खोज

गुल्मी,  जेठ- गुल्मीको मुसिकोट नगरपालिका ७ अन्र्तगत झेँदी खोला वामी टक्सार सिँचाइ योजना निर्माणको काम अन्तिम चरणमा पुगेको छ । करिब ती किलोमिटर लम्बाई रहेको उक्त सिँचाइ आयोजनाको काम ९० प्रतिशत पुरा भएको कार्यालयले जनाएको छ । आयोजना सम्पन्न भएसँगै त्यस क्षेत्रका दुई सय २५ घरपरिवार प्रत्यक्ष लाभान्वित हुने भएका छन ।
जलस्रोत तथा सिँचाइ विकास डिभिजन कार्यालय गुल्मी मार्फत एक करोड ३१ लाख रुपैयाँको लागतमा तीन वर्षदेखि आयोजनाको निर्माण कार्य शुरु गरिएको हो । जलस्रोत तथा सिँचाइ विकास डिभिजन कार्यालय गुल्मीका प्रमुख इन्जिनियर भरतप्रसाद सापकोटाले लामो समयदेखि सिंचाईको समस्याबाट चिन्तित बनेका वामीका कृषकहरुका लागि यो योजनाले मनग्य फाईदा पुग्ने बताए ।

उनले गुल्मी पहाडी जिल्ला भएर पनि सिँचाइको प्रशस्त सम्भावना भएका उत्पादनशील फाँटहरूमा अझै पनि सिँचाइ सुविधा पुग्न नसकेको बताए । उक्त सिँचाइ योजना निर्माण शुरुहुनु पहिले स्थानीयल जग्गाधनीहरूले अस्थाई रुपमा निर्माण गरेको कुलोबाट सिंचाई गर्न बाध्य थिए ।
जलस्रोत तथा सिँचाइ विकास डिभिजन कार्यालय गुल्मी मार्फत पक्की नहर निर्माण भएपछि स्थानीय कृषकहरु निकै खुसी बनेको झेदीखोला–वामीटक्सार सिँचाइ योजना उपभोक्ता समिति अध्यक्ष तेजनारायण सापकोटाले बताएका छन । सिँचाइ कुलाको माध्यमबाट वामी फाँटमा ठूलो पानी पुग्ने भएपछि वामीको उर्वर फाँटमा हिउँदे बाली र बेमौसमी तरकारी खेतीको प्रशस्त सम्भावना रहेको छ ।

पछिल्लो समयमा सरकारले सिँचाइमा लगानी गरेअनुसार नागरिकहरुमा भने कृषि कर्म प्रति त्यत्ति सक्रियता देखिँदैन । सरकारले गरेको लगानीसँगै नागरिकहरुले पनि उत्पादनसँग सिँचाइलाई यदि नजोडने हो भने थुप्रै उर्वर भूमि त्यत्तिकै खेर नजालान भन्न सकिदैन ।