खोज

नेपालगञ्ज, फागुन ५ । मधेश प्रदेशको राजधानी जनकपुर र लुम्बिनी प्रदेशको प्रमुख सहर नेपालगञ्जलाई जोड्ने उद्देश्यले शनिबारदेखि प्रवर्धनात्मक हवाइ उडान सुरु गरिएको छ । नेपालगञ्जबाट एअरलाइन्सको जहाजले एक शिशु सहित ७३ जना यात्रु बोकेर शनिबार दिउँसो २ः४५ बजे जनकपुर उडेको हो । नेपालगञ्जबाट जनकपुर ठीक एक घण्टामा अवतरण गरिएको नेपाल एसोसिएसन अफ टूर एण्ड ट्राभल एजेण्ट्स (नाट्टा) बाँके च्याप्टरका अध्यक्ष श्रीराम सिग्देलले जानकारी दिए । नेपालगञ्जबाट गएका यात्रुहरुलाई करिब डेढ घण्टा सम्म मन्दिर दर्शन गर्न दिएर जहाज फेरी नेपालगञ्ज फर्किने उनले बताए । अध्यक्ष सिक्देलका अनुसार पहिलो उडानमा अधिकाँस नेपागञ्जका उद्योगी ब्यावसायीहरु रहेकाछन् । जनपुरबाट नयाँ यात्रु सहित नेपालगञ्जबाट गएका ५० प्रतिशत यात्रु फर्किने उनले जानकारी दिए । नेपालगञ्जबाट जनकपुर प्रवर्धनात्मक हवाइ उडानले धार्मिक पर्यटन प्रवर्द्धन हुनुका साथै भारतको अयोध्यासँग नेपालगञ्जको बागेश्वरी मन्दिर र जनकपुर मन्दिरलाई जोड्न सहयोग पुग्ने अपेक्षा गरिएको अध्यक्ष सिक्देलले बताए । ‘अहिले हामीले बाटो देखाउने कोसिस मात्रै गरेका छौँ,’ अध्यक्ष सिग्देलले भने, ‘यसबाट पर्यटकको चहलपहल बढ्ने छ । साथै नेपालगञ्जको बजार चलायमान भएर यहाँको व्यापारव्यावसाय गतिशील बन्दै जानेछ ।’
‘भारतको अयोध्याबाट नेपालगञ्ज सबैभन्दा नजिकको शहर हो । नेपालगञ्जबाट भारतको अयोध्या एक सय ७१ किलिमिटरको दूरीमा रहेको छ,’ उनले भने । नेपालका सबै पर्यटकीयस्थललाई जोडन हवाई मार्ग प्रभावकारी हुने भएकाले हवाई कनेक्टीभिटी पर्यटनको लागि सबैभन्दा सहज माध्यम भएको अध्यक्ष सिग्देलले बताए । भारतको अयोध्यामा श्रीराम मन्दिरको दर्शन गरेपछि नेपालको जनकपुरमा रहेको जानकी मन्दिरको दर्शन गर्नाले पुण्य प्राप्त हुने पौराणिक मान्यता छ । उनले पर्यटन प्रवर्द्धनका लागि हवाइमार्गसँगै नेपालगञ्ज–अयोध्या अत्याधुनिक बस सेवा सञ्चालन गर्नकोलागि लागि पनि पहल भईरहेको बताए ।
देशका दुई ऐतिहासिक सहरविच धार्मिक सम्बन्ध कायम गर्ने उद्देश्यले शनिबार र सोमबार प्रवद्र्धनात्मक उडान गरिने र यात्रुको चाप, माग र अवस्थालाई हेरेर नियमित उडानबारे थप निर्णय गरिने यति एयरलाइन्स नेपालगञ्जका प्रमुख दिलिप कार्कीले बताए ।