खोज

बुटवल चैत – गुल्मी जिल्लाको मुसिकोट गाउँपालिका वडा नम्बर–७ बसेरीबाट रूपन्देही झरेको धेरै समय भएको थिएन । गाउँमा उब्जाउ कम हुने छोराछोरीहरू बढि भएको कारण राम बहादुर राना ७ बर्षदेखि रूपन्देहीमा छन् । अघिल्लो पटकको कोरोना कहरका बेला उनले बुटवल ट्राफिकचौक नजिकै पुरानो फिलिमलाइनमा एउटा रेष्टुरेन्ट किने । परिवारमा ६ जना छोराछोरी श्रीमती अम्बी राना पनि पटक पटक बिरामी हुन्थिन् ।

गत फागुन महिनाको २४ गते राती ‘जोजो रेष्टुरेन्ट’ बन्द गरेर कोठा भाडामा लिएर बस्दैे आएको बुटवल–७ दीपनगरमा जाने क्रममा चाँदबारी चोक नजिकै रहेको फलामको पुल नजिकै उनको संकास्पद निधन भयो । रेष्टुरेन्ट बन्द गरेर एक जना मान्छेसँगै उनी गएको सिसिटीभी फुटेजमा देखिएको प्रमाण उनका छोरा सुरज रानाले राखेका छन् । घटना गत फागुन २४ गते राती भएपनि उनको परिवारले अर्को दिन बिहान मात्रै थाहा पाएको हो । रातिपनि श्रीमान घरमा नआएपछि खोज्न जाँदा अर्को दिन श्रीमती अम्बी रानाले पुल मुनी श्रीमान्को शव भेटाएकी थिईन । घटना भएको स्थानदेखि श्रवणपथ प्रहरी चौकी केही मिटरको दुरीमा मात्रै छ । श्रीमान् पुलबाट लडेर मृत्यु भएको नभई नियोजित रूपमा ‘हत्या’ गरिएको श्रीमती अम्बी रानाको दाबी छ ।

घटना भएको लामो समयसम्म पनि सत्य तथ्य बाहिर ल्याउन प्रहरीले आनाकानी गरेको पीडित रानाले बताउँछिन् । स्पष्टरूपमा सिसीटिभी फुटेजमा अर्को व्यक्तिले लगेको देखिएको भन्दै उनले आफूले उचित न्याय नपाएको बताउँछिन् । ‘घरको मुली मान्छे ढल्यो, ६ जना छोराछोरी छन्, म एक आफै विरामी मान्छे हो, कसरी बाँच्नु, मलाई न्याय चाहियो ।’–सञ्चारकर्मीसंगको कुराकानीमा अम्बीले भनिन् । ५ वटा छोरी र १ छोरा रहेका राना परिवारमा मृतककी आमा पनि अहिले छोराको यादमा भक्कानी रहन्छिन् । अहिले सम्म उनीहरू पटक –पटक ईलाका प्रहरी कार्यालय बुटवलमा गएका छन् । प्रहरीबाट रिपोर्ट नआएको भन्दै छानविन गर्न नसकिएको जवाफ आएको छोरा सुरज राना बताउँछन् । आफ्ना बुबा पुलबाट लडेर मृत्यु भएको नभई नियोजित रूपमा हत्या गरिएकाले उचित न्यायको आशामा रहेको छोरा रानाको भनाइ रहेको छ । परिवारमा आम्दानी गर्ने मुख्य व्यक्तिको नै निधन भएपछि अहिले उनीहरू सिसीटिभी क्यामेराको फुटेज बोकेर न्यायको लागि भौतारिरहेका छन् ।

चिकित्सकले शव पोष्टमार्टम गर्ने बेलामा पछाडिबाट टाउकोमा केही दरिलो बस्तुले हानेको देखिएको बताएको दाबी गर्दै छोरा सुरज रानाले त्यति सानो पुलबाट खसेर कोही पनि व्यक्तिको निधन नहुने दाबी गर्दै आएका छन । सोही दिन साँझ ५ बजे सम्म आफ्ना बाबु संग रेष्टुरेन्टमा काम गरेको बताउँदै उनले उचित न्यायमा पर्खीएको बताए । बुबा घर आउँदा ३ किलो मासु, करिब १५ हजार जति नगद रूपैयाँसमेत लिएर आएको उनको दाबी छ ।

अर्को दिन उनको शव भेटिँदा नगद र अन्य सामान सबै गायव भएका थिए भने दुई थान मोबाईल रहेकोमा एक थान मोबाईल पुलमा र अर्को शव नजिकै रहेको बताइएको छ ।्होटलमा आउने खाने र पैसा नतिर्ने केही समूह नै रहेको दाबी गर्दै उनीहरूले सोही समूहले आर्थिक लोभको कारण हत्या गरेको दाबी परिवारको छ । करिब साढे ४ लाख रूपैयाँमा रेष्टुरेन्ट किनेर रानाले चलाउँदै आएका थिए । उनको मृत्युपछि घरवेटीले भाडा बापत ४६ हजार रूपैयाँ पाउनुपर्ने भन्दै रेष्टुरेन्टको ताला चावी आफैसँग राखेका छन् ।

यता किरिया खर्च समेत नभएको कारण राना परिवारलाई स्थानीय टोल विकास संस्थाले मिलेर ३० हजार रूपैयाँ सहयोग गरेका थिए । परिवारमा आम्दानीको स्र्रोत नभएको कारण ८ जनाको परिवार अहिले विचल्लीमा छन । ५ वटा छोरी, १ छोरा, आमा र श्रीमती मासि ७ हजार भाडा तिर्ने गरी बुटवल पुरानो लाईसेन्स अफि अगाडी बस्दै आएका छन् । सबै छोराछोरीहरू विद्यालयमा पढ्दै आएका छन् । आम्दानीकोस्रोत गुमेपछि अव उनीहरूको पढाईसमेत रोकीने चिन्ता परिवारले गर्न थालेको छ ।

यता, ईलाका प्रहरी कार्यालय बुटवलका प्रहरी निरिक्षक प्रकाश खत्रीले मृत्युको विषयको आवश्यक छानविन अहिले जारी रहेको भन्दै अहिले नै खास के हो भन्ने विषयमा भन्न नमिल्ने बताउँछन् । यो विषयमा वडा प्रहरी कार्यालयको समेत सहभागीतमा सुक्ष्मरूपमा अनुसन्धान जारी रहेको जानकारी दिदै उनले काठमाण्डौ पठाइएको नमूनाको रिर्पोट नआईसकेको कारण पनि अहिले नै यसै यो कारणले मृत्यु भएको भन्न नमिल्ने बताए । बुटवल टुडे संगको कुराकानीमा उनले भने–‘पोष्टमार्टम रिर्पोट, अन्य सबै रिर्पोट आएपछि मात्रै हामी यो कारणले हो भन्न सक्छौ, अहिले पनि हामी अनुसन्धान मै छौ ।’