खोज

जितपुर (कपिलवस्तु), ९ मंसिर ।

१५ औँ कपिलवस्तु महोत्सव अन्तर्गत १३ औं कपिलवस्तु डान्स आइडलको पहिलो चरणको अडिसन शनिबार सुरु भएको छ । कपिलवस्तु उद्योग वाणिज्य संघको सभाहलमा भएको अडिसनमा २५ जना प्रतियोगीले प्रस्तुति राखेका थिए । आयोजकले अडिसनको पहिलो चरणबाट ६ जनालाई प्रमाणपत्रसहित विदाई गरेको जानकारी दिएको छ ।

दोस्रो चरणको अडिसन मंसिर १४ गते

डान्स आइडलका मुख्य निर्णायक हरिशरण रिजालका अनुसार दोस्रो चरणको अडिसन मंसिर १४ गते हुने छ। यसमा पहिलो चरणका सहभागीहरूका साथै केही नयाँ प्रतिभाहरू पनि सहभागी हुने छन् ।

प्रतियोगितामा १५ उत्कृष्ट प्रतिभा छनोट गर्ने योजना

आयोजकले अडिसनका विभिन्न चरणमार्फत १५ उत्कृष्ट प्रतिभा छनोट गरी मुख्य प्रतियोगितामा प्रस्तुत गर्ने योजना बनाएको छ । यस वर्ष प्रतियोगितालाई थप प्रभावकारी बनाउन नवीन अभ्यासहरू पनि समावेश गरिने छ ।

विजेतालाई १ लाख ११ हजार नगदसहित चाँदीको ट्रफी
प्रतियोगिताका विजेताले नगद १ लाख ११ हजार १११ रुपैयाँसहित चाँदीको ट्रफी प्राप्त गर्नेछन् । उपविजेता र तृतीय स्थान हासिल गर्नेले क्रमशः ७७ हजार ७७७ र ५५ हजार ५५५ रुपैयाँ प्राप्त गर्ने छन् । साथै, सान्त्वना पुरस्कार पाउनेलाई २५ हजार ५२५ रुपैयाँ, ट्रफी र गिफ्ट ह्याम्पर दिइने छ । १५औँ कपिलवस्तु महोत्सव कृषि, पर्यटन र औद्योगिक प्रदर्शनीका साथ मंसिर १९ देखि पुष २ सम्म बुद्ध रंगशालामा आयोजना हुँदैछ ।