खोज

बुटवल, २२ फागुन । होटल तथा रेष्टुरेण्ट व्यवसायी संघ रुपन्देहीको भेलाबाट गमला नेपालको अध्यक्षतामा २७ सदस्यीय महिला उपसमिति गठन भएको छ । सोमबार बुटवलमा भएको महिला ब्यवसायीहरुको भेलाले उपसमितिको उपाध्यक्ष कबिता थापा, मिना अधिकारी बेल्बासे, बिनिता पराजुली, सचिव राधा न्यौपाने, कोषाध्यक्ष अम्बिका पाण्डे, सहसचिव मिना बश्याल, सहकोषाध्यक्ष रेनु खनालसहितको २७ सदस्यीय समिति गठन गरेको हो ।

नवनिर्वाचित अध्यक्ष नेपालले महिलाको नाममा दर्ता भएका धेरै होटल ब्यवसाय भएपनि नेतृत्वमा आउन नसकेको अवस्थामा उपसमितिमार्फत अगाडी बढ्न मद्यत मिल्ने बताईन । अन्य पेशाभन्दा फरक र पर्यटन क्षेत्रसंग जोडिएको हुदा पनि महिलाहरुको भुमिका धेरै हुने उनले दाबी गरिन । घरभित्र काममा ब्यस्त रहने महिला शसक्तिकरणको पाटामा समेत मद्दत मिल्ने गरि सेवा ब्यवसायमा महिलाहरुको उपस्थिती बढ्दो रहेको उनले बताईन ।

कार्यक्रममा होटल तथा रेष्टुरेण्ट व्यवसायी संघ रुपन्देहीमा अध्यक्ष लेखनाथ भण्डारीले संघमा धेरै महिलाहरुको नाममा दर्ता धेरै प्रतिष्ठानहरु रहेको भन्दै अब उनिहरुलाई नेतृत्व विकासमा अगाडी बढाउने गरि पहल थालेको बताए । महिलाहरुको नाममा दर्ता भएका ब्यवसायलाई सरकारबाट छुटको ब्यवस्था गरिनुपर्ने उनले माग गरे ।

कार्यक्रममा संघका निर्वमान अध्यक्ष रामप्रसाद गौतम, उपाध्यक्ष प्रेम भट्टराई, महासचिव अर्जुन थापाले होटल ब्यवसायमा देखिएको आर्थिक समस्या समाधान गर्न सरकार पक्षबाट आवश्यक पहल जरुरी रहेको बताए । कार्यसमिति सदस्य धना शर्मा पौडेलको संयोजकत्वमा सोमबार संघको सचिवालयमा बैठक बसेको थियो । संघमा आवद्ध मध्ये २४८ प्रतिष्ठानहरु महिलाको नाममा दर्ता भएका छन ।