खोज

गुल्मी,  फागुन- गुल्मीको रेसुंगा नगरपालिकाले एसइईमा ३ दशमलव २ भन्दा माथि जिपिए ल्याएर नगरपालिका भित्रका विद्यालयमा कक्षा ११ मा अध्ययनरत विद्यार्थीहरुलाई सम्मान गरेको छ । पछिल्लो समयमा विद्यार्थीहरु अध्ययनका लागि बाहिर जानेक्रम बढ्दै जान थालेपछि नगरपालिकाले त्यसलाई रोक्नका लागि उनीहरुलाई प्रोत्साहन गर्न मासिक चार हजारका दरले छात्रवृति रकम उपलब्ध गराउन थालेको छ ।

रेसुंगा नगरपालिकाले एसइईमा ३ दशमलव २ भन्दा माथि जिपिए ल्याएका ९६ जना बिद्यार्थीहरुलाई शुक्रबार सम्मान गरेको हो । नगरपालिकाले जेहेन्दार छात्रवृति कार्यक्रम अन्र्तगत विनियोजन गरेको रकमवाट उक्त विद्यार्थीहरुलाई सम्मान गर्दै चेकको माध्यमबाट रकम हस्तान्तरण गरेको हो ।
रेसुंगा नगरपालिकाको यस आर्थिक वर्षको नीति तथा कार्यक्रममा नगरपालिका भित्रका विद्यालयहरुबाट उत्कृष्ट अंक ल्याउने जेहेन्दार विद्यार्थीहरुलाई नगरमै पढ्ने बातावरण सृजना गर्न नयाँ शैक्षीक अभियान शुरु गरेको रेसुंगा नगरपालिका प्रमुख खिलध्वज पन्थीले बताए । उनले यसवाट विद्यार्थी र तिनका अभिभावकदेखि विद्यालयको शैक्षीक गुणस्तर वृद्धि गर्न यो कार्यक्रममले महत्वपूर्ण अर्थ राख्ने बताए ।

नगरपालिकाले ३ दशमलव २ भन्दा माथि जिपिए ल्याई नगरभित्रकै विद्यालयमा अध्यनरत रेसुंगा मावि ३६, सिद्धबाबा माविका ३५ र महेन्द्र माविका २५ जना छात्र–छात्राहरुलाई जनही मासिक चार हजारका दरले वार्षिक ४८ हजार रुपैंयाँको चेक उपलब्ध गराएको छ । रेसुंगा नगरपालिका शिक्षा शाखा प्रमुख विष्णुप्रसाद ज्ञवालीले नगरले चौमासिक रुपमा १६ हजारका दरले विद्यार्थीहरुको वैंक खातामा रकम उपलब्ध गराउँदै आएको भन्दै कक्षा १२ मा पनि सोही अनुसार जिपिए ल्याउने विद्यार्थीहरुलाई सहयोग गर्ने नगरको नीति रहेको जानकारी दिए ।

नगर भित्र रहेका माध्यमिक विद्यालयहरु मध्य सबैभन्दा बढी जिपिए ल्याउने रेसुंगा माविमा अध्ययनरत छात्रा गृष्मा पाण्डे र सोही विद्यालयका छात्र प्रशान्त पन्थीलाई पनि कार्यक्रममा नगर प्रमुख र उपप्रमुखद्वारा सम्मान गरिएको थियो । कार्यक्रममा नगर उपप्रमुख अमृतादेवी कुँवर,वडाध्यक्ष सहितका सम्पूर्ण जनप्रतिनिधिहरु, विभिन्न विद्यालयका प्रधानाध्यापक एवं अभिभावकहरु लगायतको सहभागिता रहेको थियो ।