खोज

बुटवल, ३० मंसिर ।

विश्वभर नै गुणस्तरीय सेवासहित चेन होटल बिस्तारलाई तीब्रता दिएको लुभरे होटल्स ग्रुप, गोल्डेन टुलिप ब्रान्डमा रुपन्देहीमा चेन होटल संचालनमा आउने भएको छ । नेपालमै पहिलो चारतारे गोल्डेन टुलिप होटल सानिभा इन बुटिक होटल एण्ड स्पाका सिईयो सन्तोष कुमार केसी र सरोवर होटल एण्ड रिसोर्ट्सका प्रबन्ध निर्देशक अशोक कुमार बकायाका बिच व्यवस्थापन सम्झौतामा शुक्रबार हस्ताक्षर भएको छ । सरोवर होटल एण्ड रिसोर्ट्सको ब्यवस्थापनमा गोल्डेन टुलिप होटल सानिभा इन बुटिक एण्ड स्पा संचालन हुने सम्झौतापत्रमा उल्लेख गरिएको छ । यो होटल गौतमबुद्ध अन्तर्राष्ट्रिय विमानस्थलबाट ८ किलोमिटरको दूरीमा खुल्न लागेको हो ।

हस्ताक्षर कार्यक्रममा बोल्दै गोल्डेन टुलिप होटल सानिभा इन बुटिक होटल एण्ड स्पाका सिईयो सन्तोष कुमार केसीले एक वर्षभित्र संचालन हुने गरी तीब्र रुपमा होटलको पूर्वाधार निर्माणको काम अघि बढेको बताए । सानिभा इनका सिईयो केसीले निर्माण कार्यलाई द्रुत गतिमा बढाइएको जानकारी दिए । ‘फागुन २०७९ मा शुरु गरेर निक्कै छिटो काम भैरहेको छ ।’—उनले भने ।

भैरहवामा सबैभन्दा लक्जरी होटलका रुपमा चिनिने गरी पूर्वाधार तयार गर्न लागेको उनले बताए । ‘यो कठिन समयको च्यालेन्जरलाई ट्याकल गर्ने रुपमा रणनीति पनि हो’—उनले भने । जिङज्याङ कम्पनी जसको १३ करोड लोयल्टी मेम्बर छन् । यो मेम्बरलाई लक्षित गरी रणनीति बनाएको भन्दै उनले थोरै पर्यटक ल्याउन सकेपनि राम्रो उपलब्धि हुने बताए । अहिले होटलमा ५२ बढी रुमहरुबाट शुरु गर्ने लक्ष्य रहेको उनले बताए । केसीले विज्ञ समूहसहितको टिमको सहयोगमा काम अघि बढ्ने बताए । जग्गाको मूल्य छोडेर ५० करोड रुपैयाँ लागत रहेको होटलमा स्थानीयलाई रोजगारमा प्राथमिकता दिने उनले बचन दिए ।

होटलमा रुफ टप बार, स्विमिङ पूल सहित अत्याधुनिक फिटनेस सेन्टर, स्पा, अत्याधुनिक बैठक कक्षहरु रहने छन् । जसले यस होटललाई सम्मेलन, सेमिनार र विशेष कार्यक्रमहरूको लागि एक आदर्श विकल्प बनाउनेछ । एक मनोरञ्जन क्षेत्र र एक क्यासिनो पनि निकट भविष्यमा नै सञ्चालनमा ल्याउने योजना रहेको छ । नेपालमा सरोवर समूहको होटलहरू बढ्दो पाइपलाइनमा छन् जसमध्ये सरोवर पोर्टीको वीरगन्ज, रोयल टुलिप सौराहा चितवन र मिराज सरोवर पोर्टीको काठमाडौं मा २०२४÷२५ सम्म खोल्ने तालिका रहेको छ ।

कार्यक्रममा बोल्ने वक्ताहरुले पर्यटनलाई देशको आर्थिक विकासको पाटो बन्ने गरी पर्यटन नीति बनाउन सरोकारवालाहरुले जोड दिएका छन् । नेपालमा वर्सेनि छिमेकी देश भारतबाट ठूलो संख्यामा पर्यटक भित्रिने भएपनि यसबाट पर्यटन ब्यवसायीहरुले सोचेजति फाईदा लिन नसकेको उनीहरुले गुनासो गरे ।

