खोज

गुल्मी वैशाख – रेसुंगा नगरपालिकाले तम्घास बजार क्षेत्रमा अव्यवस्थीत रुपमा बनाईएका सडक पेटीहरु हटाउन शुरु गरेको छ । नगरपालिकाले सदरमुकाम तम्घास बजार क्षेत्रमा कालोपत्रे गर्नका लागि बिहिवारदेखि डोजर प्रयोग गरि सडक मिचेर बनाईएका अव्यबस्थीत पेटी लगायतका संरचनाहरु हटाउन शुरु गरेको हो ।
नगरपालिकाले केही दिन अघि बजारमा कालोपत्रे गर्नका लागि सडक छेउँछाउँका घरधनिहरुलाई अव्यवस्थीत रुपमा निर्माण गरेका सडकपेटीहरु आफै हटाउन भनि सार्वजनिक रुपमा रेडमार्क लगाई दिएको थियो । नगरपालिकाले तोकेको समयमा सम्बन्धित धरधनिहरुले अटेर गरि बेवास्ता गरेपछि नगरपालिकाल आफै नैे बाध्य बनेर डोजरको माध्यमबाट उक्त अव्यवस्थीत रुपमा बनाईएका सडकपेटीहरु हटाउन शुरु गर्न बाध्य बनेको नगर प्रमुख खिलध्वज पन्थीले बताए ।
नगरपालिकाले अव्यवस्थीत रुपमा सडक प्रयोग गरि बनाईएका पेटीहरु हटाउन थालेपछि कतिपय घरधनिहरुले आफै त्यस्ता संरचनाहरु भत्काउन शुरु गरेका छन । बजार क्षेत्रमा साँगुरो सडक र त्यसै सडकमा पनि सडकै मिचेर पेटी तथा नालीहरु बनाएपछि सवारी साधनका साथै आम नागरिकहरुलाई पैदल यात्रा गर्न समस्या उत्पन्न भएको थियो ।
नगरपालिकाले एक साता भित्रमा बजार क्षेत्रमा कालो पत्रे गर्नका लागि हाललाई ३० फिटको सडक मापदण्ड कायम गरेको नगरप्रमुख पन्थीले जानकारी गराएका छन । त्यसैगरि नगरपालिकाले तम्घास बजार क्षेत्रमा अव्यवस्थीत रुपमा रहेका विद्युत, केवुल तथा ईन्टरनेटका पोल तथा तारहरु समेत हटाई व्यवस्थीत गर्न शुरु गरेको छ ।