खोज

बुटवल,  जेठ
कालिकानगरका केशव चापागाई रोजगारको खोजीमा थिए । बजार ब्यवस्थापनको अनुभव रहेका उनी बुटवलको रोजगार मेलामा भेटिए । ‘मैले खोजेको पदमा एउटा कम्पनीको माग रहेछ ।’–फर्म भर्दै उनले भने । रोजगार पाउनेमा आशाबादी छन । रोजगार दिने र रोजगार खोजेकाहरुलाई पुलको काम मेलाले गरेको उनी बताउछन । ‘मार्केटिङ अफिसरमा भरेको छु ।’– उनले भने ।

एफएनसिसिआई, रोजगार सेवा केन्द्र बुटवल उपमहानगरपालिका, बुटवल उद्योग वाणिज्य संघको आयोजना तथा ईन्टरनेश्नल लेवल अर्गनाइजेसनको सहयोगमा रोजगार मेला आयोजना भएको हो । लुम्बिनी वाणिज्य क्याम्पसबाट भर्खर बिबिएस पास गरेकी बुटवलकी सृजना पाण्डे रोजगारको खोजीमा थिईन । अध्ययनसंगै संचार क्षेत्र र मालपोत कार्यालयमा लेखापढीको अनुभव बटुलेका उनी अब भने रोजगारको खोजीमा छिन । अनुभवको हिसाबले रिसेप्सन, फ्रन्ट अफिसरको पदमा रोजगार पाए काम गर्ने सोच बनाएकी उनलाई रोजगार मेलामा खोजेजस्तो प्रतिष्ठान भेटाइन । दुई वटा प्रतिष्ठानमा फर्म भरेको उनले बताईन ।
महाराजा रिसोर्टमा आयोजना गरिएको रोजगार मेलामा २९ वटा प्रतिष्ठानहरुले कर्मचारीको पदसहित स्टल राखेका फर्म भराएका छन । जहाँ प्रतिष्ठानका एचआर म्यानेजरले रोजगार खोज्ने युवाहरुलाई सहजिकरण गरेका छन ।
गोर्खाकी बिनिता नेपाली बुटवलको कोरिया–नेपाल बहुप्राविधिक शिक्षालयमा डिप्लोमा ईन अटोमोबाइल ईन्जिनियरिङ पास गरिन । पढाई सकेसंगै रोजगारको खोजी रहेकी उनी धेरै उद्योगमा पुगिन । ३ वर्षको अवधिमा उनले प्राविधिक ज्ञान पाएर दक्ष जनशक्ति तयार भएपनि अनुभवको अभावकै कारण रोजगार पाउन कठिन भएको उनले गुनासो गरिन । ‘प्राविधिक विषय अध्ययन गरेको भएपनि महिलालाई रोजगार पाउन चुनौती छ ।’–उनले भनिन । रोजगार मेलामा अटो मोबाइल ईन्जिनियर सम्बन्धि पदमा उनले फर्म भरेकी छिन । सवारी साधनको विभिन्न पार्टहरुबाट उत्पन्न हुने समस्या र समाधानको पाटोमा राम्रो ज्ञान उनलाई छ । दक्षता अनुसार रोजगार पाउनेमा उनि आशाबादी छिन ।
कोरिया–नेपाल बहुप्राविधिक शिक्षालयमा डिप्लोमा ईन मेकानिकल ईन्जिनियर पढेर ६ सेमेस्टार दिएर नतिजाको पर्खाईमा रहेकी सल्याङकी निरुता चन्द रोजगारको खोजीमा छिन । लेथ मेशिन, बेल्डिङ, अटो क्याट, ड्रिल, ग्रिडिङ र सवारी साधनको पार्टको बारेमा राम्रो ज्ञान भएकी उनी रोजगार मेलामा रोजगार खोज्न आईन । लेथ मेशिन र मेकानिकल ईन्जिनियरको माग रहेको दुई कम्पनीमा फर्म भरेकी छिन । महिलाहरुलाई दक्षता भएपनि अवसर नदिने गरेको उनले बताए । दक्षता भन्दा पनि चिनजान र पहिचान भएकाहरुलाई रोजगारको अवसर पाउदै आएकोमा रोजगार मेलाबाट रोजगार पाउनेमा आशा ब्यक्त गरिन ।
बुटवल उद्योग वाणिज्य संघका अध्यक्ष उज्वल कसजूले स्वदेशमा रहेका उद्योगको जनशक्ति माग र रोजगार खोज्ने युवालाई भेटाउने पुलका रुपमा कार्यक्रम गरिएको बताए । यो कार्यक्रमबाट करिब २ सय भन्दा बढिलाई रोजगार मिल्ने उनले दाबी गरे । सामान्य लेभर, सुरक्षा गार्ड, एकाउन्टेन्ट म्यानेजरसम्मको करीब ३ सय बढी माग अनुसार २९ वटा प्रतिष्ठानको स्टल राखिएको उनले बताए । बाहिर प्रतिष्ठानको आवश्यकताको बोर्ड राखिएको छ । जस अनुसार रोजगारको स्टलमा फर्म भर्ने, डकुमेन्ट पेश हुन्छ । जेठ ९ र १० गते दुई दिनसम्म चल्ने मेलामा युवाहरुको आर्कषण छ ।

रोजगार मेलाको उद्घाटन
एक समारोहका बिच नेपाल उद्योग वाणिज्य महासंघ लुम्बिनीका प्रदेश अध्यक्ष कृष्णप्रसाद शर्माले बुटवलमा आयोजना गरिएको दुई दिने रोजगार मेलाको मंगलबार उद्घाटन गर्दै विदेशबाट श्रमिक ल्याउनु परेको वर्तमान अवस्थामा उदाहरणीय कार्य भएको बताए ।
नीजि क्षेत्रमा देखिएको समस्या समाधानमा सरकारको अग्रसरता जरुरी रहने उनको तर्क छ । कार्यक्रममा नेपाल उद्योग वाणिज्य महासंघका सदस्य, उद्योग समितिका सभापति राजेशकुमार अग्रवालले नेपालबाट मासिक ८० देखि ९० हजार युवा जनशक्ति बाहिरिदा स्वदेशी उद्योगको उत्पादनमा असर गर्ने र आयातमै निर्भर हुनुपर्ने अवस्था आएको दुखेसो गरे । कार्यक्रममा आई.एल.ओ.नेशनल प्रोजेक्ट कोर्डिनेटर सौरभराम जोशी, संघका वरिष्ठ उपाध्यक्ष दिनेशप्रसाद श्रेष्ठ, संघका महासचिव विमलराज भट्टराईले आन्तरिक रोजगारीमा प्रवर्धन गर्नको लागि मेला फलदायी हुने बताए ।