खोज

बुटवल, ३० बैशाख । बुटवलमा जारी उज्जवल युवा क्लब नकआउट क्रिकेट कप २०८२ मा वेष्ट्रन क्रिकेट एकेडेमी र बुटवल १९ बिजयी भएका छन । बुटवल उपमहानगरपालिकाको सहयोग तथा उज्जवल युवा क्लबको आयोजनामा भएको प्रतियोगितामा पहिलो खेलमा वेष्ट्रनले बुटवल युथ क्लबलाई २ बिकेट तथा दोस्रो खेलमा बुटवल १९ ले सृजना युवा क्लबलाई १४३ रनको विशाल अन्तरले पराजित गरेको हो ।

बुटवल –१६ स्थित नरेश्वर खेलमैदानमा मंगलबार भएको खेलमा टस जितेर वेष्ट्रनले बलिङ रोजेपछि ब्याटिङमा उत्रेको बुटवल युथले १५ ओभरमा ९ बिकेटको नोक्सानीमा ११० रनको लक्ष्य खडा गरेको थियो । बुटवलका प्रकाश भण्डारीले ३६ तथा विदेश खातीले १२ रन जोडे । वेष्ट्रनका सुरज सिह र अभिषेक गौतमले समान २–२ बिकेट लिए ।
मध्यम लक्ष्यलाई वेष्ट्रनले ८ बिकेटको नोक्सानीमा लक्ष्य भेटायो । वेष्ट्रनको जितमा प्रकाश न्यौपानेले ३३ तथा दिपेश रोक्काले ३१ रन बनाए । बुटवलका युथका सुजन केसी र सुधन श्रेष्ठले समान १-१ बिकेट लिए । खेलमा वेष्ट्रनका प्रकाश न्यौपाने प्लेयर अफ दी म्याचबाट पुरस्कृत भए ।

यसैगरि दोस्रो खेलमा टस जितेर ब्याटिङ रोजेको बुटवल १९ ले १६ ओभरमा २ बिकेटको नोक्सानीमा १९९ रनको बिशाल लक्ष्य खडा गरेको थियो । जसमा अजय पाण्डेले १४२ तथा सम्राट थापाले ४२ रनको योगदान दिए । सृजनाका अजय खान र रोशन थापामगरले १–१ बिकेट लिए । बिशाल लक्ष्य पछ्याएको सृजना ५७ रनमा समेटियो । चेतन क्षेत्रीले २६ रनबाहेक अन्य ब्याट्म्यान क्रिजमा टिक्न सकेनन । बुटवलको जितमा शिशिर लुईटेल र हेमन्त क्षेत्रीले सानदार ४–४ बिकेट लिए । खेलमा अजय पाण्डे प्लेयर अफ दी म्याचबाट पुरस्कृत भए ।

प्रतियोगिताको विजेताले नगद ५१ हजार १ सय ५१ रुपैयासहित ट्रफी र मेडल, उपविजेताले नगद २५ हजार ५ सय २४ नगदबाट पुरस्कृत हुने क्लबका अध्यक्ष पंकज शर्मा गौतमले बताए । यसैगरि विधागत रुपमा सर्वोत्कृष्ट खेलाडीलाई ३ हजार ३३३ रुपैयाँ, उत्कृष्ट ब्याटर र उत्कृष्ट बलरलाई समान १ हजार ५५५ रुपैयाँ नगद राशीसहित पुरस्कार प्रदान गरिने सचिव विवेक आचार्यले जानकारी दिए ।