खोज

काठमाण्डौ, १ साउन ।   मत्स्येनारायण (मलमास) मेलाको सम्पूर्ण तयारी पूरा भएको छ । साउने २ गते मंगलवार (प्रतिपदा) देखि मेला शुरु गर्नका लागि मन्दिर व्यवस्थापन समितिले सम्पूर्ण तयारी पूरा गरेको जनाएको हो ।

मत्स्येनारायण मन्दिरमा पत्रकार सम्मेलन गरि चन्द्रागिरी नगरपालिका वडा नम्बर ९ का अध्यक्ष अच्युत अधिकारीले मेलाको सम्पूर्ण तयारी अन्तिम चरणमा पुगेको बताए । मलमासको एक महिना अन्य भगवानको पूजा आराधना नहुँदा पुरुषोत्तम (विष्णु) भगवानको पूजा आराधना हुने बताए । मेलाको सम्पूर्ण तयारी सकिसकेको र दर्शनार्थीका लागि आवश्यक दर्शनको सहज प्रवन्ध मिलाइएको छ ।

मन्दिर परिसरमा जाने सडक मार्ग पनि व्यवस्थित र निर्माण गरिएको छ । मेलामा जाने वृद्धवृद्धा, शारीरिक अशक्त भएका भक्तजनहरुका लागि सहज व्यवस्थापन गरिने उनले बताए । त्यस्तै मत्स्येनारायण मन्दिरका पुजारीका अनुसार मलमासको मेला मंगलवारबाट शुरु हुने र मलामास एउटा औंसीदेखि अर्को औंसीमा गएर समापन हुने बताए ।

प्रत्येक पाँच वर्षमा २ पटक र ३ वर्षमा एक पटक मेला लाग्ने गर्छ । सौर्यमण्डल र चन्द्रमण्डलको गतिमा केही अन्तर आउँदा त्यो अन्तर प्रत्येक १ वर्षमा ११ दिन हुने र त्यही ११ दिन गणना गर्दा ३३ दिन पुगेपछि मलामास शुरु हुने बताए ।

मलामासमा  मत्स्येनारायणस्थित नागकुण्डमा स्नान गरे रोगहरु नष्ट हुने विश्वास रहेको छ । पौराणिक कथनअनुसार भगवान विष्णुले मच्छेगाउँमा दश अवतारमध्ये पहिलो मत्स्य अवतार ग्रहण गरेको मान्यता छ । पौराणिक राजा सत्यव्रतले कुवा खनाएको र पछि भगवान विष्णुले त्यही कुवामा मत्स्यावतार धारण गरेको तथ्य विभिन्न पुराणमा उल्लेखित छ । गोपालवंशका पालामा मात्रै कुवाको अस्तित्व सार्वजनिक भएको र मन्दिर लिच्छविकालमा निर्माण भएको विश्वास गरिन्छ ।