खोज

गुल्मी,  फागुन- गुल्मीमा अधिकांस मासु पसलहरु मापदण्ड विपरित संचालन भएका छन । भेटेरिनरी अस्पताल तथा पशु सेवा बिज्ञ केन्द्र गुल्मीको संयोजकत्वमा दुइ दर्जन भन्दा बढी मासु पसलहरुको स्थलगत अनुगमनको क्रममा मासु पसलहरु आवश्यक मापदण्ड अनुसार नभएको भेटीएका हुन । सदरमुकाम तम्घास बजार क्षेत्रमा दुई दिनसम्म गरिएको मासु पसलहरुको छड्के निरिक्षण अनुगमनको क्रममा उक्त तथ्य फेला परेको हो ।
अनुगमनको क्रममा अधिकांस मासु पसलहरु स्थानीय तह र सरकारी निकायहरुमा आधिकारीक दर्ता र नियमित नबिकरण नभएको भेटिएको छ । त्यसैगरि स्थलगत निरिक्षणको क्रममा मासु, तरकारी, दुध तथा फलफुलहरु एकै ठाउँमा राखेर बिक्रि बितरण गर्ने गरेको, मासु बिक्रि गर्ने स्थानमा सफा नगरिएको, जाली तथा सिसा नलगाई मासुलाई खुल्ला रुपमा राख्ने गरेको भेटिएको थियो ।
२३ वटा सुचकांकहरुलाई आधार मानि गरिएको निरिक्षणको क्रममा मापदण्ड विपरित संचालनमा आएका त्यस्ता प्रकृतिका मासु पसलहरुलाई सुधार गर्नको लागि तत्कालै निर्देशन दिएको भेटेरिनरी अस्पताल तथा पशु सेवा बिज्ञ केन्द्र गुल्मीका प्रमुख एवं अनुगमन समिति संयोजक डाक्टर भरत काफ्ले बताए । मासु पसल सुधारको लागि आवश्यक मापदण्ड कायम गर्नका लागि मासु पसलहरुको निरिक्षण अनुगमनको क्रममा संलग्न प्रतिवेदनका सुझाबहरुलाई कार्यान्वयन गर्न सम्बन्धित निकायमा आग्रह गर्ने कार्यालय प्रमुख काफ्ल्ले बताएका छन ।
अनुगमन टोलीले मासु व्यवसायीहरुलाई मासु पसल संचालन गर्दा आवश्यक पर्ने न्यूनतम मापदण्डको बारेमा तत्कालै अभिमुखिकरण गराई अनिवार्य रुपमा निर्देशन पालना गर्न सुझाब दिएको छ । स्थलगत अनुगमनको क्रममा टोलीले आम उपभोक्ताहरुको स्वास्थ्यमाथि खेलबाड नगर्न मासु व्यवसायीहरुलाई आग्रह समेत गरेको छ ।
भेटेरेनरी अस्पताल तथा पशु विज्ञ केन्द्र गुल्मीको संयोजकत्वमा गरिएको अनुगमन टोलीमा, जिल्ला प्रशासन कार्यालय, जिल्ला प्रहरी कार्यालय, घरेलु, करदाता सेवा कार्यालय, नगरपालिका, उद्योग वाणिज्य संघ, पत्रकार महासंघ, मासु व्यवसायी समिति लगायतको प्रतिनिधित्व रहेको थियो । जिल्लाको रेसुङ्गा नगरपालिकामा मात्र एक सय भन्दा बढी मासु व्यवसायीहरु रहेको बताईएको छ ।