खोज

कपिलवस्तु(बुटवल टुडे) चैत – कपिलवस्तु जिल्लामा गत आर्थिक बर्ष २०७८/७९ मा कपिलवस्तु जिल्लामा ९ सय नयाँ क्षयरोगका बिरामी पत्ता लागेका छन । बिश्व क्षयरोग दिवशका अवसरमा स्वास्थ्य कार्यालय कपिलवस्तुले तौलिहवामा आयोजना गरेको पत्रकार अन्तरक्रियामा सो जानकारी दिईएको हो ।
जिल्लामा नयाँ क्षयरोगी पत्ता लाग्ने दर प्रति लाख १ सय ३० दशमलव ६ जना रहेको जिल्लाको क्षयरोग बारेको तथ्याङ्क प्रस्तुत गर्दै कपिलवस्तु नगरपालिकाका सिनियर अहेब (अधिकृत) सिद्धार्थकाजी बज्राचार्यले जानकारी दिए । अघिल्लो आवमा नयाँ क्षयरोगी प्रतिलाख ९४ जना भेटिए पनि गत आवमा सो तथ्याङ्क करिब १ सय ३१ पुग्नुले पत्ता लाग्ने दरमा सुधार आएको देखिन्छ । तर, राष्ट्रिय क्षयरोग प्रिभ्यालेन्स सर्वे २०७६ ले नेपालमा प्रत्यक बर्ष ६९ हजार नयाँ क्षयरोगका बिरामी थपिने गरेको र समुदायमा देशै भर नयाँ तथा पुरानो बिरामीको संख्या १ लाख १७ रहेको आकलन गरेको छ । सो तथ्याङ्क अनुसार प्रतिलाख २ सय ४५ जना नयाँ क्षयरोगी भेटिनु पर्ने लक्ष्यमा जिल्लामा भने पत्ता लाग्ने दर राष्ट्रिय लक्ष्यको आधा देखिन्छ । त्यसै गरि चालु आर्थिक बर्षको ६ महिनामा जिल्लामा ४ सय २ जना नयाँ क्षयरोगका बिरामी भेटिएको जनाईएको छ । जुन प्रति १ लाख जनसंख्यामा ५७ दशमलव २ जना हो । गत बर्ष जिल्लामा भेटिएका क्षयरोगका नयाँ बिरामी मध्य ७९ प्रतिशत बिरामीमा फोक्सोको क्षयरोग देखिएको बज्राचार्यले जानकारी दिए ।

जिल्लामा गत बर्ष पत्ता लागेका नयाँ क्षयरोगका बिरामी मध्य ६ दशमलव ४५ प्रतिशत १४ बर्ष मुनीका बालबालिका छन । त्यसै गरि जिल्लामा प्रति एक पुरुष बराबर शुन्य दशमलव ६३ जना महिला नयाँ क्षयरोगी भेटिएका छन । जिल्लाको क्षयरोगीको उपचार सफलतादर ८७ दशमलव ३७ प्रतिशत रहेको, ६ दशमलव ८९ प्रतिशतको क्षयरोगले मृत्यु भएको र १ दशमलव १९ प्रतिशतलाई औषधीले काम नगरेको अन्तरक्रियामा जानकारी दिईएको थियो । गत बर्ष फेला परेका नयाँ क्षयरोगी मध्य सबै भन्दा बढि १ सय ७४ जना बाणगंगा नगरपालिका, १ सय २२ जना कपिलवस्तु नगरपालिका र १ सय १२ जना कृष्णनगर नगरपालिकाका बिरामी भएको स्वास्थ्य कार्यालयको तथ्याङ्क छ । क्षयरोग निवारणको कार्य अगाडी बढाउनका लागी जिल्ला भित्रका सम्पुर्ण स्वास्थ्य संस्थामा निशुल्क उपचार दिईएको, फेरी औषधी शुरु गरेका क्षयरोगीलाई ६ महिना सम्म मासिक ५ सय पोषण खर्च दिईएको, खकार कुरियर सेवा सँगै माईक्रसकोपिक क्याम्प सञ्चालन गरिदै आएको र सचेतनाका कार्यक्रम सञ्चालन हुदै आएको स्वास्थ्य कार्यालय कपिलवस्तुका जनस्वास्थ्य निरिक्षक उमेश घिमिरेले जानकारी दिए ।

कपिलवस्तु नगरपालिकाका स्वास्थ्य शाखा प्रमुख उमेश गुप्ता, पत्रकार महासंघ कपिलवस्तुका अध्यक्ष किरणमान बज्राचार्य लगायतले क्षयरोग निवारणका लागी उपचारमा पहुँच पुर्याउन सचेतना कार्यक्रम अगाडी बढाउनु पर्नेमा जोड दिए । सरकारले सन् २०५० सम्म क्षयरोग निवारण (१० लाख जनसंख्यामा १ जना भन्दा कम) बिरामी हुने दर र मृत्यु दर घटाई रोग सर्ने प्रक्रियालाई रोगी क्षयरोगलाई जनस्वास्थ्यको प्रमुख समस्याको रुपमा नरहन दिने लक्ष्य लिएको छ ।