खोज

निर्वाचन नजिकिदै गर्दा दलका उम्मेदवार प्रचारमा व्यस्त छन् । दाङ क्षेत्र नम्वर १ मा प्रतिनिधि सभाका लागि तीनजना पुर्वसहकर्मी प्रतिष्पर्धामा छन् । एमालेबाट शान्ता चौधरी, गठबन्धनबाट मेटमणि चौधरी र पुर्व एमाले नेतृ गंगा चौधरी स्वतन्त्रबाट प्रतिष्पर्धामा छन् । शान्ता चौधरी धेरैले सुनेको नाम हो । घोराही उपमहानगर पालिका वडा नम्वर ४ निवासी चौधरीले २०६० सालदेखि मुक्त कमैया आन्दोलनबाट आफ्नो सामाजिक यात्रा सुरु गरेकी थिइन् । २०७० सालमा प्रतिनिधिसभा सदस्यमा पराजित भएकी चौधरी २०७४ सालमा पुन नेकपा एमालेबाट समानुपातिक सांसद भएकी थिइन् । उनी नेकपा एमालेको विभिन्न विभागमा रही काम गर्दै हाल पोलिटब्युरो सदस्य हुन् । दाङ क्षेत्र नम्वर २ का बासिन्दा भए पनि यस पटक क्षेत्र नम्वर १ वाट उम्मेदार दिंदा उनलाई कसैले ‘टुरिस्ट’ उम्मेदवार भनिरहेका छन् । चुनावकेन्द्रित रहेर दाङ सहकर्मी चुमा आचार्यले उनीसंग गरेको कुराकानीको सारसंक्षेप ।

तपाइले सांसद भएर पहिलो पाँच वर्ष के गर्नु भयो जसका कारण दोहोरिन चाहनुहुल्छ ?
–संसद भनेको विकास भन्दा पनि कानुन बनाउने थलो हो । मैले मुक्त कमैया, सुकुम्वासीहरु, मुक्त कम्लरीका लागि कानुन बनाउन सफल भएको छु । उनीहरुका लागि शिक्षा, स्वास्थ्य लगायतमा बजेट छुट्टाउन सफल भएको छु । लमहीमा ट्रमा सेन्टर ल्याउन मेरो योगदान रहेको छ । म यस क्षेत्रवाट प्रत्यक्ष प्रतिनिधित्व नागरेका कारण पनि यस क्षेत्रमा देखिने गरी विकास गरेको छैन । यद्यपि संसद कानुन बनाउने थलो भएका कारण उत्पीडित, भूमिहीन, मुक्त कम्लरीदेखि वर्गीय समस्या समाधानका लागि कानुन बनाउन पहल गरेको छु । अव प्रदेश राजधानीको व्यवस्थापन गर्न तथा उत्पीडित वर्गका लागि बनेका कानुन कार्यान्वयन र वाँकी रहेका कानुन बनाउन फेरि पनि दोहोरिन चाहेकी हँु ।

के एजेण्डा लिएर मतदाताकहाँ पुग्दै हुनुहुन्छ ?
–मेरो पहिलो एजेण्डा भनेको नै भूमिहीन सुकुक्वासी समस्या समाधान देखि, वर्गीय मुक्ति नै हो । दाङ भूमिहीन सुकुम्वासीहरुको क्षेत्र पनि हो । त्यसकारण उनीहरुको सम्पूर्ण अधिकार राज्यले ग्यारेन्टी गरिनु पर्छ । म निर्वाचनमा विजयी भएँ भने पहिलो कार्य उनीहरुका लागि कानुन बनाउने र बनाएको कानुन कार्यान्वयनमा जोड दिने बताउँदै आएको छु । त्यसका साथसाथै जनताले प्रदेश राजधानीको अनुभूति गर्ने गरी राजधानी व्यवस्थापन गर्ने, शिक्षा, स्वास्थ्य, खानेपानी, सडक लगायतको एजेण्डा लिएर गएको छु । मेरो प्राथमितामा राप्ती तथा अन्य नदीमा तटवन्ध, युवालाई रोजगारी, महिलाहरुलाई आत्मनिर्भर बनाउने सवै खाले वर्गीय समस्या समाधान लगायतका रहेका छन् ।

निर्वाचनमा तपाइलाइ विश्वास गर्नुपर्ने कारण के ?
–म पटक पटक संसदमा गएको छु । मैले वर्गीय समस्या समाधानका लागि कानुन बनाउने काम गरेको छु । कानुन बनाएर मात्र पुग्दैन कार्यान्वयन हुन जरुरी छ । मैले सामाजिक आन्दोलन र संसदमा खेलेको भूमिका मेरो निर्वाचन क्षेत्रका वासिन्दाले मसिनो गरी थाहा पाउनु भएको छ । मलाइ विशवास छ फेरि पनि मलाई विश्वास गरेर विजयी बनाउनु हुन्छ ।