खोज

सल्यान (बुटवलटुडे) १९ बैशाख– स्थानीय पाठ्यक्रम कार्यान्वयनमा ल्याउन लागेको सल्यानको कालिमाटी गाउँपालिकाले शिक्षकहरूलाई प्रबोधिकरण गरेको छ । पाठ्यक्रममा समेटिएका सबै विषयवस्तुबारे जानकारी दिने उद्देश्यले गाउँपालिकाले प्रवोधिकरण कार्यक्रम राखेको हो । सोमबार र मंगलबार दुई दिन सम्म सञ्चालन भएको कार्यक्रममा १ देखि ५ सम्म कक्षा सञ्चालन भएका विद्यालयबाट एक जना शिक्षक र ८ कक्षा सञ्चालन भएका विद्यालयबाट दुई जना शिक्षक सहभागि भएका थिए ।

पठनपाठनमा सहजता ल्याउनका लागि शिक्षकहरूलाई स्थानीय पाठ्यक्रम बारे अन्तरक्रिया तथा प्रबोधिकरण कार्यक्रम आयोजना गरिएको कालिमाटी गाउँपालिकाका शिक्षा अधिकृत भरत कुमार चन्दले जानकारी दिए । स्थानीय पाठ्यक्रम कालिमाटी गाउँपालिकाको सेरोफेरो पालिकाभित्रका ५२ वटा सामुदायीक विद्यालयमा यहि शैक्षिक वर्षदेखी कार्यान्वयमा आउँदैछ ।

कालिमाटी गाउँपालिका भित्र रहेका कृषि, पर्यटन, उद्यम, जडीबुटी, रहनसहन, कलासंस्कृति, सम्पदा, भाषा, धर्म, स्थानीय प्रविधी लगाएत विभिन्न विषयलाई समेटेर पाठ्यक्रम तयार गरिएको गाउँपालिका अध्यक्ष दानबहादुर केसीले बताए । स्थानीय पाठ्यक्रमले पालिकाको शैक्षिक विकास तथा पहिचानमा टेवा पुग्ने र नैतिकवान, चरित्रवान विद्यार्थी उत्पादन हुने उनको अपेक्षा छ । गाउँपालिकाले कक्षा १ देखि ८ सम्म अनिवार्य विषयका रूपमा १०० पूर्णाङ्कको स्थानीय पाठ्यपुस्तक पढाइ सुरु गर्दैछ । स्थानीय सरकार सञ्चालन ऐन २०७४ ले स्थानीय तहले स्थानीय पाठ्यक्रम निर्माण गरेर पाठ्यपुस्तक लागू गर्नसक्ने व्यवस्था गरेकाले आफ्नो पालिकालेले पनि कालिमाटी गाउँपालिकाको सेरोफेरो तयार गरेर कार्यान्वयनमा ल्याएको अध्यक्ष केसीको भनाई छ । स्थानीय सरोकारवालाहरू विद्यार्थी, शिक्षक, अभिभावक, विद्यालय व्यवस्थापन समिति, शिक्षक–अभिभावक संघ, स्थानीय बुद्धिजीवी, समाजसेवी, राजनीतिकर्मी, स्थानीय निकायका प्रतिनिधि, व्यवसायी, पेशाकर्मी, ज्येष्ठ नागरिक लगाएतबाट कालिमाटी गाउँपालिकाका सबै वडा मार्फत स्थानीय आवश्यकताका विषयवस्तुहरूको सूची तयार गरेर स्थानीय पाठ्यक्रमको मस्यौदा तयारी गरी त्यसलाई पूर्णता दिइएको थियो ।केन्द्रीय पाठ्यक्रमले मात्र स्थानीय ज्ञान, सीप, विधि तथा प्रविधिलाई समेट्न नसक्ने भएकाले पालिकाको परिवेश; वातावरण र आवश्यकता अनुसारको स्थानीय पाठ्यक्रम निर्माण गरिएको प्रमुख प्रशासकीय अधिकृत कृष्ण प्रसाद पौड्यालले जनाए ।