गुल्मी, जेठ – गुल्मीको ईस्मा गाउँपालिकामा व्यावसायीक रुपमा कागती खेती गर्न शुरु गरिएको छ । व्यावसायीक कृषि उत्पादन केन्द्र (ब्लक) विकास कार्यक्रम अन्र्तगत कृषि ज्ञानकेन्द्र गुल्मीको सहयोगमा ईस्माको वडा नम्बर ४ मा कागती खेती शुरु गरिएको हो ।
गत आर्थिक वर्षदेखि शुरु गरिएको कागती खेतीका लागि स्थानीय समूह र सहकारीका दर्जनौ कृषकहरु आबद्ध बनेका छन । स्थानीय भबिश्य निर्माण कृषि सहकारी संस्था, हरियाली नगदेवाली कृषक समूह र लामिडाँडा युवा कृषि समूहकागरि ९५ जना कृषकहरु यतिबेला व्यावसायीक रुपमा कागती खेतीमा लागेका हुन ।
गत आर्थिक वर्षमा त्यहाँका कृषकहरुले दुइ सय १५ रोपनी क्षेत्रफलमा कागतीको बिजु बिरुवा लगाएकोमा यस आर्थिक वर्षमा क्षेत्रफल बढाएर दुइ सय ७५ रोपनी क्षेत्रफलमा कागती लगाउन थालेका छन । स्थानीय तहले पनि युवाहरुलाई कृषिसँग जोड्नका लागि समूह र सहकारी मार्फत कृषि अनुदान उपलब्ध गराउने नीति रहेको गाउँपालिका अध्यक्ष भगतसिंङ खड्काले बताए ।
कागती खेतीको बिस्तारका लागि कृषि ज्ञानकेन्द्रले गत आर्थिक वर्षमा २५ लाख र यस वर्ष १५ लाख गरि कुल ४० लाख रुपैयाँ अनुदान उपलब्ध गराएको कृषि ज्ञानकेन्द्र गुल्मीका प्रमुख नवराज भण्डारीले बताए । कृषि ज्ञान केन्द्रले कागती खेती गर्ने कृषकहरुलाई सिँचाईमा ८५ प्रतिशत र बिरुवा, खाडल, मलखाद तथा मेशिनरी औजार उपकरणका लागि ५० प्रतिशत अनुदान उपलब्ध गराएको कार्यालय प्रमुख भण्डारीले जानकारी गराए ।
कागतीको क्षेत्रफल बिस्तार गरि उत्पादन र उत्पादकत्व वृद्धि गर्ने उद्देश्यले त्यहाँका कृषकहरुलाई सिंचाईका लागि पानी ट्यांकी, मिनिटिलर, पाईप, स्प्रेयर, बिषादी र जैवीक मल लगायतका सामग्रिहरु समेत हस्तान्तरण गरिएको छ । भौगोलीक रुपले पनि उपयुक्त रहेको उक्त ठाउँमा गत वर्ष र यस वर्ष सहित दश हजार भन्दा बढी कागतीका बिरुवाहरु लगाउने तयारी गरेको समूहका अध्यक्ष बलबहादुर रोकाले जानकारी दिएका छन ।
स्थानीय र प्रदेश सरकारले कृषि उत्पादन क्षेत्रमा व्यावसायीक कृषक, समूह र सहकारीहरुलाई अनुदान उपलब्ध गराउन शुरु गरेपछि पछिल्लो समयमा जिल्लामा कागती खेतीमा कृषकहरुको आकर्षण बढ्दै जान थालेको छ ।
२२ मंसिर २०८२, सोमबार