वक्ताहरुले नेपालको आर्थिक विकासमा पर्यटनको विकल्प नभएको भन्दै ब्यावहारिक नीति बनाउन सरकारको ध्यान जानुपर्ने बताए ।

कार्यक्रमको उद्घाटन गर्दै लुम्बिनी प्रदेश सरकारका प्रवक्ता तथा गृहमन्त्री सन्तोष कुमार पाण्डेले सरकार आफ्नो दायित्व निर्वाह गर्न नसकेको स्वीकार गर्दै नीतिगत सुधार अघि बढाउनुपर्ने बताए । ‘नेपालको निजी क्षेत्रले पर्यटन धानेको छ’—उनले भने । भारतीय पर्यटक ४ लाखभन्दा बढी रकम लिएर आउन पाउने गरी नीति बनाउन संघ सरकारलाई सुझाव दिएको उनले बताए ।

अन्य देशमा भाषण कम हुने र काम धेरै गरिने भन्दै नेपालमा भने उल्टो भएको भन्दै यसलाई सुधार्ने अभियान थाल्नुपर्ने बताए । भारतीय पर्यटकलाई सहज र सरल रुपमा ल्याउने वातावरण सृजना गर्न आवश्यक रहेको औल्याउदै यसका लागि जोड दिनुपर्ने उनले बताए । नेपाल भनेको काठमाडौ मात्र भन्ने सोचलाई परिवर्तन गर्न जरुरी रहेको भन्दै नेपाल भनेको लुम्बिनी पनि हो भन्ने बुझाउन जरुरी रहेको उनले बताए ।

कार्यक्रममा नेपाल पर्यटन बोर्डका बरिष्ठ प्रवन्धक लक्ष्मण गौतमले अन्तर्राष्ट्रिय विमानस्थल शुुरु भैसकेको भन्दै थप समस्याहरु हट्ने बताए । लुम्बिनी एक नम्बरको पर्यटकीय स्थल भएको दाबी गर्दै यहाँ विकासको ढोका खुलिसकेको उनले बताए । “धेरै अवसरहरु यहाँ छन जसलाई उपयोग गरेर देशको आर्थिक विकास गर्न सकिन्छ”–उनले भने ।

कार्यक्रममा हानका केन्द्रीय सदस्य गोपाल रानाले पर्यटनलाई कृषिसंग जोडेर आर्थिक रुपमा सबल हुन सकिने सिकाई कोभिड संक्रमणको समयमा देखिएको बताए । धेरै समस्याका बिच पर्यटन नै आर्थिक विकासको पाटो भएको उनले दाबी गरे । पर्यटनलाई उद्योगको मान्यता नदिनु जस्ता कठिनाईहरु रहेको उनले बताए । सरकारले नीतिगत रुपमा नै पर्यटनको विकासमा जोड दिनुपर्ने उनले बताए । अब निराशाको कुरा छोडेर उज्जवल भविष्यतर्फ अघि बढ्नुपर्ने उनले बताए ।

पर्यटकलाई सरकारले २५ हजार रुपैयाको अंकुश हटाउनुपर्ने सुझाव दिंदै उनले पर्यटनमा क्रान्ति गर्ने समय आएको बताए । अहिले देशमा १४ लाख भन्दा बढी पर्यटक ल्याउन नसकेकोे दाबी गर्दै उनले गुणस्तरीय सेवा दिएर पर्यटक बढाउनेतर्फ पर्यटन ब्यवसायीहरु लाग्नुपर्ने सुझाव दिए ।

कार्यक्रममा सरोवर होटल एण्ड रिसोर्ट्सका प्रवन्ध निर्देशक अशोक कुमार बकायाले पर्यटनबाट विकासको ढोका खोल्न सकिने भन्दै नेपाल पर्यटकका लागि उत्कृष्ट गन्त्ब्य भएको बताए ।

सोही कार्यक्रममा बुटवलका क्रियाशिल पत्रकार बिकास पराजुलीको नवजात शिशुको उपचारका लागि सानिभा इन बुटिक होटल एण्ड स्पा का सिईयो सन्तोष कुमार केसीले १५ हजार रुपैया सहयोगको घोषणा गरेका छन् ।