खोज

चन्द्रौटा(कपिलवस्तु),  चैत ।
कपिलवस्तुको कृष्णनगर नगरपालिकाले विधुत फ्यूज सेवाको कार्यालय भवन भत्काएर मिलन केन्द्र निर्माण कार्य सुरु गरेको छ । सरकारको नाममा रहेको जग्गा भोगचलन गर्न भनी विद्युत प्राधिकरण वितरण केन्द्र कृष्णनगरलाई दिइएको छ । विद्युत प्राधिकरणले भोगचलन गर्दै आएको जग्गामा निर्माण गरिएको फ्यूज सेवा कार्यालय भवनमा जेसीबी लगाएर नगरपालिकाले भत्काएको छ ।
नगरपालिकाले जानकारी बिना जबरजस्ती विद्युतको भवन भत्काएर बाँकी केही जग्गा समेत कब्जा गरेर मिलन केन्द्र निर्माण कार्यमा जुटेको विद्युत कार्यालयले जनाएको छ । नगरपालिकाको वडा नम्बर ९ बहादुरगञ्ज (साविक गाविस बहादुरगञ्ज वडा नम्बर ३) मा रहेको विद्युत फ्यूज सेवा कार्यालयको भवन भत्काइएको जनाइएको छ ।
सरकारले २०५३ सालमा विद्युत प्राधिकरणलाई उक्त जग्गा उपलब्ध गराएको थियोे । विद्युत प्राधिकरणले भोगचलन गर्दै जग्गा नगरपालिकाले प्रयोग गर्न नपाउने दाबी गरेको छ । निर्माण भइरहेको मिलन केन्द्रलाई रोक्नुपर्ने भन्दै विद्युत प्राधिकरणले सम्बन्धित निकायमा पत्रचारसमेत गरेको छ ।
कित्ता नम्बर १५१ र १५२ को १२ कठ्ठा १० धुर जग्गा विद्युत प्राधिकरण वितरण केन्द्रलाई प्राप्त भएको विद्युत प्राधिकरण कार्यालय कृष्णनगरका प्रमुख सुशिल पौडेलले बताए । सरकारले नेपाल विद्युत प्राधिकरण वितरण केन्द्र कृष्णनगरलाई जग्गा उपलब्ध गराएको उनले जनाए । प्रमुख पौडेलले भने ः “विगतमा शाह परिवारले गरेको योगदानलाई स्मरण गर्दै समन्वय कारी भूमिका खेल्नुको सातो यस्तो घटना हुनु दुःखद हो ।“
नगरले भवन भत्काएपछि सेवाग्राहीहरुलाई सास्ती खेप्नु परेको छ । नगरले भवनको केही भाग भत्काएपछि विद्युत कर्मचारीले कोठाभित्र बस्न समेत डराउनुपर्ने अवस्था आएको छ । जेसीबीले भवन भत्काउँदा भित्ता र छत समेत चर्किएको देखिन्छ । यसरी भवन चर्किएपछि कोठाभित्र बस्न कर्मचारीहरुले डर लागिरहेको एक कर्मचारीले बताए । उनले कार्यालयमा भएका सम्पूर्ण समानहरु तितरबितर भएको बताउँदै कार्य सम्पादनमा समेत समस्या सिर्जना भएको उनको भनाइ छ । प्रमुख पौडेलका अनुसार यस क्षेत्रका आम नागरिकलाई प्रदान गर्दै आएको फ्यूज सेवा कार्यालय नहुँदा सेवाग्राही मारमा परेका छन् ।
यता कृष्णनगर नगर प्रमुख रजत प्रताप शाहले स्थानीय सरकारको अधिनमा पर्ने भएकोले नगरले उक्त स्थानमा केन्द्र निर्माण गरिरहेको दाबी गरेका छन् । चित्त नबुझे विद्युत प्राधिकरणले सम्बन्धित निकायमा गएर आवश्यक पहल गरेर बुझ्न सक्ने बताए । नगरकै हक अधिकारभित्र उक्त जग्गा पर्ने हुँदा नगरले प्रयोग गरेको उनको भनाइ छ ।