खोज

नवलपुर, ४ बैशाख ।

अर्काको सहयोगको मुख ताक्ने अवस्था र परम्पराको बेवास्ता गर्दै पुर्वी नवलपरासीको बुलिङटार गाउँपालिका वडा नं. २ भाँगबारीका स्थानीय वासीहरु श्रमदान मार्फत पाँच बर्षदेखि संचालनमा नआएको पुरानो सडक मर्मत र सम्भार गरी संचालनमा ल्याउन लागि परेका छन् ।

गाउँमा रहेका सडकहरु पुरानो र जीर्ण अवस्थामा भएकाले स्थानीयबासीहरु श्रमदानबाटै भाँगबारी टाँडी मोटरबाटोको मर्मत सम्भारमा लागेका बुलिङ्टार २ का चिरन मगरले बताए । सांघुरो सडक र ठाउं ठाउंमा भत्किएको पाँच बर्षदेखि कसैबाट पनि सहयोग नपाएपछि अहिले सो पाँच किलोमिटरको कच्ची सडक मर्मत सम्भारमा गाउँलेहरु श्रमदान मार्फत लागि परेको मगरले बताए ।

सधै अर्कोको सहयोगको मुख ताक्नुभन्दा आफै श्रमदान गरेर स्थानीयबासी वडा कार्यालय सम्म सडक मर्मतको काममा जुटेका बुलिङ्टार २ का वडा सदस्य कौशिला नेपालीले बताईन् । सो बाटो मर्मतमा गाउँपालिका, प्रदेश सरकारको सहयोग पाउने आशामा चार बर्ष बित्यो तर सहयोग नपाए पछि अहिले एक सय घरका बासिन्दाले आफै श्रमदान गरेर बाटो मर्मत सम्भार गर्न थालेपछि स्थानीयमा समेत खुशी छाएको वडा नं. २ का पुर्व वडाध्यक्ष प्रेमबहादुर थापा मगरले बताए ।

सो गाउँको सडक निर्माणका लागि प्रत्येक घरधुरीबाट एकएक जना गरी दैनिक एक सय जनाले दश दिन देखि श्रमदान गरिरहेका र सो कार्यमा नआउने व्यक्तिलाई जनही रु पाँच सयका दरले जरिवाना समेत लिने गरिएको स्थानीय बेल बहादुर राना मगरले बताए ।

बाटो, विद्यालय, पुल पुलेसाहरु लगायतका विभिन्न विकास निर्माणका कार्यहरुमा स्थानीय स्वयम् लागिपरेका यो उदाहरणले सबैलाई एक पटक सोच्न र अर्कोको मुख ताक्ने कामले मात्र पनि समाज अगाडि बढ्दैन भन्ने उदाहरण बनेको भाँगबारी गाउँका स्थानीय बुलिङटार २ का पुर्व वडाध्यक्ष थापा मगर बताउँछन् ।

स्थानीयबासी नमुनाको रुपमा सो गाउंको बाटो निर्माणका लागि जुटेका र श्रमदानबाटै बर्षभरि यातायात सञ्चालन गरिने लक्ष्य रहेको स्थानीय दिपेश रानामगरले बताए । यो बाटो निर्माण भए पछि वडा कार्यालय जान आउन छोटो दुरी पर्ने भएकाले पनि स्थानीय श्रमदान गरेर यो बाटो सँचालनमा लागेका स्थानीय समाजसेवी भीमबहादुर मगरले बताए ।