खोज

पश्चिम नवलपरासी, २१ माघ ।

शान्ति सन्देश फैलाउने उद्देश्य सहित वुद्ध जन्मस्थल लुम्बिनीबाट सुरु भएको साईकल यात्रीको टोली शनिबार पश्चिम नवलपरासीको रामग्राम स्तुप आईपुगेको छ । बौद्ध परिपथ साइकल यात्रा संयोजन समितिको आयोजनामा वुद्धको शान्ति सन्देश फैलाउने र वुद्ध स्थल प्रचारप्रसारमा सहयोग पुर्याउन तीन दिने साईकल यात्रा आयोजना गरिएको हो ।

लुम्बिनीबाट यात्रा थालेको टोली रुपन्देहीको वुद्धस्थल देवदह हँुदै वुद्धको एक मात्र सिंगो अस्तु रहेको स्थल नवलपरासीको रामग्राम आएको हो । रामग्राम स्तुपमा साईकल यात्रीको टोलीलाई स्वागत गर्दे रामग्राम नगरपालिकाका नगर प्रमुख धनपत यादवले रामग्राम स्तुप लगायत वुद्ध संग सम्बन्धित स्थलको एकीकृत विकास हुनुपर्ने धारणा व्यक्त गरे ।

उनले रामग्राम स्तुपको गुरुयोजना कार्यान्वयनमा ल्याउन आफुले पहल गरिरहेको बताउदै गुरुयोजनाको कार्यान्वयन हुन सके यस क्षेत्रको कायापलट हुन सक्ने दाबी गरे । संघीय सरकार संग केही दिन अगाडि काठमाण्डौ पुगेर उपप्रधान तथा अर्थमन्त्री विष्णु पौडेल संग गुरुयोजना कार्यान्वयनका लागि ध्यानाार्कषण गराएको र उक्त गुरुयोजना कार्यान्वयनको प्रतिवद्धता प्राप्त भएको पनि नगर प्रमुख यादवले बताए ।

उपप्रमुख सम्झना चौधरीले एतेहासिक महत्वको धार्मिक तथा पर्यटकीय स्थल रामग्राम स्तुपको विकासका लागि तीनै तहका सरकार एकजुट हुनुपर्नेमा जोड दिईन् । साइकल अभियानकर्मी, बौद्धमार्गी एवं भारतको अनाहदी यात्राका गरी ७० जनाको टोलीले शान्ति सन्देश सहितको यात्रा सुरु गरेको यात्रा संयोजक उषा तितिक्षुले जानकारी दिईन् ।

सो कार्यक्रममा पत्रकार बेचु गौड, नगरपालिकाका लेखापाल संजय शर्मा लगायतले बोल्दै रामग्राम स्तुपको विकास र संरक्षणमा सबै जिम्मेवार बन्नुपर्नेमा जोड दिएका थिए । परासी वुद्ध चोकबाट साईकल यात्रीको टोलीलाई स्वागत गरेर नगर प्रमुख र उपप्रमुख पनि साईकलमै रामग्राम स्तुप सम्म पुगेका थिए । रामग्राम स्तुपमा दश मिनेट ध्यान गरेर साईकल यात्रीको टोली महेसपुर नाका हुँदै भारत प्रस्थान गरेको छ । आइतबार कुशिनगरमा पुगेर यात्रा समापन हुने छ ।