खोज

नवलपुर, २ असोज ।

गण्डकी प्रदेशका मुख्यमन्त्री सुरेन्द्रराज पाण्डेले सुरुङ्ग मार्गहरुको निर्माण मार्फत पोखरा र नवलपुरबीचको दुरी घटाउनका लागि आवश्यक अध्ययन सुरु भएको बताएका छन् ।

मंगलबार नवलपरासी पूर्वको मध्यविन्दु नगरपालिकाको स्थापना दिवस कार्यक्रमलाई सम्बोधन गर्दै उनले हाल पहाडी क्षेत्रमा सडक निर्माण कार्यहरु भइरहेको भएपनि सुरुङ्ग मार्गहरु निर्माण हुन सक्दा प्रदेश राजधानी पोखरा, नवलपुर र देशको प्रमुख राजमार्गसंग दुई घण्टाको दुरीमा जोड्न सक्ने प्रारम्भिक अध्ययनहरुले देखाएको बताए ।

त्रिवेणी कोरोला सडक खण्डको महत्वपूर्ण खण्डको रुपमा रहेको दुम्कीबास–त्रिवेणी सडक निर्माणलाई पहिलो प्राथमिकतामा राखेर काम गरिरहेको उनले बताए । वन र निकुञ्ज ऐनका कारण सडक निर्माण प्रभावित भएको भन्दै जग्गा प्राप्तीको अधिकार प्रदेश सरकारलाई प्रदान गर्नुपर्नेमा उनले जोड दिए।
नवलपुरको लोकाहमा औद्योगिक ग्राम स्थापनाका लागि प्रदेश सरकारले योजना अगाडि बढाएपनि केन्द्र सरकारले जग्गाको अधिकार नदिँदा अपेक्षित काम अगाडि बढ्न नसकेको बताए ।

गण्डकी प्रदेश सरकारले सञ्चालन गर्दै आएको मुख्यमन्त्री नवप्रवर्तन कार्यक्रममा लगातार तिन वर्ष छनोट हुने एक मात्रै नगरपालिकाको रुपमा मध्यविन्दु नगरपालिका छनोट भएकोमा शुभकामना दिंदै पाण्डेले लगातार कार्यक्रममा छनोट हुनुले मध्यविन्दु नगरपालिकाले कसरी काम गरिरहेको छ भन्ने विषयको मूल्याङ्कन गर्न सकिने बताएका छन।