षकको अनिवार्य अवकास भएको पनि उनले बताए । पछिल्लो समयमा शिक्षण पेशामा त्यती रुचि नहुँनु र वेदैशिक रोजगारीको लहरले पनि राजीनामा दिनेहरुको सङख्यामा वृद्धि हुँदै गएको घिमिरेले बताए । राजीनामा दिनेमा करिव आधाको सङख्यामा वैदेशिक रोजगार रहने गरेको उनको भनाइ छ ।

नागरिक समाज गुल्मीका अध्यक्ष पदमप्रसाद पाण्डेले विद्यालयहरु राजनीतिक अखडा बन्नु, शिक्षकहरुलाई जीवन निर्वाह गर्न पनि समस्या हुनु, शिक्षण पेशामा भविष्य नदेख्नु र निजामती सेवा सरह राज्यले हेर्ने दृष्टिकोण नहुनुले पनि शिक्षण पेशाबाट राजीनामा दिने गरेको तर्क गर्छन् । यहि अवस्था कायमै रहेमा भविष्मा शिक्षण पेशामा संकट देखा पर्न सक्ने उनको भनाइ छ ।

गणित, अँग्रेजी र विज्ञानका शिक्षक अभाव
गुल्मीमा गणित, अँग्रेजी र विज्ञानका शिक्षक अभाव देखिएको छ । धुर्कोट गाउँपालिकाले पालिका भित्रका विद्यालयहरुमा राहत र अनुदानका लागि गणित र विज्ञान विषयमा तेस्रो पटक विज्ञापन गरेको छ । धुर्कोट गाउँपालिका ६ को धुर माध्यमिक विद्यालयमा गणित र वडा नम्वर ३ को निन्युखर्क माध्यमिक विद्यालयमा विज्ञान शिक्षकका लागि तेस्रो पटक विज्ञापन गरिएको हो ।

मुसिकोटले छैटौँ पटकमा पायो शिक्षक
केही महिना पहिले जिल्लाको मुसिकोट नगरपालिकाको मुसिकोट माध्यमिक विद्यालय र जनज्योती माध्यमिक विद्यालयका लागि माध्यमिक तहमा गणित शिक्षकका लागि छैटौँ पटक विज्ञापन गर्दा मुस्किलले शिक्षक पाएको थियो । यस्तै शिवशङकर माध्यमिक विद्यालयका लागि अङग्रेजी शिक्षकका लागि पनि छैटौँ पटकमा शिक्षक पाएकोे नगरपालिकाका शिक्षा शाखा प्रमुख प्रकाश नेपालीले जानकारी दिए । यस्तै सोही नगरपालिकाको ददल्का माध्यमिक विद्यालयका लागि पनि गणित शिक्षकका लागि तेस्रो पटक ,नेपाल राष्ट्रिय माध्यमिक विद्यालय र सीतापुर माध्यमिक विद्यालयका लागि माध्यमिक विज्ञान राहतमा मुस्किलले शिक्षक पाएको उनले बताए ।

नेपालको शिक्षण पेशामा भविष्य नदेखेका कारण वैदेशिक यात्रामा जानु र शिक्षण पेशामा सम्मान नहुनुका साथै निजामति सेवा सरह राज्यले हेर्ने दृष्टिकोण नहुँनु पनि अर्को समस्या रहेको नेपालीले बताए । लाइसेन्स नभएकालाई शिक्षामा प्रवेशमै रोक लगाइनु र लाइसेन्स भएका ब्यक्ति नपाइने गर्दा राज्यको नीतिमै समस्या रहेको उनको भनाइ छ । गुल्मीमा सामुदायीक र संस्थागत गरी ५९० विद्यालय र ५६ हजार २०३ विद्यार्थी सङख्या रहेको शिक्षा विकास तथा समन्वय इकाइ गुल्मीले जनाएको छ । जिल्लामा बालशिक्षादेखी कक्षा १२ सम्मका विद्यालयमा राहत र दरबन्दी गरी तीन हजार १५३ जनाको दरबन्दी रहेको कार्यालयले जनाएको छ ।