खोज

दाङ, २३ मङ्सिर ।

घोराही उपमहानगरपालिका–१३ सेवार वनगाउँमा रहेको ज्यामिरे दह बिदा मनाउन तथा घुमफिरका लागि आकर्षक गन्तव्यका रुपमा विकास हुँदै गएको छ । पछिल्लो समय आन्तरिक पर्यटको गन्तव्यका रूपमा ज्यामिरे दहमा घुम्न आउने आन्तरिक पर्यटकको रोजाईको क्षेत्र बन्दै गएको हो । घुमघाम गर्ने र वनभोज खानेको संख्या दिनप्रतिदिन बढ्दै गएको छ ।

ज्यामिरे दह घुम्न आएकी तुलसीपुर उपमहानरपालिकाकी –६ की दिपा थापाले यो ठाउँ निकै सुन्दर लागेको बताइन् । “पहिलो पटक दह हेर्न आएको, दहको सौन्दर्यता निकै राम्रो लाग्यो, अझै संरक्षण हुन बाँकी रहेको जस्तो लाग्यो । किनभने तालसम्म पुग्नलाई गोरेटो बाटो राम्रो बनाएमा झनै सजिलो हुने थियो”– थापाले भनिन्, “बाह्रकुने तालदेखि ज्यामिरे दहसम्म पुग्न ज्येष्ठ नागरिक अशक्तलाई कठिन रहेछ ।”

दहमा दैनिकजसो आउने पर्यटकको संख्या बढ्दै गएपनि अझै भौतिक पूर्वाधारको अभाव देखिएको छ । वनभोज स्थल, शौचालय, सडक लगायतका संरचना नहुँदा पर्यटकको संख्या बढ्न नसकेको स्थानीय बताउँछन् ।

लमही –३ की सरिता पौडेल पहिलो पटक ज्यमिरे दहमा वनभोज खान आएकी थिइन् । उनले भनिन् “ज्यामिरे दहमा पुग्नका लागि आधा भन्दा कम दूरीमा मात्रै सिंढी निर्माण भएको रहेछ , धेरै भागमा सिंढी निर्माण गर्न बाँकी रहेछ, यो व्यवस्थित हुन सकेमा अझ राम्रो हुने थियो” “यहाँ आउने पर्यटकलाई असजिलो हुने थियो ।”

अन्य दिनमा भन्दा बिदाको दिनमा बढी आन्तरिक पर्यटकहरू त्यहाँ पुग्ने ज्यामिरे दहमा डुङ्गा सञ्चालन गर्दै आएका विरजंग पुनले बताए । प्रकृतिले नै उपहारका रुपमा दिएको ज्यामिरे दह संरक्षण गरिएपछि २५ देखि ३० मिटरसम्म गहिराइ रहेको छ । यहाँ आन्तरिकसँगै बाह्य पर्यटकको संख्या बढाउन आवश्यक संरचना समयमै निर्माण गर्नुपर्ने देखिन्छ ।

ज्यामिरे दहको क्षेत्रफल करिब १२ विघा रहेको छ । यसलाई पर्यटकीय क्षेत्र बनाउनका लागि त्यहाँ एउटा डुङ्गा राखिएको छ भने लाइफ ज्याकेटहरू समेत व्यवस्था गरिएको छ ।

दहमा दिनप्रतिदिन आन्तरिक पर्यटक बढ्दै जान थालेका छन् भने बाह्य पर्यटन केन्द्रको रुपमा पनि तालको सम्भावना बढेको छ । ज्यामिरे दह हेर्न तथा ढुंगामा सयर गर्न धेरै आन्तरिक पर्यटक आउने क्रम बढ्दै गएको डुंगा संचालक पुन बताउँछन् ।

ताल अवलोकनका लागि पुग्ने आन्तरिक तथा वाह्य पर्यटकका लागि मनोरञ्जनका रूपमा डुंगा सञ्चालन गरिएको हो । बिदाको समय तथा चाडपर्वको समयमा डुंगा सयर गर्नेका लागि घुइँचो लाग्ने गरेको छ । दैनिक रूपमा सयांै पर्यटकहरूले अवलोकन तथा डुंगामा सयर गर्ने गरेको डुंगा संचालक पुन बताउँछन् । एक जनाका लागि ५० रुपैयाँ टिकटको व्यवस्था गरिएको छ । प्राकृतिक रूपमा रहँदै आएको तालको स्तर वृद्धि तथा ड्याम्प निर्माणका लागि घोराही उप–महानगरपालिकाले ठूलो लगानी गरेको छ । जसका कारण बाह्रकुने दहदेखि ज्यामिरे दहसम्म पुग्ने पक्की बाटो निर्माणदेखि विश्राम स्थल पनि बनाइएको छ ।

जलविहारका लागि उत्कृष्ट मानिएका कारण धेरैजसो आगन्तुकहरु डुंगा सवार गर्दै प्राकृतिक वातावरणमा रमाउने गरेका छन् । कसैले तालको कलकल पानी, कसैले तालमा ढुंगामै सयर गरिरहेको दृश्य, ताल वरपर चराहरुको चिरबिर आवाज, वरपर जंगलले घेरिएको निकै रमणीय दृश्य देख्न सकिने ज्यामिरे दहमा धेरैको नजर पर्दै गएको छ ।

बाह्रकुने दहको शिरमा रहेको ज्यामिरे दहलाई संरक्षण गरेपछि सबैको लागि सधैको लागि हेर्न लायक ठाउँ बनेको हो । “अझै धेरै संरचना निर्माणकै क्रममा रहेको र स्थानीय सरकारले चासो दिएको छ, प्रदेश र संघ सरकारले पनि यसमा ध्यान दिनेछ”–पुनले भने । अहिले दहलाई चारैतिरबाट पैदल हिंड्दै जलाशयको मनोरम दृश्य अवलोकन गर्न मिल्ने गरी सर्वेको काम भईरहेको उनले बताए ।

घोराही बजारबाट करिव चार किलोमिटरको दूरीमा रहेको बाह्र कुने दह पुग्ने हरेक पर्यटकलाई नजिकै रहेको ज्यामिरे दहसम्म पुग्ने वातावरण बनाउन स्थानीय सरकार, सरोकार निकायले दीर्घकालीन योजना बनाउन त्यहाँ आउने पर्यटकले आग्रह गर्ने गरेका छन् ।