खोज

गुल्मी, ०१ जेठ ।

गुल्मीको सत्यवती गाउँपालिकामा कृषि एम्बुलेन्स सेवा सञ्चालन भएको छ । किसानहरूले उत्पादन गरेका कृषि उपजहरूलाई निर्यात गर्न सहयोग पुराउने उद्देश्यले कृषि एम्बुलेन्स सञ्चालनमा ल्याएको गाउँपालिका अध्यक्ष टिकाराम पाण्डेले बताए । सत्यवती गाउँपालिका र संघिय सरकारको लागत साझेदारी अन्तर्गत ३४ लाख ७० हजार मूल्यमा पालिकाद्वारा कृषि एम्बुलेन्स खरिद गरेको हो । पालिकामा कृषकहरूले उत्पादन गरेका कृषि उपजहरू समयमै बजारसम्म पुराउन नसक्दा किसानहरूले ठूलो समस्या भोग्दै आएका थिए । उक्त एम्बुलेन्स पालिकाले सहकारीलाई सञ्चालनका लागि जिम्मा दिएको छ । सहकारीले किसानहरूले उत्पादन गरेका तरकारी खरिद गर्ने बताईएको छ । यसरी खरिद गरी बिक्री गरेपछि किसानहरूको खातामा रकम जम्मा गरिदिने व्यवस्था मिलाएको अध्यक्ष पाण्डेले जानकारी गराए ।

कृषि एम्बुलेन्स सञ्चालन भएसँगै किसानहरूले उत्पादित सामग्रि सहजरूपमा बजारसम्म पुराउन सजिलो हुने भएको छ । यसले कृषकहरूलाई प्रोत्साहित गर्नुका साथै उत्पादनमा समेत थप बृद्धि हुने अपेक्षा गरिएको गाउँपालिका उपाध्यक्ष निरमाया तरामु बताउछिन । कृषि एम्बुलेन्सबाट उत्पादिन वस्तुहरू सोझै कृषकबाट उपभोक्तासम्म पुग्ने र कृषकहरूले पनि ति बस्तुको उचित मूल्य पाउने भएको हुँदा किसानहरू पनि खुसी बनेको उपाध्यक्ष तरामुले बताइन । सत्यवती पालिकाले उत्पादनको आधारमा कृषकहरूलाई अनुदान उपलब्ध गराउँदै आएको छ । पालिकाले १० क्वीण्टलसम्म तरकारी उत्पादन गर्ने किसानलाई प्रति किलो दुई रूपैंया र १० क्वीण्टल भन्दा माथि उत्पादन गर्नेलाई प्रति किलो तीन रूपैयाँ अनुदान उपलब्ध गराउँदै आएको सत्यवती गाउँपालिकाका प्रमुख प्रशासकीय अधिकृत कमलप्रसाद भुसालले जानकारी दिएका छन ।