खोज

बुटवल, ३२ जेठ । एसीसी महिला टी–ट्वान्टी इमर्जिङ टिम्स एसिया कप प्रतियोगिता वर्षाका कारण रद्द भएको छ ।

बिहिबार हुने भनिएको नेपाल र भारतबीचको खेल रद्द भएसंगै नेपालको सेमीफाईनलमा पुग्ने सम्भावना कायम रहेको छ । हङकङमा भारतको ‘ए’ टोलीसँग नेपालको खेल रोकिएसंगै दुबै टोलीले एक/एक अंक बाँडेका छन् ।

प्रतियोगितामा नेपाली आफ्नो पहिलो खेलमा पाकिस्तान ’ए’ सँग पराजित भएको थियो । यता वर्षाका कारण पाकिस्तान र हङकङबीचको खेल पनि हुन सकेन । नेपाल प्रतियोगिताको पहिलो खेलमा पाकिस्तानलाई ८७ रनमा अलआउट गरेको थियो । कम स्कोरमा रोकेको नेपाल २० ओभरमा ७८ रनमै समेटियो । नेपाली टोली दुई खेलबाट एक अंक जोड्दै तालिकाको तेस्रो स्थानमा रहेको छ ।

समूह ‘ए’ मा भारत दुई खेलबाट तीन अंक जोड्दै पहिलो स्थानमा छ । पाकिस्तानले पनि दुई खेलबाट तीन अंक जोड्दै तालिकाको दोस्रो स्थानमा रहेको छ । हङकङ दुई खेलबाट एक अंक बटुल्दै तालिकाको चौथो स्थानमा छ ।
भारतले आफ्नो पहिलो खेलमा हङकङलाई नौ विकेटले पराजित गरेको थियो । प्रतियोगिताको समूह ‘बी’ मा पनि सबै टोलीले दुई/दुई खेल खेलिसकेका छन् । बंगलादेश तीन अंकसहित पहिलो, श्रीलंका तीन अंकसहित दोस्रो, यूएई दुई अंकसहित तेस्रो र खाता खोल्न नसकेको मलेसिया चौथो स्थानमा छन् ।

प्राविधिक कारणले अन्तिम समयमा आएर थाइल्यान्डले प्रतियोगिता नखेल्ने भएपछि यो प्रतियोगितामा नेपालले सहभागिताको अवसर पाएको हो । एसीसी महिला टीट्वान्टी इमर्जिङ टिम्स एसिया कपमा नेपाली महिला टोलीको यो पहिलो सहभागिता हो । नेपालले अब आफ्नो तेस्रो तथा अन्तिम खेल शनिबार हङकङसँग खेल्नेछ । प्रतियोगिताको सेमिफाइनलमा पुग्ने नेपालको सम्भावना जिवितै छ । शनिबार नै भारत र पाकिस्तानबीच खेल हुनेछ ।

उक्त खेल रद्द भए वा अनिर्णित रुपमा सकिए नेपालको सेमिफाइनलमा पुग्ने सम्भावना समाप्त हुनेछ । यस्तो स्थितिमा भारत र पाकिस्तान एक/एक अंक बाँडेर कुल चार/चार अंकसहित सेमिफाइनलमा प्रवश गर्नेछन् । भारत र पाकिस्तानमध्ये एक टोली पराजित भएमा जित्ने टोली पाँच अंकसहित सेमिफाइनलमा पुग्नेछ । हार्ने टोलीको तीन अंकमात्र हुनेछ ।

त्यसपछि अर्को खेलमा नेपालले हङकङलाई पराजित गरेमा नेपालको सेमिफाइनल पुग्ने सम्भावना रहन्छ । यस्तो स्थितिमा नेपालको पनि तीन अंक हुनेछ । त्यसपछि नेट रनरेटमा अगाडि रहने टोली सेमिफाइनलमा पुग्नेछ ।