खोज

 गुल्मी माघ ।
रेसुङ्गा क्षेत्र यतिबेला आन्तरिक तथा वाह्य पर्यटकहरुको लागि आकर्षणको केन्द्र बनेको छ । धार्मिक महत्वसँगै पर्यटकीय गन्तव्य स्थलको रुपमा विकास हुदै गएको रेसुंगामा सरकारी स्तरवाट मात्र नभई यक्तिगत लागनी खर्चेर बनाइएका संरचनाले आकर्षण बढाउन थालेका छन् ।
रेसुंगा क्षेत्रमा निर्माण गरिएका र निर्माणधिन अबस्थामा रहेका यस्ता संरचनाहरुको दृश्यावलोकन गर्न र बनभोज खानको लागि युवायुवतीदेखि वृद्धवृद्धाहरुसम्म रेसुंगाको गर्जुरा, नुनामारे, पोखरी क्षेत्र, भुवनेपार्क लगायतका स्थानमा पुग्ने गर्दछन । रेसुंगाको सदियौंदेखिको ऐतिहासिक तथा धार्मिक महत्व हुँदाहुँदै पनि प्रचार प्रसारको अभावमा ओझेलमा पर्दै आएको छ ।

रेसुंगा क्षेत्रको प्रचार प्रसारका यतिबेला गुल्मीदरवार गाउँपालका ३ निवासी सुब्बा बस्नेतले ५० लाख भन्दा बढी रकम खर्च गरेर आफ्नै लगानीमा मन्दिर निर्माण गरेका छन । रेसुंगा नगरपालिका र गुल्मीदरबार गाउँपालिकाको संगम स्थल भुवने डाँडाँमा निर्माण गरिएको उक्त आकर्षक मन्दिरले त्यहाँ जाने जो केहीको पनि मन लोभ्याई रहन्छ । भगवान राम लक्ष्मण र सिताको पौराणिक प्रसंगलाई जोडेर निर्माण गरिएको उक्त मन्दिरमा रिष्यश्रृंङ्गदेखि बानर सेना र जटायुसँगै त्रेता युगमा अयोध्याका राजा दशरथले श्रृंङ्गे रिषीलाई हात्ती घोडा सहित निमन्त्रणा पठाउँदा छोडिएको हात्ती घोडाका पाईलाको निशानी समेत रहेको छ ।

रोजगारिको शिलसिलामा हङकङ, मलेसिया र फिलिपिन्स लगायतका देशमा आफ्नो व्यवसाय संचालन गर्दै आउनु भएका बस्नेतले कोभिडको समयमा घरमा आएको अवशरमा खाली समयलाई कसरी सदुपयोग गर्ने भनेर मन्दिर बनाउने सोंच बनाएको बताए । उनले आफुलाई धर्मप्रति निकै आस्था रहने भएका कारण पनि सामाजिक काममा लाग्ने प्रेरणा जागेको उनको भनाई छ ।

निकै कलात्मक ढंगले निर्माण गरिएको उक्त मन्दिर रेसुंगाको काखमा अबस्थित छ । मनकारी बस्नेतले निर्माण गरेको श्रीरामको उक्त मन्दिर अन्य मन्दिरहरु भन्दा भिन्न प्रकारको र पौराणिक प्रसगले कुँदिएका छन । तिनै चित्र र मुर्तिहरुको दृश्यावलोकन गर्न पर्यटकहरुको मुख्य गन्तव्य स्थल बन्ने पुर्व वडाध्यक्ष खुम खत्रीले बताए । मन्दिर निर्माण भएपछि अहिले त्यस क्षेत्रमा बनभोज खान जानेर र टिकटक बनाउन जानेहरुको चहलपहल बढ्दै जान थालेको छ । विदाको समयमा मनोरम हिम श्रृङखला हेर्न र पारिवारिक घुमघाम र भेटघाटका लागि पनि उक्त ठाउँ सबैका लागि आकर्षणको केन्द्र बनेको छ ।