खोज

बुटवल, १० असोज ।

कोभिड संक्रमण र आर्थिक मन्दीबाट धरासायी भएको नेपालको पर्यटन क्षेत्रलाई उकास्न पर्यटन प्रवद्र्धनका कार्यक्रमलाई अघि बढाउनुपर्नेमा सरोकारवालाले सुझाव दिएका छन् ।

सरकार र पर्यटन क्षेत्रमा अग्रसर रहेका संघसंस्थाहरुको पहलमा युवाहरुलाई स्वदेशमा नै रोजगार, पर्यटकको बसाई लम्ब्याउने गरी प्याकेज, अन्तर ब्यापार, आन्तरिक समझदारी कार्यान्वयन लगायतका योजनाहरु ल्याएर अघि बढ्नुपर्ने उनीहरुले बताए ।

४४ औ विश्व पर्यटन दिवसको अवसरमा होटल तथा रेष्टुरेन्ट ब्यवसायी संघ रुपन्देहीको आयोजनामा बुटवलमा बुधबार रुपन्देहीमा पर्यटनको अवसर र चुनौती विषयक अन्तत्र्रिmया कार्यक्रमको उद्घाटन गर्दै बुटवल उपमहानगरपालिकाका नगरप्रमुख खेलराज पाण्डेयले बुटवललाई रुपन्देहीका सामरिक, धार्मिक, सांस्कृतिक स्थलहरु पर्यटनको लागि उर्वरभूमि भएको बताए ।

बुद्धजन्मस्थल लुम्बिनी, जितगढी किल्ला, तिनाउ सभ्यता हाम्रो महत्वपूर्ण पर्यटनको सम्भावना बोकेको स्थल भएको उनले बताए । समग्र भन्दा पनि विशेष क्षेत्रलाई पर्यटक हबका रुपमा विकास गरी अघि बढाउनुपर्ने उनले सुझाव दिए ।

कार्यक्रममा आर्थिक अनुसन्धान केन्द्रका अध्यक्ष हुमराज भुसालले विभिन्न सरकारी संघसंस्थाहरुको तथ्याङ्कहरुलाई उपयोग गरी तयार पारेको अवधारणा पत्र प्रस्तुत गर्दै पर्यटन मन्त्रालयका अनुसार हाल पर्यटक बसाई १३.१ दिन र दैनिक ४० अमेरिकी डलर खर्च गर्ने गरेको तथ्यांकमा देखिएको बताए ।

पछिल्लो समय पर्यटकको बसाई र खर्च गर्ने रकम घटेको तथ्याङ्कमा देखिएको भन्दै उनले सन २०२३ को ६ महिनाको अवधिमा ४ लाख ७६ हजार ८१ जना विदेशी पर्यटक भित्रेको उनले बताए । रुपन्देहीको होटल ब्यवसायको ईतिहास केलाउँदा वि.सं. २०३८ सालदेखि ब्यवस्थित रुपमा ब्यवसाय शुरु भएको भन्दै उनले छोटो समयमा निजी लगानी तीब्र रुपमा भएको बताए ।

हाल रुपन्देहीमा ६ वटा पाँच तारे होटलहरु संचालनमा छन भने ४ निर्माणाधीन अवस्थामा रहेका छन् । होटल ब्यवसायमा आवद्घ भएर ७ हजार ५ सय जना रोजगारी पाएका छन् । वित्तीय ब्यवस्थापन, बढ्दो वैदेशिक पलायनका कारण ग्राहक कमी, दैनिक उपभोग्य वस्तुमा कालोबजारी र अभाव, ब्यवसाय स्थानन्तरणका लागि स्थानीयको दबाब, पर्यटक रुट तथा सूचना केन्द्रको समस्या, जनशक्ति अभाव, लगानी जोखिम, सुरक्षा चुनौती, पूर्वाधारमा कमी, प्रशिक्षण, अब्यवस्थित बसपार्क, छाडाचौपाया, नेपाली खानाको मौलिक स्वाद कायम नहुनु जस्ता चुनौतीहरु देखिएको उनले बताए ।

कार्यक्रममा प्रस्तुत अवधारणपत्रमाथि टिप्पणी गर्दै दल बहादुर गुरुङले पर्यटन क्षेत्र धरासायी हुनबाट रोक्न सम्भावनाहरुको खोजीसंगै अघि बढ्नुपर्ने बताए ।

कार्यक्रममा होटल ब्यवसायी महासंघमा पुर्वअध्यक्ष तथा संघका सल्लाहकार माधव नेपाल, संघका प्रमुख सल्लाहकार समुन्द्र जिसी, सल्लाहकार महेन्द्र श्रेष्ठ, पश्चिम नेपाल बस ब्यवसायी प्रालिका अध्यक्ष दधिराम खरेल, नेपाल उद्यान महासंघका अध्यक्ष खेम प्रसाद लुईटेल, नाटा लुम्बिनीका अध्यक्ष रचना पन्त, नेपाल पत्रकार महासंघ रुपन्देहीका अध्यक्ष रामराज पोखरेल, मिलन पार्कका अध्यक्ष हेमराज शर्मा, संघका वरिष्ठ उपाध्यक्ष माधव खनाल, महासचिव अर्जुन थापाले पर्यटन ब्यवसायी र स्थानीय सरकारको पहलमा पर्यटकीय सवारी संचालन रुट, अन्तर ब्यापार आन्तरिक समझदारी कार्यान्वयन गराउने, रुपन्देहीका स्थानीय सरकारको पर्यटन नीतिमा एकरुपता र स्पष्टता बनाउने, ब्यवसायीहरुको पहलमा पर्यटन प्याकेज कार्यक्रम, आर्थिक मन्दिले समस्याग्रस्त पर्यटन क्षेत्रलाई उकास्न आन्तरिक पर्यटक प्रवद्र्धनका कार्यक्रम चलाउन जरुरी रहेको छ ।

कार्यक्रममा अध्यक्ष लेखनाथ भण्डारीले रुपन्देहीका पर्यटन क्षेत्रमा अग्रसर सरोकारवालाहरु एकतावद्ध भएर अघि बढ्नुपर्ने बताए । यहाँ रहेका संघसंस्थाहरुको सूचना केन्द्रको ब्यवस्थापन गरी पर्यटकस्थलका बारेमा जानकारी दिने गरी अभियान चलाउनुपर्ने उनले बताए ।

कार्यक्रममा संघका पर्यटन उपाध्यक्ष तथा कार्यक्रम संयोजक रोमाकान्त पाण्डेले राष्ट्रको आर्थिक मेरुदण्डका रुपमा रहेको पर्यटन क्षेत्रमा योगदान दिदै आएका होटल ब्यवसायीहरुलाई एकतावद्घ गरी पर्यटनमा टेवा दिने लक्ष्य रहेको बताए ।

भिडियो सामग्री