खोज

चन्द्रौटा (कपिलवस्तु),  बैशाख – कपिलवस्तुको शिवराज नगरपालिका–१, चोरखोला बासी हर्षित भएका छन् । पाँच दशक लामो समयदेखि बसोबास रहेको पुरानो बस्तीमा बिजुलीको खम्बा गाडिने लगायत निर्माण कार्य सुरु भएपछि स्थानीय हर्षित भएका हुन् ।
जिल्लाको मुटु मानिने मुख्य बजार चन्द्रौटादेखि करिब १५ किलोमिटर पुर्व–पश्चिम लोकमार्ग छेउमै रहेको चोरखोला बस्तीमा विधुत नहुँदा स्थानीय अन्धकारमय जीवन जिउने समस्या झेल्दै आएका थिए । यसअघि पटक–पटक सम्बन्धित निकायमा जानकारी गराउँदासमेत सुनुवाई नभएको स्थानीयले गुनासो गर्दै आएका थिए ।
विधुतसँगै शुद्ध खानेपानी र मोबाइल नेटवर्क लगायतको व्यवस्थापन नहुँदा आमनागरिक दुषित पानी पिउन बाध्य भएका थिए स्थानीय समाजसेवी एम.वि. सुनारले बताए । उनले भनेः“ जसमध्ये विधुत र खानेपानीको समस्या समाधान हुने भएको छ तर मोबाईल नेटवर्कको समस्या समेत छिट्टै समाधान हुने विश्वास छ ।“
२०२६ सालदेखि बसोबास गर्दै आएको बस्तीमा अथक प्रयास गर्दा विधुत लगायत खानेपानी लगायत समस्याको समाधान गर्न सफल भएको स्थानीय सुनारले जिकिर गरे । उनले थपेः “यसभन्दा पहिला चोरखोला बस्तीमा माननीय पूर्व सांसद अभिषेक प्रताप शाहले अवलोकनका क्रममा उहाँले गरेको बाचा पूरा गर्नुभएको छ जसको श्रेय जान्छ, त्यसकोलागि धन्यवाद छ ।“ विधुत, खानेपानी लगायत समस्याको समाधान गर्न पटकपटक विभिन्न निकायमा पुगेका उनले जनाए ।
चोरखोला बस्तीमा आइतबार देखि विद्युत प्रसारणको निर्माण कार्यको उद्घाटन गर्दै पूर्व सांसद अभिषेक प्रताप शाहले अन्धकारमा बस्ने र दुषित पानी खानुपर्ने बाध्यता हटेको दावी गरे । आगामी दिनमा उक्त स्थानको मोबाईल नेटवर्क लगायतको समस्या समाधान गर्ने उनले प्रतिबद्धता समेत जनाए । अवलोकनका क्रममा स्थानीय बासीलाई आफूले गरेको अनुरुप नै काम गरेको उनको भनाइ छ ।
उक्त समस्याको आफूले ढिला जानकारी पाएको बताउँदै जानकारी पाए लगत्तै केन्द्रबाटै ६० लाख विनियोजन गराउन सफल भएको बताए । सोही अनुसार यतिबेला निर्माण कार्य सुरुवात भएको उनले उल्लेख गरे । विकासमुखी आफ्नो पृष्ठभूमि रहेको जनाउँदै “विकास निर्माणलाई नै निरन्तर दिँदै अगाडि बढ्छु“ उनले भने ।
यसैबीच नगर प्रमुख अजय थापाले लामो समयदेखि अन्धकारमय जीवन जिउन बाध्य भएका नगरबासी उज्यालोमय भएकोप्रति हर्ष व्यक्त गरे । सांसद शाहको अथक प्रयासबाट नगरबासीलाई सरकारको प्रत्यक्ष महसुस गराउन सफल भएको बताए । सरकारप्रतिको निरासालाई सकारात्मक सन्देश दिलाउन सदैव तत्पर रहने जनाए । सबैले यसैगरी विकासलाई गति दिन सके शिवराजलाई नमुन पालिका बनाउन मद्दत पुग्ने थापाको भनाइ छ ।
वडा नम्बर १ का वडा अध्यक्ष खिमबिक्रम केसीले विधुत, खानेपानीलगायतको समस्या समाधान भएकोमा सांसद शाहलाई धन्यवाद दिँदै मोबाइलको नेटवर्कको समस्या समेत समाधान गर्न पहल गर्ने उनले जनाए ।