खोज

बुटवल, ५ चैत । आर्थिक समस्याकै कारण आफुहरु पलायनको अवस्थामा पुग्दासमेत देशका राजनीतिक नेतृत्वबाट समाधानको पहल नगरेको भन्दै रुपन्देहीका होटल ब्यवसायीहरुले आन्दोलनको घोषणा गरेका छन । कोभिड संक्रमणबाट उकासिन लागेको पर्यटन ब्यवसाय आर्थिक समस्याकै कारण पछिल्लोसमय पलायनको अवस्थामा पुगेको होटल तथा रेष्टुरेन्ट ब्याबसायी संघ रुपन्देहीका अध्यक्ष लेखनाथ भण्डारीले बताए । ‘हामीहरु अब आन्दोलनको तयारीमा छौ ।’—उनले भने । पटकपटक अनुरोध र आग्रह गर्दा सुनुवाई नभएपछि आन्दोलनमा उत्रनुपरेको उनले बताए । रुपन्देहीको पर्यटन विकासमा टेवा पुग्ने पुर्वाधार संचालन गर्नेतर्फ सरकारको ध्यान जानुपर्ने उनको तर्क छ ।

होटल तथा रेष्टुरेन्ट ब्याबसायी संघ रुपन्देही शाखाको बाह्रौं नियमित बैठकबाट बुटवल बजार चलायमान गराउन विभिन्न अन्तरक्रिया, घर भाडामा बसोबास गर्ने आम नागरिकहरुसहितको आन्दोलन गर्ने निर्णयहरु भएको संघका वरिष्ठ उपाध्यक्ष माधव खनालले बताए । यसैगरि चैत १७ गते संघको अगुवाईमा बिरोध रयाली गरिने उनले बताए । महँगो घरभाडा, चर्को बैंक ब्याजदर, घरबहाल नीति, अन्तराष्ट्रिय बिमानस्थलको पुर्णरुपमा संचालन, अन्तराष्ट्रिय सम्मेलन केन्द्रको पुर्ण रुपमा संचालन र बजार चलायमानको लागि रात्रीकालीन बजार लगायतका बिषयमा प्लेकार्ड सहितको राजमार्ग चौराहा देखि ट्राफिकचोकसम्म बिरोध रयाली तथा कोणसभा गरिने उनले बताए ।

यसैगरि बैठकबाट चैत ९ गते बुटवलमा रात्रिकालिन बजारको आबश्यकता र अवसरका बिषयमा संघका महासचिव अर्जुन थापाको संयोजकत्वमा बनेको अवधारणा पत्रका बिषयमा छलफल तथा सुझाव संकलन गरिने भएको छ । रात्रीकालिन बजार कार्यान्वयनको निम्ति सरोकार निकाय, संघसस्था, संघका सल्लाहकार सहितको छलफल कार्यक्रम गरि सल्लाहसुझाव संकलन भएको संघका महासचिव अर्जुन थापाले बताए । चैत ११ गते संघको सभाहलमा होलिमिलन कार्यक्रम तथा चैत २४ गते संघको २३ औ साधारण सभा समेत गर्ने निर्णय भएको छ ।