खोज

बुटवल, ३ बैशाख । जिल्लाको तिनाउ गाउँपालिका–२, नुवाकोटमा कर्णेल उजिर सिंह थापाको पूर्णकदको मूर्ति अनावरण गरिएको छ । नेपाली सेनाले अंग्रेजमाथि विजयी हासिल गरेको ऐतिहासिक स्थल नुवाकोटमा कर्णेल उजिर सिंह थापाको पूर्णकदको मूर्ति अनावरण गरिएको हो ।

एक समारोहका बिच मध्यपश्चिम हेड क्वाटरका पृतनापति उपरथि सुनिल श्रेष्ठ, श्री नं. २२ बाहिनी अड्डाका बाहिनीपति सहायक रथि ललित बहादुर कुवँर, रुपन्देही जिल्लाका प्रमुख जिल्ला अधिकारी गणेश अर्याल, श्री सैनिक ब्याटल स्कुलका शिक्षाधिकृत सहायक रथि कृष्ण जिसी, साईन रेसुङा बैकका सिईओ प्रकाश पौडेल तथा बुटवल उपमहानगर र तिनाउ गाउपालिकाकाका जनप्रतिनिधिहरुको सहभागीतामा मूर्ति अनावरण गरिएको हो ।

बुटवलको जितगढी र पाल्पाको नुवाकोटलाई जोडेर सामरिक र पर्यटकीय गन्तव्यका रुपमा विकास हुने गरि पूर्वाधार विकासमा भैरहेको बुटवल उपमहानगरपालिकाका नगरप्रमुख खेलराज पाण्डेले बताए । नुवाकोटमा प्रतिमा र पार्क निर्माण यहाको ईतिहासबारे अध्ययन अवलोकन गर्ने स्थलका रुपमा विकास गर्नुपर्ने उनले बताए ।

युद्धमा प्रयोग भएको यो मार्ग नुन बोक्ने बाटो समेत भएको भन्दै ऐतिहासिक मार्ग निमार्णपछि अहिले महत्वपूर्ण काम भएको तिनाउ गाउँपालिका अध्यक्ष प्रेम श्रेष्ठले बताए । युद्धमा नेतृत्व गरेका उजिरसिह थापाको योगदान स्वरुप मूर्ति राख्न सफल भएको उनले बताए । यस क्षेत्रको विकासबाट स्थानीय बासिन्दाको जीवनस्तर माथि उठ्न सहयोग मिल्ने उनले बताए ।

कार्यक्रममा श्री गरुड दल गणका गणपति प्रमुख सेनानी दिपेन्द्र न्यौपानेले नेपाली सेनाले जनहितको कार्य गर्ने नीति अनुसार प्रदेश र स्थानिय सरकारको सहकार्यमा गढी, किल्ला तथा पदमार्ग संरक्षण र संवद्धन गर्ने निति अनुसार काम गर्दै आएको बताए । तिनाउ गाउँपालिका, नेपाली सेना र साईन रेसुंगा बैंकको सहकार्यमा करीब १५ लाख रुपैया लागतमा उजिरसिह थापाको पुर्णकदको मुर्ति स्थापना सम्पन्न गर्न सफल भएको उनले बताए । यसअघि जितगढी –नुवाकोट सिढि मार्ग निमार्ण समेत गरेको थियो । अग्रेज सेनालाई पराजित गरेको बुटवलको जितगढी किल्ला र नुवाकोट गढीसंगै लुम्बिनी प्रदेशका अन्य धेरै सामरिक महत्व भएका स्थलको संरक्षणमा पूर्व पृतनापति उपरथि याम प्रसाद ढकालको परिकल्पना रहेको थियो ।