खोज

सन्धिखर्क, ११ चैत । सरकारी अस्पताल भन्ने बितिक्कै सेवा र सुबिधाको बिषयमा कुरो उठ्ने गर्छ । बिरामीहरुले भने जस्तो उपचार नपाउने भएर होला सरकारी अस्पताललाई हेयको दृष्टिलेहेर्ने गरिन्छ । तर पछिल्लो समय जिल्ला अस्पताल अर्घाखाँचीको हकमा भने यो अवस्था फेरिएको छ ।
अर्घाखाँची अस्पतालमा बिरामीको संख्या ह्वात्तै बढेको छ । केहीसमय पहिला सरकारी तथा सामुदायिक अस्पतालमा र नीजी क्लिनिकहरुमा उपचार गराउनेहरु पनि अहिले जिल्ला अस्पतालमै उपचारको लागि पुग्ने गरेका छन् । अस्पतालमा एम डि जि पि विशेषज्ञ डाक्टर २ जना भएपछि अहिले अपचारको लागिसजिलो हुने गरेको र सेवालीनविरामीहरु पनि धेरै संख्यामा आउने गरेको अस्पतालका प्रमुख चिकित्सक जगन्नाथ तिवारीले बताउँछन् ।

जिल्ला अस्पतालमा विशेषज्ञ डाक्टरहरुको ११ जनाको दरबन्दी भएपनि ३ जना मात्र विशेषज्ञ डाक्टर रहेका छन् जसमध्ये २ जना स्थायी र एक जना करारमा कार्यरत रहेको हुन । अझैपनि ९ जना डाक्टरको दरबन्दी भने खाली नै रहेको छ ।

निक साइमण्ड ईन्ष्टिच्यु काठमाडौंको आर्थिक सहयोगमा अस्पतालमा कार्यरत एम डि जि पि विशेषज्ञ डाक्टर अशोक कुमार शाहले पछिल्लो समय विरामीहरुको मन जित्न सफल भएका छन् । सन्धिखर्क नगरपालिका ६ का दुर्गाप्रसाद भट्टराईले आफ्नी आमा सुन्तला देवि र छोरि विरामी परेपछि जिल्ला अस्पतालमा उपचारको लागि आएको र डाक्टर शाह लाई नै भेटी उपचार गराएको बताए । भट्टराईले जिल्लामा राम्रो डाक्टर आएकोमा खुसी व्यक्त गर्दै अहिले आमा र छोरीको स्वास्थ राम्रो भएको सुनाए ।

यस्तै भुमिकास्थान नगरपालिका २ कि कमला परियार विरामी भएपछि धेरै अस्पताल तथा क्लिनिकहरुमा चेकजाँचको लागि पुगिन तर उनको समस्या कम भएन पछिल्लो समय डाक्टर शाहाले चेकजाँच गरेपछि निको हुदै गएको उनको अनुभव छ । उनले थपिन् –‘निको हुन भने केहि समय लाग्छ डाक्टरले भन्नुभएको छ । ’
यसैगरी सन्धिखर्क नगरपालिका २ का जीवनारायण चुदाँलीले भने –‘‘मेरो पनि ज्यान दुखेको थियो, पहिला काठमाडौं सहित धेरै स्थानमा चेकजाँच गराए तर
केहीकम भएको थिएन् । जिल्ला अस्पतालका डाक्टर शाहले चेकजाँच गरेपछि अहिले क्रमश ःठिक हुँदै गएको छ ।’

यी त केही प्रतिनिधी पात्रहरु मात्र हुन् । जिल्ला अस्पतालमा उपचारको लागिआएका विरामीहरु अहिले डा.शाह संग नै चेकजाँच गराउनको लागि लाइनमा कुरेर बस्ने गरेका छन् । दैनिक एक सयदेखि एक सय ५० जनासम्म ओपिडीमा उपचारका लागि आउने गरेकामा पछिल्लो समय बढेर दैनिक तीन सयभन्दा बढी बिरामी उपचारको लागि जिल्ला अस्पतालमा आउने गरेका छन् । बालबालिका, ज्येष्ठ नागरिक, मौसमी रुघाखोकी तथा दीर्घ रोगका बिरामी उपचारका लागि आउने गरेको र ओपिडीमा मात्र नभई इमर्जेन्सीमा समेत विरामीको चाप बढेको छ ।

अस्पतालमा केही समय पहिलादेखि बन्द रहेको सिएस सेवा अर्थात् शल्यक्रिया विधिबाट प्रसूती गराएर बच्चा निकाल्ने सेवा पनि अहिले नियमित भएको छ । अस्पतालमा प्रमुखको जिम्मेवारी सम्हालेर चिकित्सक जगन्नाथ तिवारी आएपछि यो सेवा पुन सुरु गरिएको हो । जटिल प्रकृतिका प्रसूतिलाई शल्यक्रियाका लागि बुटबल जानुपर्ने बाध्यता हटेको छ ।

दुई एमडिजिपी, एक विशेषज्ञ र पाँच मेडिकल अफिसरबाट सेवा पुनः सञ्चालन गरिएको हो । अहिलेअत्याधुनिक उपकरणबाट अधिकांश रोगको जाँच गरिने ल्याब सेवा सञ्चालन गरिएको छ। थाइराइड, फंगसन टेस्टदेखि लिएर सबै प्रकारका बायोकेमेस्टिक टेस्ट, डिजिटल एक्स–रे, डप्लर अल्ट्रासाउन्ड सेवा, फिजियोथेरापी सेवालगायत सेवा नियमित सञ्चालन भएका छन्। अन्य सामान्य शल्यक्रियालगायत हाइड्रोसिल, हर्नियालगायत रोगको शल्यक्रिया पनि जिल्लामै हुने गरेको छ । ५० बेड क्षमतामा संचालनको लागी स्विकृत प्राप्त जिल्ला अस्पतालमा अहिले ६० जनाको स्थाई दरबन्दीमा १७ जना कार्यरत छन् भने अन्य दरबन्दी खाली रहेका छन् । अस्पतालमा १७ जना स्थाई कर्मचारी र ७२ जना अस्थायी करार कर्मचारी गरी जम्मा ८९ जना कर्मचारी कार्यरत रहेको सूचना अधिकारी निम रानाले बताउँछन् ।