खोज

चन्द्रौटा(कपिलवस्तु), ६ बैशाख – कपिलवस्तुको शिवराज नगरपालिकाले अनिवार्य तथा निःशुल्क शिक्षा लागू गरेको छ । सरकारी विद्यालयको गुणस्तर सुधारसहित विद्यालयप्रति आम नागरिकहरुको विश्वासनीयता बढाउन सामुदायिक विद्यालयमा सरकारी कर्मचारी, जनप्रतिनिधि तथा संस्थागत कर्मचारी लगायतले सामुदायिक विद्यालयमा भर्ना गर्न नगरपालिकाले आग्रह गरेको छ ।

सरकारको अवधारणा अनुसार नगरपालिकाले पनि निःशुल्क शिक्षा कार्यान्वयन गर्न जोड दिएको छ । सबैले विद्यार्थीले २०८० सालदेखि नै अनिवार्य तथा निःशुल्क शिक्षा लागू गर्न नगरपालिका विधिवत् रुपमा कदम चालेको छ । अनिवार्य तथा निःशुल्क शिक्षाले पालिकामै सरकारी विद्यालयलाई गुणस्तरीय शिक्षामा टेवा पुग्ने नगरपालिकाले जनाएको छ ।
अनिवार्य तथा निःशुल्क शिक्षा कार्यान्वयनको लागि बनेको ऐन, २०७९ को दफा ६ को उपदफा (१) मा “शिवराज नगरपालिकामा बसोबास गरि नेपालको संविधान, अन्य परिचलित कानुन वा अधिकार प्राप्त अधिकारीको निर्णय वा आदेश बमोजिम नियुक्त, निर्वाचित वा मनोनयन हुने र सार्वजनिक अख्तियारी प्रयोग गर्न पाउने वा कुनै कर्तव्यको पालना वा जिम्मेवारी निर्वाह गर्ने व्यक्तिले आफ्ना सन्तान सामुदायिक विद्यालयमा भर्ना गर्नु कर्तव्य हुनेछ“ भन्ने व्यवस्था अनुसार नगरपालिकाले अनिवार्य तथा निःशुल्क शिक्षा लागू गर्न गत ३ गते सूचना जारी समेत गरेको छ ।

नगरपालिकाको नगरप्रमुख अजय थापाले आफ्नो छोरीलाई सामुदायिक विधालयमा भर्ना गरेका छन । निजी विद्यालयमा अध्ययन गर्दै आइरहेकी छोरीलाई नगर प्रमुख थापाले बुधबार बिहान समयथान माध्यमिक विद्यालयमा भर्ना गरेका हुन् । नगरपालिकाले नगरबाट सेवा सुविधा लिएका व्यक्तिको छोराछोरीले अनिवार्य सामुदायिक विद्यालयमा भर्ना गर्नुपर्ने नीति निर्माण गरेकाले सोहि निति अन्तर्गत छोरीलाई सामुदायिक विद्यालयमा भर्ना गरेको मेयर थापाले बताउँछन् ।
मेयर थापाले छोरीलाई शिवराज नगरपालिका वडा नम्बर–४ खरेन्द्रपुरमा रहेको समयथान माविको कक्षा ८ मा नेपाली माध्यमतर्फ भर्ना गरेको बताएका हुन् । पालिकाका अन्य जनप्रतिनिधि, शिक्षक र कर्मचारी लगायतले समेत सरकारी विद्यालयमा भर्ना गरिरहेको उनले बताए ।

सरकारी विद्यालयको शिक्षाको गुणस्तरमा बृद्धि हुनेमा आफू विश्वास रहेको समेत मेयर थापाको भनाइ छ । विद्यालयका प्रधानाध्यापक गिरी प्रसाद गैरेले मेयर थापाले आफ्नो छोरीलाई भर्ना गरेर सकारात्मक सन्देश दिएको जिकिर गरे । माध्यमिक तहसम्म पूर्ण निःशुल्क शिक्षाको व्यवस्था गरेको नगरपालिकाले केही दिन अगाडी नगरबाट सेवा सुविधा लिएका व्यक्तिका छोराछोरीले अनिवार्य सामुदायिक विद्यालयमा भर्ना गर्नुपर्ने सूचना जारी गरेको थियो ।