खोज

गुल्मी,  माघ – उखानै छ “खाने मुखलाई जुँगाले छेक्दैन” मनैदेखि काम गर्ने ईच्छा शक्ति भयो भने अरुको मुख ताक्नु पर्दैन । यस्तै ईच्छा शक्ति देखाएका छन गुल्मी आँपचौरका प्रवासीहरुले । उनीहरुले यतिबेला प्रवासमा बसेर पनि आफ्नो गाउँघरको दुखसुख र पीरमर्का बुझ्दै सामाजिक कार्यमा हातेमालो गर्दै आईरहेका छन ।
गाउँमा केही मानिस औषधि उपचारको अभावमा अलपत्र पर्नु पर्दैन । समाजमा कुनै नयाँ काम गर्नु परेमा सबैले सामुहिक छलफल गरेर रकम संकलन गर्ने प्रचलन छ । असाहय र विपन्नदेखि बिदेसमा अलपत्र परेका कैयौ नेपालीहरुको दुखमा मलम लगाउने काममा सधै अग्रसरता देखाउँदै आएका छन आँपचौरका प्रवासीहरुले ।
आँपचौरका प्रवासीहरुले यतिबेला गाउँमा पर्यटन प्रबद्र्धनमा नयाँ कामको थालनी गरेका छन । उनीहरुले धार्मिक महत्व बोकेको कोटेश्वर धामको महत्वलाई उजागर गर्न प्रवासीकै लगानिमा पक्की पुल निर्माण गर्न लागेका हुन । बर्षा याम र चाडपर्वको समयमा कोटेश्वर गुफा जाने तिर्थालुहरुलाई खोला तर्न समस्या भएपछि प्रवासीहरुको पहलमा पक्की पुल निर्माण गर्ने सोंच बनाएको हाल युरोपमा रोजगारी तथा व्यवसाय संचालन गर्दै आईरहेका फडिन्द्र भट्टराई बताउँछन । भट्टराई जस्तै हाल जापानमा रोजगारि गर्दै आएका स्थानीय किरण खरेल र तुलाराम तिवारी जस्तै युवाहरुको पहलमा पक्की पुल निर्माण गर्न शुरु गरिएको हो ।

जय जय कोटेश्वर समूहको पहल एवं धार्मिक व्यक्तित्वको सहयोगमा कोटेश्वर धाम जाने सडक अन्र्तगत धैटेआँप नजिकै गेँदी खोलामा पक्की पुल निर्माण गर्न शुरु गरिएको पुल निर्माण समितिका संयोजक डिल्लीराज अर्यालले बताए । पुल निर्माणमा ६ लाख ५० हजार रकÞम खर्च हुने भएको छ । उक्त पुलको लम्बाई १३ मिटर र चौडाई करिब दुइ मिटर रहने छ । दुइ महिना भित्र उक्त पुल निर्माण कार्य सम्पन्न भएपछि दुइपाँग्रे सवारी साधन र पैदल यात्रुहरुलाई आवत जावत गर्न सहज हुने भएको छ ।

पुलले मुसिकोट नगरपालिका र चन्द्रकोट गाउँपालिकालाई समेत जोड्ने भएको छ । आँपचौर त्यसै पनि नेपालमै कफीको उद्गम स्थलको रुपमा परिचित छ । कफीको पहिचानसँगै पर्यटकीय विकासको माध्यमबाट समेत आँपचौरलाई परिचित बनाउने अभियानमा आफुहरु जुटेको सामाजिक अगुवा तुलाराम तिवारीले बताए । पुल निर्माणमा सहजिकरणका लागि जापानबाट तुलाराम तिवारी, किरण खरेल र वेलायतवाट फडिन्द्र भट्टराइलाई बैदेशिक आर्थिक सहयोग संकलन समिति संयोजकको रुपमा रहेका छन । धार्मिक क्षेत्र जाने ढाउँमा पुल निर्माण शुरु भएपछि स्थानीयहरु थप खुसि बनेका छन ।