खोज

बुटवल,२९ जेठ ।   भैरहवाका व्यवसायीहरुले चीन सरकारका मन्त्रीसंग गौतमबुद्ध विमानस्थलमा चिनिया एअरलाइन्स कम्पनीको नियमित उडानका लागि सहजिकरण गरिदिन माग गरेका छन् ।

सिद्धार्थ उद्योग बाणिज्य संघले लुम्बिनी भ्रमणमा आएका चीनका राष्ट्रिय धार्मिक साँस्कृतिक मामिला प्रशासन मन्त्री छेङ रुइफेङलाई अनुरोधपत्र बुझाउंदै यस्तो माग गरेको हो ।

विमानस्थल पूर्ण क्षमतामा चल्छ भन्ने विश्वासमा भैरहवा र आसपासका क्षेत्रमा व्यवसायीहरुले ऋणधन गरेर होटल र पर्यटन व्यवसायमा अर्बौं लगानी गरेपनि अन्तर्राष्ट्रिय उडान पर्याप्त नहुंदा लगानी डुब्ने जोखिम भएकाले चिनिया मन्त्रीसंग उडानका लागि लिखित अनुरोध गरिएको संघका अध्यक्ष ठाकुरकुमार श्रेष्ठले बताए ।

अन्तर्राष्ट्रिय उडान पर्याप्त नहुंदा व्यवसाय चलायमान हुन नसक्दा दर्जनौं व्यवसायीहरु आर्थिक संकटमा परेकाले यसमा गम्भीर बनिदिन अध्यक्ष ठाकुरले चिनिया मन्त्रीसंग विशेष अनुरोध गरेको बताए ।

करोडौंको संख्यामा रहेका चीनका बौद्ध धर्मावलम्बीहरुलाई सहजरुपमा बुद्ध जन्मस्थल लुम्बिनीमा आउन चिनिया एअरलाइन्सको नियमित उडान जरुरी हुने भएकाले मन्त्री रुइफेङलाई लिखित अनुरोधपत्र बुझाइएको अध्यक्ष श्रेष्ठले बताए ।

संघले बुद्ध जन्मस्थल लुम्बिनीमा बर्थिङ अस्पताल लगायत कृषि र पर्यटन क्षेत्रमा लगानीका लागि चिनिया लगानीकर्तासंग सहजिकरण गरिदिन पनि चिनिया मन्त्री रुइफेङलाई अनुरोध गरेको अध्यक्ष श्रेष्ठले बताए ।

अनुरोधपत्र बुझेपछि मन्त्री रुइफेङले नेपाल सरकारले नीतिगत सहजिकरण गरेमा लुम्बिनी क्षेत्रमा लगानी गर्न चिनियाहरु तयार रहेको बताउंदै नियमित हवाई उडानका लागि समेत आफूले विभागीय मन्त्रालयसंग समन्वय गर्ने आश्वासन दिएका अध्यक्ष श्रेष्ठले बताए ।

गौतमबुद्ध विमानस्थलमा अन्तर्राष्ट्रिय उडानहरु नियमित र पर्याप्त मात्रामा नहुंदा तारे होटेलसहित पर्यटन क्षेत्रमा भएको ५० अर्ब बढी लगानी जोखिममा परेको  अध्यक्ष श्रेष्ठले बताए ।

चीनबाट नियमित अन्तर्राष्ट्रिय उडानका सम्बन्धमा चिनियाँ मन्त्री रुइफेङको आश्वासनबाट होटल तथा पर्यटन व्यवसायीहरु आशावादी भएको तर यसलाई छिटो मुर्तरुप दिन सरकारले पनि उच्चस्तरीय पहल गर्नुपर्ने लुम्बिनी होटल संघका अध्यक्ष गोबिन्द ज्ञवालीले औंल्याए ।

विमानस्थल राम्रोसंग चल्दा मात्र यस क्षेत्रमा भएको अर्बौं लगानीले प्रतिफल दिन सक्ने भएकाले जुनुसुकै मूल्यमा विमानस्थल पूर्ण क्षमतामा चल्नुपर्छ भन्ने अभियानमा यहांका निजी क्षेत्रहरु एक ठाउंमा रहेको सिद्धार्थ सञ्जाल रुपन्देहीका अध्यक्ष अनिलकुमार ज्ञवालीले बताए ।

त्यसअघि मन्त्री रुइफेङले नेपाल चीन मैत्री समाज लुम्बिनी र लुम्बिनी विकास कोषका पदाधिकारीसंगको भेटमा बुद्धजन्मस्थल लुम्बिनीलाई केन्द्रमा राखेर आगामी दिनमा गर्न सकिने सहकार्य, चिनियाँ विहार मार्फत लुम्बिनीको पर्यटन प्रवद्र्धन एव्म नेपाल र चिनको साँस्कृतिक सम्बन्ध दिगो बनाउन आफू सकारात्मक रहेको बताएका थिए ।

मन्त्री रुइफेंङले मायादेवी मन्दिरको दर्शन, अशोक स्तम्भ, पुष्करणी पोखरी, शान्ति दीपको भ्रमण गर्दै लुम्बिनीबारे जानकारी लिएका थिए ।
मन्त्री रुइफेंङसँगै नेपालका लागि चिनियाँ राजदुत छेङ सोङ्, चिनको राष्ट्रिय धार्मिक मामिला प्रशासनका धार्मिक मामिला ब्यूरो प्रमुख हुआंग झिहुई लगायत भ्रमणमा आएका हुन् । एक दिने भ्रमण सकेर चिनिया टोली बुधबार नै फर्केको छ ।