खोज

अर्घाखाँची, ०२ जेठ ।

जिल्लाको पाणिनि गाउँपालिका लुम्बिनी प्रदेशमै सबैभन्दा कम बेरुजु आउने पालिका बनेको छ । महालेखा परिक्षकको कार्यालयले राष्ट्रपति रामचन्द्र पौडेललाई बुझाएको ६२ औँ प्रतिवेदन अनुसार पाणिनि गाउँपालिकाको लेखा परिक्षण गर्दा ०.११ प्रतिशत अर्थात १५ लाख ३५ हजार रूपैयाँ मात्र बेरुजु देखिएको छ । लुम्बिनी प्रदेशमै पहाडी जिल्ला अर्घाखाँचीको बेरुजु अन्तर्गत १० लाख हरिहर शिक्षा क्याम्पसलाई दिएको अनुदान र ५ लाख ३५ हजार उपभोक्ता समितीबाट असुल गनुपर्ने रकम बेरुजुमा देखिएको हो ।

पाणिनि गाउँपालिकाले गत आर्थिक वर्षमा १ अर्ब ६८ करोड ५० लाख २५ हजार रूपैयाँ बराबरको लेखा परिक्षण गर्दा ०.६१ प्रतिशत बेरुजु रहेको थियो । ६२ औँ प्रतिवेदन अनुसार पाणिनि गाउँपालिकाको १ अर्ब ४४ करोड ५० लाख ४८ हजार रूपैयाँको यो तथ्यांकका आधारमा पाणिनि गाउँपालिका लुम्बिनीमै कम बेरुजु आउने पालिका मध्ये प्रथम बनेको हो । यसका आधारमा देशभरको अवस्थालाई हेर्दा पाणिनी गाउँपालिका सबै स्थानीय तह मध्ये कम बेरुजु आउने छैटौं नम्बरमा परेको पाणिनी गाउँपालिकाका प्रमुख प्रशासकीय अधिकृत रोमनाथ न्यौपानेले बताए ।

महालेखाले सार्वजनिक गरेको ६२ औँ वार्षिक प्रतिवेदन अनुसार सो तथ्यांक सार्वजनिक भएको हो । पणिनि गाउँपालिकामा भएका कामहरू थप पारदर्शी ढंगबाट अगाडि बढाइएको छ, कर्मचारी, जनप्रतिनीधी सरोकारवालाहरू, नागरिक समाज सबै सचेत भएर कानुनलाई पालना गरेकै कारण लुम्बिनीमा नै प्रथम भएको हो, न्यौपानले भने ‘खरिद प्रक्रियाहरू प्रतिष्पर्धी र पारदर्शी गराइएको छ, यसलाई यो वर्ष र आगामी वर्ष पनि निरन्तरता दिन्छौँ ।’

उपभोक्ताको लागत सहभागिता नहुने ठाउँमा टेण्डर मार्फत कामहरू अगाडि बढाउनुपर्छ, कानुन पालना गर्दै वित्तिय उत्तरदायीत्वहरू निर्वाह गरेका छौँ । पाणिनिमा दरबन्दी भन्दा बढी कर्मचारी पाणिनिमा छैन, कम नै छन, कर्मचारीको खर्चमा बेरुजु देखिएको छैन, कानुनको पालनालाई मुख्य ध्यान दिन्छौँ, न्यौपानेले भने । पाणिनि गाउँपालिकाले आर्थिक वर्ष ०८१-८२ को कृषि तथा पर्यटन प्रवद्र्धन रोजगारी र पूर्वाधारको विकासको साथै उत्पादनमुखी आर्थिक सामाजिक रूपान्तरणका माध्यमबाट विद्यामान गरिबी असमानता तथा वेरोजगारीको अन्त्य गर्ने उद्देश्यले ‘पाणिनि र दुर्वासा ऋषिको पहिचान समृद्धि पाणिनि निर्माण हाम्रो अभियान’ को लक्ष्य तथा दीर्घकालीन सोचका साथ अगाडि बढाइरहेको गाउँपालिकाका अध्यक्ष टेकराज न्यौपानेले बताए ।

टेकराज न्यौपाने
अध्यक्ष, पाणिनि गाउँपालिका, अर्घाखाँची

पाणिनि गाउँपालिकाबाट विनियोजन भएको रकम कार्यान्वयनमा जनप्रतिनिधीहरू एकजुट भएर काम गरेका छौँ, गाउँपालिकाको ऐन नियम अनुसार योजना कार्यान्वयन गरिरहेका छौँ वडा नं. ६ का वडा अध्यक्ष कृष्णप्रसाद पौडेलले भने ‘आगामी वर्ष शुन्य बेरुजु ल्याउँनमा थप सबै जनप्रतिनिधी, कर्मचारी सरोकारवाला मिलेर पहल गछौँ ।’ पालिकामा सुशासन कायम गर्न संघ प्रदेश र स्थानीय तहले मार्गदर्शन गरेका कुराहरूको अनुसरण गरी खरिद प्रक्रिया पारदर्शिता र प्रभावकारी ढंगबाट अगाडि बढाईएको छ ।

अहिले राज्यको पुनःसंरचना र राज्यमा संघीयता कार्यान्वयनमा आएसँगै धेरै अधिकारहरू स्थानीय तहलाई आइसकेको अवस्थामा विभिन्न विचारधारा लक्ष्य लिएर आएका नयाँ जनप्रतिनिधिहरूसँग छलफल भई सही प्रस्तावहरू सर्वसम्मत रूपमा अगाडि बढाई आर्थिक विकास, सामाजिक विकास, पूर्वाधार विकासतर्फ पालिकाको काम तीव्र गतिमा बढाएको छ ।अर्घाखाँची जिल्लाको समग्र अवस्थालाई हेर्दा पनि आर्थिक वर्ष २०७९-८० को तुलनामा २०८०-०८१ मा मा बेरुजु घटेको छ ।

भूमिकास्थान नगरपालिकामा ३१ लाख ११ हजार रूपैयाँ अर्थात ०.१९ प्रतिशत, छत्रदेव गाउँपालिकामा ५१ लाख ४५ हजार रूपैयाँ अर्थात ०.३७ प्रतिशत, मालारानी गाउँपालिकामा १ करोड ७ लाख ९६ हजार रूपैयाँ अर्थात ०.७१ प्रतिशत, सन्धिखर्क नगरपालिकामा १ करोड ९२ लाख ७९ हजार रूपैयाँ अर्थात ०.९१ प्रतिशत, शितगंगा नगरपालिकामा १ करोड २ लाख ५७ हजार रूपैयाँ अर्थात ०.५३ प्रतिशत बेरुजु देखिएको हो ।